Main sara liꞌ Isen komoyo a Mibaluꞌ-baloꞌ a Tutuon Mangangakay sara
2
Wanin man, sin nuꞌnan panaon, main saraytaw a lamang saray nibaluꞌ-baloꞌ a prupita nasara nin Dios a nangipatandaꞌ konran tutawo nan Dios. Wanin anamaet a lamang, main sara liꞌ a masirib nin mangyakay nin bulaꞌ-bulaꞌ isen sa dupong moyo. Say iyakay ra ket makasidaꞌ konran mammemper. Pati si Uunuren a Jesus nin syay nipambot konra, kai raya nin alilbien ket, bigraꞌ sarayna liꞌ nin madusan maong. 2 Wanin man, abaw sara et liꞌ a lamang a mangarig sa kabibyay ran kasan pagdadangkaꞌ. Ket banaꞌ konran sarayti, say dalan nin pagkabyay a naipatukdoꞌ sa katutuꞌwan a mangibwat konan Dios ket mapadukaꞌ. 3 Sarayti nin mampangyakay nin bulaꞌ-bulaꞌ, maagom sara sa kwarta. Ket, kwartawan rakamo yupaꞌ sa pinabrika ran bulaꞌ-bulaꞌ a iyakay ra komoyo. Baleꞌ si Dios a syay manusa konra, kai ya nin mampaꞌlek ta sinintinsyawan nasarayna nin naꞌteng ket say dusa ra nakasadyaꞌ ana.4 Tandaꞌ tamo nin wanin banaꞌ ta mataman nin saray uanghil nin sinmubag sin nuꞌnan panaona, ket sinintinsyawan nasarayna nin Dios. Nibantak nasaran mangkaprisodtaw sa sangkadedleman anggan say awro a dusawen nasara ket marateꞌ. 5 Kai nasarayna anamaet nin kinaꞌdwan nin Dios a tutawo sin nuꞌnan panaon nin gumu-gumwaꞌ nin dukaꞌ. Linanip naya a intiro nin mundo ket nirebreb sara. Baleꞌ, si Noe a sya niyakay na a matkap nin magkabyay sara nin mapteg, ket nisalba naya tan main et nin pito ray kalalamoꞌ na.b
6 Tandaꞌ tamo nin lamang a si Dios, sinintinsyawan nan pinuuran a syudad nin Sodoma tan Gomorrac anggan nagꞌin nin abunsyang. Ginwaꞌ na in nin Dios ta pigaw nin ipaꞌkit na konran saray gumu-gumwaꞌ nin dukaꞌ a kaugutan ra. 7-8 Itaw ya anamaet nin niikap si Lot. Sya, sayay mapteg nin tawo ya nin inawru-awro nin mabereng tan mangkapaidap a nakem banaꞌ sa kasan pagdadangkaꞌ tan masubag a gawaꞌ-gawaꞌ ran tutawodtaw nin mangkaꞌkit tan mangkarnge-karngeꞌ na. Say katutuꞌwan ket niligyas naya nin Dios. 9 Ipaꞌkit edet nin sain nin nangya-nangyadiꞌ a, si Uunuren, tandaꞌ nasara nin tulungan a tutawo nin mantumulok kona a mangkasubok. Tandaꞌ nasara anamaet nin pukpukan para sa pakadusa ra anggan sa awro a sintinsyawan nasara a tutawon gumu-gumwaꞌ nin dukaꞌ, 10 lalun-lalo sarayna a mampanumbok sa dukaꞌ a kaririktan nin lalaman ra tan saray kai nin mangibilang sa main nin pakauray.
