Saray Naipurok para konan Dios tan konan Karniro
14
Ket, sin kinmikit ako anamanaet, anaod, naꞌkit koya a Karniro nin nakaꞌdeng itaw sa talugtog a mantawagen nin Siona, kalamoꞌ nasara a 144,000b nin tutawo. Sa waleng ran sarayti ket naisurat yay ngaran na tan si ngaran nan Ama na.c 2 Main nin narngeꞌ kon busis nin ibat sa langit a bilang kanurkor nin alalakin daluyon o tunoy nin maksaw a kudor. Bilang et a lamang nin tunoy nin abaw a arpa nin man-gitarawen.3 Saray 144,000 nin tutawo ket mampangansyon saran baꞌyo nin kanta sa adapan nan truno tan sa adapan ran aꞌpat a sibibyay a pinarsa tan sa adapan ran pupangulo. Siti nin kanta ket kasan raruman makaadal no kai sarayti tamoꞌ saray 144,000 a simbot na sa sangkamundwan nin si Karniro. 4 Sarayti ket tububaꞌyo sara nin kai sara et gapo nin nikiraray sa babayi. Anaod, malinis saran peteg tan tumumbok sara konan Karniro adtiman a keen na. Simbot sara ta pigaw nin maipurok sara konra nin tutawo, tan naididika sara konan Dios tan konan Karniro nin bilang a say uꞌnan yatab ket ibi konan Dios. 5 Kai sara gapo nin nibulaꞌ-bulaꞌ; kasa gapo nin maiparsa nin dukaꞌ a ginwaꞌ ra.
Say Ipatandaꞌ ran Saray Tuloy Anghil
6 Ket, main et nin naꞌkit kon anghil nin manlumpad sa taꞌgay. Main nin Mabistan Patandaꞌ nin tutuo anggan-angga nin ipatandaꞌ na sa sarban tutawon mangibwat sa sarba nin dayaꞌ, saritaꞌ, puri tan nasyon. 7 Wanan nitaꞌway nin maksaw,
“Igalang moya a Dios tan raywen moya sa kataꞌgayan na banaꞌ ta say panaon nin panunusa na sa tutawo ket narateꞌ ana.
Raywen moya ta sya a namarsa nin kalangitan, nin lutaꞌ, nin taaw, nin subor tan nin ilog.”
8 Main nin sinmunor nin ikarwan anghil a wana,
“Nasidaꞌ yayna!
Si mapwirsa nin syudad nin Babilonia ket nasidaꞌ yayna nin intiro.
Pinabok nasara a tutawo sa sarban nasyon nin say baraꞌmon mabayanin arakd na
a say nipangayat na konra sa nikasamaꞌ a gawaꞌ-gawaꞌ nan kasan dangkaꞌ.”
9 Kaaram, main nin ikatlon anghil nin sinmunor konran rwa, ket wanan nitaꞌway nin maksaw,
“Saray siꞌnuman a mampangrayo konan makapaliꞌmon ayep tan konan si ginwaꞌ nin imahin na, tan nipamarkawan ray waleng o gamet ra nin si marka nan si makapaliꞌmon ayep, 10 painumen sara liꞌ anamaet nin mabayanin arake nan Dios a kasa gapo nin nilawok.
Say rabay irgwen ket irangep ra liꞌ a grabin panunusa nan Dios mangibwat sa sager na nin kasa gapon pangingingaꞌdo. Padyaꞌdyaen sara liꞌ sa mandumtan asuprif itaw sa impyirno nin mangkiten-kiten ran uanghil nin naitalaga konan Dios tan si Karniro. 11 Mampuliꞌ liꞌ tanan pirmi a asok nin apoy nin manꞌipamadyaꞌdyaꞌ konra nin kasan angga. Kai liꞌ gapo nin payꞌanen a pangingirangep ra sa yabi tan awro banaꞌ ta rinayo raya a makapaliꞌmon ayep tan si imahin na, tan nipamarka sara nin ngaran nan makapaliꞌmon ayep.”
12 Kanyaꞌ anaod nin matkap nin pagsenen ray nakem ra nin agwantawan ray idap nin saray tutawo nan Dios nin mantumulok sa gan-gan na tan mampagmatalek kona ni Jesus.
13 Ket, main nin narngeꞌ ko nin busis nin ibat sa langit a wana,
“Isurat moyti: Mangibwat ana sawanin, makarmaꞌ sara a mati nin naipasaya kona ni Jesus a syay Uunuren.”
“Peteg a tutuo in,” wanan Ispirito nan Dios. “Painawa sarayna sa pakapaidap ra tan tubaleen sarayna sa maabig a ginwa-ginwaꞌ ra.”
Say Pangyayatab sa Lutaꞌ
14 Ket anaod, main nin naꞌkit kon maputiꞌ nin gunem. Main anamaet nin nakatekreꞌ itaw nin say bakas na ket bilang nin tawo.g Main nin balitok nin kuruna na tan main nin gaꞌget nan matadem a agod.
15 Kaaram, main anamanan sakalakon anghil nin naꞌkit kon linumwaꞌ sa Sangkasantusan nin Lugar sa langit, ket wanan nitaꞌway nin maksaw kona nin nakatekreꞌ sa gunem, “Usaren mayna a agod mo tan mangyatab kayna, ta panaon anan pangyayatab ta matua anay yayataben itaw sa lutaꞌ.” 16 Ket sitaw si nakatekreꞌ sa gunem, inusar naya a agod na sa lutaꞌ ket nayadiꞌ a pangyayatab.
17 Ket, main anamanaet nin naꞌkit kon sakalakon anghil nin linumwaꞌ sa Sangkasantusan nin Lugar sa langit. Main anamaet nin gaꞌget nan matadem nin agod. 18 Kaaram, main anamanan anghil nin linumwaꞌ nangibwat sa altar. Siti a anghil nin mampamaga sa apoy. Nitaꞌway na konan anghil a main nin matadem nin agod, “Mangagod kayna, putyen moyna a sinurboy nin ubas sa lutaꞌ ta malutoꞌ ana.”
19 Ket si anghil, inusar naya a agod na sa babon lutaꞌ nin pinuti nay ubas. Miꞌsa saytaw say inagod na ket nibuntok nadtaw konan si paꞌsar ubot a pammespesan a say rabay nin ipatarusan ket say pangingirangep nin alakin sager nan Dios. 20 Ket anaod, nitalma-talmak nin pinespesan itaw sa rikor nan syudad taw say inagod. Ket mangibwat itaw sa ubot inmagos a dayaꞌ nin magtulunyasot a kilumitro a kadayꞌan tan say kaararman ket magliman pyi.h