9
Kaaram, pinatnoy nayan ikaliman anghil a trumpita na ket main nin naꞌkit kon bituena nin nanaboꞌ sa lutaꞌ a nangibwat sa langit. Nibi ya kona a tumbok nin nipangabri konan priswan nin ubot nin pinasyan kaararmanb.2 Ket, sin inabryan naya a priswan nin ubot, linumwaꞌ a pinasyan kubpal nin asok a bilang asok nin alakin pugon. Nasalimbengan yan sayti a awro ket dinmedlem ya tan say kalangitan.
3 Mangibwat sa asok ket main nin linumwaꞌ nin abaw a dudon ket dinumpaꞌ sarayti sa intiron mundo. Binyan saran pakababaꞌ nin manurot nin bilang sipitan. 4 Ginan-gan saran andiꞌ ra nin sidaen a rabot, say kakayo tan raruma et nin tinmuboꞌ sa lutaꞌ, no kai saray risgwen ra tamoꞌ ket saray tutawon kai nin namarkawan sa waleng nin marka nan Dios. 5 Kai saraynamaet inaburuyan nin patyen rasarayti nin tutawo no kai edet, padyaꞌdyaen rasara sa luob nin limay bulan. Say irab nin ipamadyaꞌdyaꞌ ra ket kapada a irab nin surot nin sipitan. 6 Kanyaꞌ nin sa saytaw liꞌ nin panaon, rabay raynan maong a mati baleꞌ kasan magwaꞌ ra. Mipati sara kumon, baleꞌ palꞌisan sara nin patiti.
7 Sarayti saray dudon, say bakas ra ket bilang kabayo nin nipriparan mako kigira.c. Main nin baraꞌmon kuruna ran balitok sa ulo. Say rupa ra ket baraꞌmon rupan tawo. 8 Say sabot ra ket anro a baraꞌmon sabot nin babayi, tan say ngipen ra ket baraꞌmon ngipen nin leon. 9 Sa kerep ra ket main nin salimbeng nin baraꞌmon kalasag nin pasak, tan say tunoy nin pakpak ra no lumpad sara ket baraꞌmon kalanakang nin bikoy nin abaw a karwahin man-guruyen nin kabayon mampalayon mako kigira. 10 Main nin ipanurot ra sa ikoy ra nin bilang sa ipanurot ran sipitan a sayti a kamiꞌnan nin pakababaꞌ ran mamadyaꞌdyaꞌ nin tutawo sa luob nin limay bulan. 11 Main nin adiꞌ ra nin sitaw si anghil nin mampagꞌuray konan priswan nin ubot a pinasyan kaararman. Say ngaran na sa saritaꞌ nin Hebreo ket Abadon tan sa saritaꞌ nin Griego ket Apolion, a say rabay nin irgwen ket Mannidaꞌ.
12 Ket nayadiꞌ ana a uꞌna nin makapaliꞌmo nin dyaꞌdyaꞌ. Baleꞌ anaod, rwa et a rumateꞌ.
Pinatnoy yay Trumpita nin Taranaꞌ nin Ikarwan Makapaliꞌmo nin Dyaꞌdyaꞌ
13 Kaaram, pinatnoy nayan ikaꞌnem nin anghil a trumpita na ket main nin narngeꞌ ko nin busis a nangibwat sa aꞌpat a duyo nan balitok a altar sa adapan nan Dios. 14 Wanan busis konan ikaꞌnem nin anghil, “Keen mosara warwaran a aꞌpat nin anghil nin nitaker itaw sa banda nan alakin Ilog Eufrates.” 15 Ket binulusan saray aꞌpat nin anghil banaꞌ ta talagan nisadyaꞌ sara para konan sitin taon, bulan, awro tan udas ta pigaw nin patyen rasaray kakatlo nin tutawo sa mundo. 16 Nibaritaꞌ kongko no umno ray nakakabayo a sundaloꞌ ra; rwanyasot a milyon sara.
17 Ket wanti a bakas ran kabayo tan saray nakakabayon nipaꞌkit kongko a bilang taynep: Saray nakakabayo, say kalasag ra sa kerep ket tuloy kulor; main nin muꞌdit nin kulor apoy, main nin asol nin kulor nin mablin bato a mantawagen nin sapiro, tan main nin masilyaw nin kulor asupri. Say ulo ran kabayo ket baraꞌmon ulon leon, ket mangipugso sara nin apoy, asok tan asuprid. 18 Kakatlo nin tutawo ket nati banaꞌ sa sayti nin makapati nin bubagay a say apoy, asok tan asupri nin ipugso ra. 19 Say pakababaꞌ ran mangmati nin saraytin kabayo ket sa bebey ra tan sa ikoy ra ta say ikoy ra ket baraꞌmon ulay nin main nin ulo nin usaren ran ipananakit nin tutawo.
20 Baleꞌ saray tutawo nin nabatiꞌ nin nabyay nin kai nati sa saytin makapaliꞌmon dyaꞌdyaꞌ, kai ra et nin nagbabawian a dukaꞌ a gawaꞌ ra. Ituloy ray mangrayo nin dimunyo tan nin dios-dios a ginwaꞌ ran diri mangibwat sa balitok, pirak, gansaꞌ, bato tan kayo. Saray dios-dios, kai sara nin makaꞌkit, kai nin makarngeꞌ tan kai nin makalalako. 21 Wanin a lamang a kai ra et nin nagbabawian nin tutawo a dukaꞌ a man-gawꞌe-gawꞌen ra bilang say pangmamati, say pangangamod, say pakiraray-raray ran amboꞌ nin manepeg, tan say pananakaw ra.