Say Pigagawaꞌ ran saray Mampangyakay nin Bulaꞌ-bulaꞌ
Sarain saray mampangyakay nin bulaꞌ-bulaꞌ, gawꞌen rayna anabungat a animan nin rabay ra tan mabirngas sara. Kai sara nin maliꞌmon magꞌirgon kai nin pammaga-baga mataman konra nin makapangyayadiꞌ nin pupinarsadtaw sa langit. 11 Amboꞌ nin bilang konran sarain, saray uanghil nan Dios nin mas ataꞌgay tan makapangyayadiꞌ dyan sarain, ket kai sara gapo nin magꞌirgo nin dukaꞌ a kuntra konran sarayti nin makapangyayadiꞌ nin pupinarsadtaw sa langit sa adapan nan Dios.d
12 Sarayti nin mampangyakay nin bulaꞌ-bulaꞌ, baraꞌmo saran uayep nin kasan nakem nin gawꞌen rayna anabungat a karabayan nin lalaman ra. Tuyaꞌ-tuyaen ra a bubagay a kai ra nin maabot. Kapada rasaran uayep a say kaugutan nin byay ket si dakpen ta pigaw nin patyen, ta sain anamaet a kaugutan ran sarain a mangangakay, 13 si pangirangepen sara nin dyaꞌdyaꞌ a syay manepeg nin tubaleꞌ konra banaꞌ sa nipamadyaꞌdyaꞌ ra konran raruman tawo. Mataman nin awro ta awro, kai sara nin madingꞌey nin mangwaꞌ nin animan a dukaꞌ nin kaririktan nin lalaman ra, a sain a karigawan ra. Maiyarig sara sa mansa nin makasidaꞌ nin bakas nan sayay maringgas nin aysing banaꞌ ta, mataman no mangkidungu-dungo sara komoyo ket, kaririktan ran sidaen a pakairaywan moyo banaꞌ sa pangituluy-tuloy ra nin gawaꞌ-gawaꞌ ran nikasamaꞌ.e 14 Apesen rasaray sarba ran bubbayi nin maꞌkit ra, tan kai sara gapo nin mapdaꞌ nin mangwaꞌ nin dukaꞌ. Ayaten rasara et nin mangwaꞌ nin nikasamaꞌ nin gawaꞌ-gawaꞌ ra a makapoy a pammemper. Inaagom a tandaꞌ ra. Nigagaem nasarayna nin Dios! 15 Linmakwan sara konan kuston dalan ket natawtaw sarayna. Manꞌarigen ra a gawaꞌ-gawaꞌ na intaw ni Balaam a anak na ni Beor, a nangwa-nangwaꞌ yan dukaꞌ banaꞌ sa nipangapes na sa kwarta.f 16 Baleꞌ kinasagran naya nin asno nin manruranan na sa dukaꞌ a gawaꞌ na. Sitin sayay basta nin ayep, nagꞌirgo ya nin bilang sayay tawo ta pigaw nin paeden nay man-gawꞌe-gawꞌen na ni Balaam a pananantigwa a bilang sayay kasan nakem a tawo.
17 Para konran sarayti nin mampangyakay nin bulaꞌ-bulaꞌ, main ana nin sangkadedleman nin lugar a nisadyaꞌ nan Dios nin priswan ra ta bilang sara nin sayay naꞌtyan nin subor, o gunem a mami kumon nin rapeg baleꞌ kai ta nilpad nan siri.g 18 Anaod, abaw a ibari-baritaꞌ ra nin mabistan rengꞌen baleꞌ kasan lamang nin kabalikasan. Manꞌiyakay ra a amboꞌ nin dukaꞌ nin tumbuken a kaririktan nan lalaman, ket sayti a manꞌipangayat ra konran saray nadaliꞌ ra et nin ginurutan a dukaꞌ nin gawaꞌ-gawaꞌ. 19 Manꞌipasigurado ra et a no tumbuken ra nin tutawo a manꞌiyakay ra, magkamain sara nin pagkanawanawa nin mangimey sa rabayen ra, baleꞌ kasa nin pagkanawanawa ran diri nin saraytin mampangyakay banaꞌ ta kai sarayna nin makaglat sa dukaꞌ a gawaꞌ-gawaꞌ ra nin manidaꞌ konra. Tandaꞌ tamo a si sayay tawo anaod ket aripen ya nin animan a mampangitawir kona. 20 Ket mataman no ginurutan raynaytaw intaw say dukaꞌ nin gawaꞌ-gawaꞌ a gindat nin man-gawꞌen ran tawodti sa mundo banaꞌ ta nakatandaꞌ rayayna si Jesu-Cristo a Uunuren tan Mangingisalba tamo, baleꞌ ta nadaeg sara tan sinmubliꞌ saran naaripen anamanaet nin sayti, mas masakit et a kapapaꞌsar ra dyan sin nuꞌna. 21 Wanin ta maong ana kumon a kai raya nin nadumog a dalan nin mamagꞌin nin mapteg konan sayay tawo, dyan si tinumbok rayaynayti kaaram ket ginurutan ra a bibilin nan Dios maipaꞌkaꞌ sa pagkabyay nin niyakay konra. 22 Sa wanin a nangyadiꞌ konra, maꞌkit a katutuꞌwan nin sayti nin wanran tutawo,
“Si sayay aso, kanen nan uman a nisuka na,”h tan
“Si baboy nin pinaryoꞌ ana, maglumaꞌ ya liꞌ anamana.”