13
Ket, naꞌkit koyan manꞌumarwas sa taawa a sayay makapaliꞌmon ayep. Pito ra a ulo na tan mapuloꞌ ray sara na. Say barang saya nin sara na ket main nin kuruna tan sa barang saya nin ulo na ket main nin naisurat nin titulo a panguꞌna-uꞌna konan Dios. 2 Sa bakas ket baraꞌmo ya nin leopardo, baleꞌ say ayi na ket baraꞌmon ayi nin usob tan si bebey na ket baraꞌmo yan bebey nin leon. Sitaw si dragon, binyan nayayti si makapaliꞌmon ayep nin kapangyadian na tan alakin pakayadiꞌ na nin magꞌuray. 3 Konan saya nin ulo nan ayep, main nin alakin sugat nin nipati nayayti kumon baleꞌ inmandaꞌ yan lamang. Kanyaꞌ nin nakaꞌngapan rayayti ngaꞌmin nin tutawo sa mundo ket nagsitumbok sara kona. 4 Tumwek saray sarban tawo konan dragon banaꞌ ta binyan nayan pakayadiꞌ a makapaliꞌmo nin ayep, tan rinayo rayan lamang a makapaliꞌmon ayep a wanra,“Kasa gapo nin makakipada konan si makapaliꞌmon ayep.
Kasa gapo nin makalaban kona.”
5 Inaburuyan nayan Dios a makapaliꞌmon ayep nin mipataꞌgay nin magꞌirgon panguꞌna-uꞌna kona, tan inaburuyan naya et nin magꞌuray sa luob nin aꞌpat a puloꞌ tan rway bulan. 6 Kanyaꞌ nin inusar naya a ngaran nan Dios nin kasan kanepegan na nin mangusar siti, nagꞌirgu-irgo yan dukaꞌ kuntra konan Dios tan konran saray mampiikapan na a saray itaw sa langit. 7 Inaburuyan yan kuntrawen nasara a tutawo nan Dios tan daegen nasara,c tan binyan ya et nin pakayadiꞌ nin magꞌuray sa sarba nin puri, dayaꞌ, saritaꞌ, tan nasyon. 8 Kanyaꞌ nin sarba ran tutawo sa mundo, tumwek sara konan makapaliꞌmon ayep, pwira saraytaw tamoꞌ saray tutawon say ngaran ra ket nakasurat itaw sa libron listawan ran saray magkamain nin anggan-angga nin byay a iti konan Dios. Baꞌyo ya et nin naparsa a mundo, nakalista anay ngaran ra sa libro nan Karniro nin pinatin nisakripisyo.
9 Siꞌkamo nin mampangrengeꞌ, tarusan moyoyti. 10 Saray naitalaga nin maipriso, maipriso sara liꞌ, tan saray naitalaga nin mapati nin ispada, ket peteg a mapati sara liꞌ nin ispada.d Edet, matkap ran itpel nin tutawo nan Dios a dyaꞌdyaꞌ nin naitalaga nin irangep ra tan dumaer sara nin magmatalek kona.
Si Makapaliꞌmon Ayep a Mangibwat sa Lutaꞌ
11 Ket, main anamana nin naꞌkit ko nin raruman makapaliꞌmon ayep nin linumwaꞌ sa lutaꞌ. Main nin rwa ray sara na nin kapadan sara nin karniro, baleꞌ say tunoy na, baraꞌmon tunoy nin dragon. 12 Main ngaꞌmin kona a pakayadiꞌ nan si uꞌnan makapaliꞌmon ayep tan manꞌusaren nayti nin ipagsirbi kona. Pinilit nasara a sarban tutawo sa lutaꞌ nin tumwek sara konan sitaw si uꞌnan makapaliꞌmon ayep nin si sugat na ket nipati naya kumon baleꞌ inmandaꞌ ya. 13 Siti si ikarwan makapaliꞌmon ayep, makapakaꞌngap a nangya-nangyadiꞌ a ginwaꞌ na. Napangyadiꞌ na et nin nanaboꞌ a apoy nangibwat sa langit ket nabantayan ran tutawo. 14 Kanyaꞌ nin nalingo nasara a tutawo sa mundo banaꞌ sa makapakaꞌngap nin nangya-nangyadiꞌ a inaburuyan nin nagwaꞌ na nin pagsisirbi na konan makapaliꞌmon ayep. Ginan-gan nasara a tutawo nin mangwaꞌ nin imahin nin pangraywan ra konan si uꞌnan makapaliꞌmon ayep a siti ket natagaꞌ yan ispada baleꞌ mabyay yan lamang. 15 Inaburuyan ya et a ikarwan makapaliꞌmon ayep nin byan nayan inanawa a imahin. Kanyaꞌ nin sa wanti ket makapagꞌirgo ya a imahin tan mansintinsyawan nasaran mati a sarba ran andiꞌ nin tumwek kona.
16 Siti si ikarwan makapaliꞌmon ayep. Pinilit nasara et a sarban tutawo, ataꞌgay a nikatawo o ayupaꞌ, mayaman o pubri, aripen o amboꞌ nin aripen, nin markawan sara sa wanan nin gamet o sa waleng. 17 Ket si siꞌnuman a kai mamarkawan nin ngaran nan uꞌnan makapaliꞌmon ayep o say numiro nin ngaran na, kai ya makapaglakoꞌ o makapanaliw.
18 Matkap a kadunungan ta pigaw nin matarusan yayti. Ket si tawo nin mautek, matarusan na a pipaꞌkaan nan sitin numiro nan ayep banaꞌ ta numiro yayti nin tawo. Siti nin numiro ket 666.e