Si nanurat konan sitin surat ket si Juan nin saya konran apostoles na ni Jesus nin nikikalamoꞌ kona sin iti ya intaw sa lutaꞌ. Sinurat naya sin angan-angan a taon 90 A.D., a sa angan-angan ket aꞌnem a puloꞌ a taon anay linmabas nangibwat sin naipasak ya sa kudos si Jesus, tan rwampuloꞌ tan lima a taon anay linmabas a nati sarayna si Pablo tan Pedro. Manꞌipaꞌkaꞌ a nipaꞌwit nayayti ni Juan nin surat na sa dudupong nin mammemper itaw sa prubinsyan Asia sin itaw ya nin mampiikap sa Efeso.

Sitin uꞌnan surat na ni Juan ket main nin rwa ray gagara na: Rabay nan pagsenen a nakem ran mammemper, sa wanin ket magkabyay saran naikalamoꞌ konan Dios tan konan Anak na. Rabay nasara et nin bibilinen a dumaer sara sa katutuꞌwan a niyakay konra tan andiꞌ sara nin palingo konran mampangyakay nin amboꞌ nin tutuo maipaꞌkaꞌ kona ni Jesu-Cristo, banaꞌ ta sarayti a mampanidaꞌ nin mabistan uksoy ran mammemper. Manꞌiyakay ran sarayti a sarban matiryal nin bubagay iti sa mundo pati say lalaman nin tawo ket dukaꞌ. Kanyaꞌ nin manꞌiyakay ra nin impusibli kano a si Jesus a syay Anak nan Dios ket nagꞌin ya nin peteg nin tawo. Manꞌipaꞌkaꞌ ran saraytin mangangakay a say pakaisalba ket mangibwat sa kasa nin pakibiang sa kabibyay iti konan sitin mundo; tan manꞌiyakay ra et a kasa gapo nin kabiangan nin pakaisalba sa kabistawan nin ugaliꞌ o sa adoꞌ sa kapadan tawo.

Rabay nan kuntrawen ni Apostol Juan a manꞌiyakay ra, kanyaꞌ nin pinatutuꞌwan na a si Jesu-Cristo ket nagꞌin yan peteg nin tawo, tan rabay nan ipapalaway a sarba ran mamper kona ni Jesus tan mampangadoꞌ konan Dios ket matkap anamaet nin kawaꞌnanen rasaray kapada ran tawo.