Si Anghil tan si Daikleng a Kasuratan
10
Ket, main nin naꞌkit kon sayay sakalakon makapangyayadiꞌ nin anghil a kinmayupaꞌ nangibwat sa langit. Nabarkot ya nin gunem tan main nin kabunlalakaw sa ulo na. Say rupa na ket sumlag nin bilang konan awro tan say bisit na ket baraꞌmon tuꞌdek nin mandumta. 2 Main nin gaꞌget nan daikleng nin kasuratan a kai nin linulon. Nitukdoꞌ nayay wanan nin ayi na sa taaw tan si wirin ayi na sa lutaꞌ. 3 Tinmaꞌway ya nin maksaw ket say busis na baraꞌmo nin ngernger nin leon. Ket nararkib a pito ray kudor a inumbat.4 Isurat koyna kumon a nibaritaꞌ nin kudor baleꞌ main nin narngeꞌ kon busis nin ibat sa langit a wana, “Misasaet ka maipaꞌkaꞌ sa nibaritaꞌ nin kudor; andiꞌ mo nin isurat.”
5 Ket, sitaw si anghil nin manꞌumdeng sa taaw tan sa lutaꞌ, nitaꞌgay naya a wanan nin gamet na 6 nin pangisamba sa adapan nan Dios a mabyay anggan-angga nin namarsa nin kalangitan tan lutaꞌ tan nin taaw tan say sarba nin iti sa sayti, a say ibaritaꞌ na ket tutuo. Wana, “Kai nayna nin ipaꞌte-paꞌtenga et nin Dios a plano na, 7 no kai edet, no patnuyen nayayna liꞌ nin ikapiton anghil a trumpita na, ilaꞌpos naynan Dios a plano na a nipatandaan na konra nin prupita nan mampagsirbi kona baleꞌ niyadi na a pipaꞌkaan.”
8 Ket, narngeꞌ koyaytaw anamana si busis nin ibat sa langit a wana kongko, “Keen ma kalapen konan siin si anghil nin manꞌumdeng sa taaw tan sa lutaꞌ a kasuratan nin kai nalulon.”
9 Ket, nako ako konan anghil tan dinawat koya kona a daikleng nin kasuratan. Ket, wana kongko, “Kalapen ma tan kanen ma. Masamꞌit ya nin baraꞌmon inatip mintras a iti ya et sa bebey mob. baleꞌ kumait ya no itaw yayna sa rarem nin tyan mo.”
10 Kinalap koya anaod a daikleng nin kasuratan tan kinnan koya. Masamꞌit ya anaod nin baraꞌmon inatip sin iti ya et sa bebey ko, baleꞌ sin inamil koyayna, sinmakit ya sa pait a tyan ko. 11 Kayadiꞌ, main nin namaritaꞌ kongko a wana, “Matkap a mangipadles ka anamanaet nin maipaꞌkaꞌ sa mangyadiꞌ liꞌ konran tutawo sa nagsikabarang a nasyon, saritaꞌ, tan konran uadiꞌ.”