Saray Rway Magtistigos
11
Ket, binyan nakon si sayay anghil nin sayay anron baston nin ipanukat tan nibaritaꞌ na kongko, “Keen ma nin sukaten a ketegan nin si Sangkasantusan nin Lugar nan Dios tan si altar. Isakop mosara a mampangrayodtaw 2 baleꞌ andiꞌ moyna nin isakop a rikor nan masanton lugar banaꞌ ta naipudir anayti konran tutawon kai nin mangalilbiꞌ konan Dios. Italma-talmakb raya a Masanton Syudad sa luob nin aꞌpat a puloꞌ tan rway bulan.a 3 Baleꞌ ibakiꞌ kosara a lamang konra a rwa ray tistigos ko nin mamatutuo nin maipaꞌkaꞌ kongko. Langgutsic a seket ra tan sa luob nin saytin sanribo tan rwanyasot tan aꞌnem a puloꞌ a awro, ipata-patandaꞌ ra a ipatandaan ko konra.”4 Saraytin rwa nin mamatutuo, ket saray rwan tawo nin iti sa adapan nan Dios a syay Uunuren a magꞌuray sa intiron mundo. Sarayti ket saray nipadles a bilang rway kayon olibod. tan rwan pammatukduan nin lampadawan. 5 No main nin siꞌnuman a mangapes nin manusudi konra, lumiwaꞌ a apoy sa bebey ra ta pigaw nin puuran ya. Matkap yan patyen nin wanin a siꞌnuman nin manusudi konra. 6 Main nin pakayadiꞌ ran kai ya gapo nin parapegen sa leleg nin panaon ran mangipatandaꞌ nin nipatandaan nan Dios konra. Main et nin pakayadiꞌ ran pagbaliwen nin dayaꞌ a ranom sa susubor. Wanin et a lamang a main nin pakayadiꞌ ran dusawen saray tutawo a pangibwaten ran magkamain nin animan a klasi nin sarot sa kaꞌnuman a rabayen ra.
7 Ket saytaw liꞌ no nayadiꞌ rayna nin nipatandaꞌ a nipatandaan nan Dios konra, main liꞌ nin makapaliꞌmon ayep a umarwas itaw sa priswan nin ubot ket, labanan nasara. Ket talwen tan mapati nasara. 8 Ket say bangkay ra, itaw tana sa kalsada nan si bantog a syudad. Siti nin syudad ket masabtan yaynan lamang nin “Sodoma” tan “Egipto” tan itaw yan lamang nin nipasak sa kudos a Uunuren ra. 9 Sa luob nin tulo tan kapikngaꞌ nin awro ket keen ra kikit-kikiten nin tutawon mangibwat sa sarba nin dayaꞌ, puri, saritaꞌ tan nasyon, a bangkay ran itaw sa kalsada ket kai ti maaburuyan nin itabon. 10 Ket saray tutawo sa mundo, magpista sara nin miririga tan byan ran rigalo a saya tan saya banaꞌ sa ririket ra sa nikapati ran sarayti nin rway tistigos nan Dios. Wanin banaꞌ ta pinadyaꞌdyaꞌ rasaran maong nin saraytin rwa. 11 Baleꞌ mayadiꞌ a tuloy awro tan kapikngaꞌ, byan nasara liꞌ nin inanawa nin Dios ket mibangon saraynan mabyay. Ket sarba ra liꞌ nin makaꞌkit ket pinasyan liꞌmo ra. 12 Kaaram, main liꞌ nin marngeꞌ ra nin busis mangibwat sa langit a wana konra, “Muliꞌ kamodti.” Ket iyuliꞌ sara sa langit nin iti sa gunem a mabantayan ran kalaban ra. 13 Sa sain, rumayon nin pinasyan kasaw ket masidaꞌ a kakapuloꞌ nan syudad tan pitunribo saray mati. Pinasyan liꞌmo ran saray mabatiꞌ nin nabyay ket itandudoꞌ rayay ngaran nan Dios a mampagꞌuray nin mangibwat sa langit.
14 Ket sain a ikarwan makapaliꞌmo nin dyaꞌdyaꞌ. Baleꞌ anaod, saya et a sumunor anan mangyadiꞌ.
Pinatnoy yay Trumpita nin Taranaꞌ nin Ikatlon Makapaliꞌmo nin Dyaꞌdyaꞌ
15 Kaaram, pinatnoy nayan ikapiton anghil a trumpita na ket main nin narngeꞌ nin maksaw nin busis itaw sa langit a wanra,
“Mangibwat sawanin, kasaynan raruman magꞌuray sa mundo
no kai si Uunuren tamo tan si tinudoꞌ nan Cristo.
Magꞌadiꞌ ya anggan-angga.”
16 Ket, saray rwampuloꞌ tan aꞌpat a pupangulo nin nakatekreꞌ sa adapan nan Dios, linmukbob sara tan rinayo rayay Dios 17 a wanra,
“Uunuren a Dios a Makapangyayadiꞌ sa sarba, a
siꞌka ket main kayna sin saytaw et sin taranaꞌ, tan main ka et sawanin,
kisalamatan mika ta
inusar moy makapakaꞌngap a pakayadiꞌ mo,
tan tinmaranaꞌ kaynan mampagꞌuray sa lutaꞌ.
18 Saray kuntra komo ket pinasyan sager ra komo,
baleꞌ narateꞌ ana a panaon nin ipaꞌkit mo a makapaliꞌmo nin sager mo konra,
tan say panaon a sintinsyawan mosara a nunati ana.e
Sawanin anan lamang a panaon a gun-gunawan mosaray uaripen mo
a saray prupita mo tan saray tutawo mo. Sarayti ket mampangigalang sara komo,
ataꞌgay o ayupaꞌ sara man.
Sawanin anan lamang a panaon a sidaen mosara a
sarba ran nanidaꞌ nin tutawo sa sangkamundwan.”
19 Ket naabryan yay Sangkasantusan nin Lugar nan Dios itaw sa langit, ket naꞌkit yadtaw a kaban nin nangwan nin kataratwan. Kapingmatan, kinmidla-kidlap a kimat, ryawryawan, nararkib a kudor, rinmayon tan rinmapeg nin gulpi nin yilo.