Si Babayi tan Si Dragon
12
Ket main nin makapakaꞌngap nin naꞌkit sa langit nin sayti ket impurtanti a pipaꞌkaan. Main itaw nin sayay babayi a baraꞌmo nayan nisket a awro tan baraꞌmo yan nakatukdoꞌ konan bulan. Main nin kuruna nan labinrwa ray bituen.a 2 Mampangingar yayti nin mangabing kanyaꞌ nin man-gumuryaw ya sa irab tan idap.3 Ket main et nin makapakaꞌngap nin naꞌkit sa langit a sayti ket impurtanti a pipaꞌkaan. Anaod, main itaw nin alakin muꞌdit nin dragonb a pito ray ulo na tan mapuloꞌ ray sara nac. Barang saya nin ulo na ket main nin kuruna. 4 Rinapad na nin ikoy na a kakatlo nin bubituen ket naitampal ti sa lutaꞌ.
Miꞌsa nako ya nin inumdeng sa adapan nan babayin mampangingar nin mangabing ta pigaw nin kanen nayay anak nan siti eteng na tanan lumiwaꞌ. 5 Lalaki yay niyanak nan babayi. Ket eteng na tanan niyanak, main nin nanamsam nin nangikaꞌ kona konan Dios itaw sa kamiꞌnan na nin mampagꞌuray. Siti nin anak, sya liꞌ a magꞌuray sa sarba nin nasyon, tan mairot a pagꞌuuray na.d 6 Si babayi anamaet, nalayo yadtaw sa lugar nin pammasturan a nisadyaꞌ nan Dios para kona ta pigaw nin makumpuni yadtaw sa luob nin sanribo, rwanyasot tan aꞌnem a puloꞌ a awro.
7 Ket, nagkamain nin giradtaw sa langit. Si Miguele tan saray uanghil nin iti sa sirong na, kinaꞌ raya sinurong a dragon ket si dragon tan saray patumbok na linmaban sara. 8 Baleꞌ, si dragon tan saray patumbok na, natalo sara, ket pinalakwan rasaraynadtaw sa langit. 9 Kanyaꞌ anaod nin nitampal yayna tan saray uanghil nin patumbok na iti sa lutaꞌ. Siin si alaki nin dragon, syan lamang taw si ulayf sin nuꞌna a say nipangaran kona ket Satanas o Dimunyo. Sya a mampangibarang konran tutawo sa mundo.
10 Ket, main nin narngeꞌ kon maksaw nin busis itaw sa langit a wana,
“Nangyadiꞌ ana! Say pangingisalba nan Dios sa tutawo ket nailaꞌpos nayna. Narateꞌ anay awro nin nipaꞌkit nayna a pakayadiꞌ na nin magꞌuray; magꞌadiꞌ yayna. Wanin et a si tinudoꞌ na nin Cristo na ket nipaꞌkit nayna a kanepegan nan magꞌuray. Wanin ta si Satanas a sya mamparsawan nasara sa adapan nan Dios awro tan yabi a tutawo nin bubsat tamo, ket pinalakwan yayna sa langit. 11 Tinalo rayan bubsat tamo yupaꞌ sa dayaꞌ nan Karniro nin tinmuroꞌ sin pinati ya tan banaꞌ sa nipangipatandaꞌ ra sa katutuꞌwan. Anaod, kai ra nin ginurutan no kai edet, dinmaer sara sa pammemper ra mataman nin nakapatyan ra.
12 Kanyaꞌ nin siꞌkamon mampiikap iti sa langit, rumiga kamo! Baleꞌ siꞌkamo nin isen sa lutaꞌ tan sa taaw, sumalak kamoyna! Kadoꞌ kamoyna banaꞌ ta si Dimunyo ket kinmayupaꞌ yaynadsen komoyo, ket pinasya nin sager na ta tandaꞌ nan anted ana a udas na.”
13 Sin naamingaw nan dragon a manꞌitampal ya sa lutaꞌ, kinamat nayan patyen taw si babayi nin nangiyanak nin lalaki. 14 Baleꞌ binyan ya nin rwa ray pakpak nin agila a babayi ta pigaw nin makalpad yan makodtaw sa lugar nin pammasturan a nisadyaꞌ para kona. Kumpunyen yadtaw sa luob nin tulo tan kapikngaꞌ nin taon, ket si ulay a syaytaw si dragon kai naya nin mapaꞌno. 15 Sin wanin, namugso yan ranom nin umagos nin bilang ilog a ulay ta pigaw nin anuren naya a babayi. 16 Baleꞌ si lutaꞌ tinulungan naya a babayi; ninganga yayti tan inamil nay ranom a nipugso nan dragon. 17 Sa sager nan dragon konan babayi, binringan nasaran kinaꞌ kinalaban a raruma et nin aꞌnak nan babayi a saray sarba ran mantumulok sa gan-gan nan Dios tan manꞌipatandaꞌ ra a maipaꞌkaꞌ kona ni Jesus.
Si Makapaliꞌmon Ayep a Nangibwat sa Taaw
18 Ket nako yadtaw nin inumdeng a dragong sa rigrig nin baybay.