Say Panglat konan Ikapiton Silyo
8
Sawanin, sin ginlat naya nin Karniro a ikapiton silyo sa nalulon a kasuratan, nititinek a sarba nin itaw sa langit sa luob nin kapikngaꞌ udas. 2 Kaaram, naꞌkit kosara a pito nin anghil nin manꞌumdeng sa adapan nan Dios. Binyan sara nin pito ray trumpita.3 Ket, main nin sakalakon anghil nin rinmateꞌ a main nin gaꞌget nan balitok a pangangwan nin insinso. Ket nako ya tan inumdeng yadtaw sa balitok nin altar sa adapan nan Truno. Abaw a insinson nibi kona nin idaꞌton nadtaw sa altar, nin kalamoꞌ a dudasala ran sarba ran tutawo nan Dios. 4 Ket say asok nin insinson itaw sa gaꞌget nan anghil, kalamoꞌ a dudasal ran tutawo nan Dios nin nuliꞌ sa adapan nan Dios. 5 Ket, si anghil, pinnoꞌ nayan mandumtan baya nin nangibwat sa altar a pangangwan nin insinso, miꞌsa naya nin nibasyo sa lutaꞌ. Kapingmatan, kinmudor nin maksaw, ryawryawan, kinmidla-kidlap a kimat tan rinmayon.
Say Nipamatnoy nin Say Primiron Aꞌpat a Trumpita
6 Mayadiꞌ in, saray piton anghil ket nisadyaꞌ ran patnuyen a trumpita ra.
7 Anaod, pinatnoy nayan uꞌnan anghil a trumpita na, ket rinmapeg nin yilo tan apoy nin main nin kalamoꞌ nin dayaꞌ.b Ket napuuran a kakatlo nan lutaꞌ tan kakatlo nin kukayo tan say sarba nin rarabot.
8 Kaaram, pinatnoy nayan ikarwan anghil a trumpita na ket main nin baraꞌmon alakin talugtog nin mangkapuuran a ninaboꞌ sa taaw. Ket say kakatlo nin ranom sa baybay, nagꞌin nin dayaꞌ, 9 tan say kakatlo nin say mangkabyay sa taaw ket nati, tan say kakatlo nin say ruran sa taaw ket nasidaꞌ.
10 Kaaram, pinatnoy nayan ikatlon anghil a trumpita na ket main nin bituen nin baraꞌmon burung-burong nin tyoꞌ a naragrag nangibwat sa langit nin nanaboꞌ sa kakatlo nin uilog tan susubor nin ranom. 11 Say ngaran nan siti nin bituen ket Kapaitan. Edet say kakatlo nin raranom, kinmait, ket abaw saray tutawo nin nati sin nainom rayti.
12 Kaaram, pinatnoy nayan ikaꞌpat nin anghil a trumpita na ket naapiktawan nay kakatlo nan awro, nan bulan tan nin bubituen kanyaꞌ nin naglat a kakatlo nin palaway ra. Kanyaꞌ nin pinasyan dedlem nin kakatlo nin awro tan kakatlo nin yabi.c
Pinatnoy yay Trumpita nin Taranaꞌ nin Primiron Makapaliꞌmo nin Dyaꞌdyaꞌ
13 Kinmikit ako anamana ket main nin naꞌkit kon sayay agila nin manlumpad nin ataꞌgay sa kalangitan. Narngeꞌ ko a wanan nitaꞌway, “Makapaliꞌmo! Makapaliꞌmo!d Undoꞌ ana liꞌ a kapapaꞌsar ran sarba ran itaw sa mundo no patnuyen raynan tulo ra et nin anghil a trumpita ra.”