3 Siti a muꞌna-muꞌna nin ipapanemtem ko komoyo: Sa saytin panaon nin adapen nayna a sumubliꞌ nin Uunuren tamo, saray tutawon man-gawꞌen rayna anabungat a dukaꞌ a kaririktan nin lalaman ra ket tuyaꞌ-tuyaen ratamo 4 a wanra, “Kai para a nipangakoꞌ na ni Jesus a sumubliꞌ ya? Adti ya edet? Nati-nati saraynay pupuon tamo ket kai ya et a lamang nin sinmubliꞌ! Nangibwat sin naparsa yay mundo ket pariho et a lamang anggan sawanin!”

5 Baleꞌ saray tutawo nin mampamaritaꞌ nin wanin, man-gagarawen ran kai nin mampanemtemen taw say ginwaꞌ nan Dios sin naꞌteng anan panaon. Si Dios, inirgo na tamoꞌ ket nagkamain ana a langit tan lutaꞌ. Nangibwat sa nipangusar na nin ranom, ket linumwas a lutaꞌ sa ranom. 6 Ket ranom a lamang a inusar nan Dios, si alakin lanip, sin sinidaꞌ naya a mundo sin nuꞌnan panaon. 7 Anamanaet, sa pakayadiꞌ nin nibalikas nan susaritaꞌ nin Dios, nisadyaꞌ na anayti say kapresan nin lutaꞌ tan langit nin mapuuran liꞌ no marateꞌ a awro nin sintinsyawan nasara nin madusa a tutawon kai nin nangunor kona.

8 Manꞌaduen kon bubsat, mataman no tuyaꞌ-tuyaen ratamo nin wanin, andiꞌ tamo nin lingwanan a, konan Dios, say kaanrwan nan sayay awro ket parihoynan lamang sa kaanrwan nin sanribon taon, tan say sanribon taon ket parihoynan lamang sa sayay awro tamoꞌ.^a 9 Kanyaꞌ nin mataman nin wanra nin raruma ket kai nan lamang nin tukiden a nipangakoꞌ na, amboꞌ nin wanin, no kai edet, si Dios, manꞌanusan nakamo ta pigaw nin pagbabawian tan gurutan moyoynay pagkakasalanan moyo. Wanin ta say rabay na ket si kasa gapo ni saya kumon nin maikaꞌ sa impyirno.

10 Baleꞌ sigurado a sumubliꞌ ya a Uunuren tamo. Ket say irarateꞌ na ket kapada a irarateꞌ nan sayay mannakaw a bigraꞌ tan kai nin tandaꞌ no kaꞌno. No saytaw liꞌ nin panaon, makasa a kalangitan nin kaaluyon a makapaliꞌmo nin maksaw nin danurdor. Si awro, si bulan tan say bubituen ket tunawen liꞌ nin apoy, ket si lutaꞌ tan say sarba nin iti kona, maipadar liꞌ nin sarba sa pangungukom nan Dios^b.

11 Anaod ta tandaꞌ moyoyna a say sarba ket makasa liꞌ nin wanin, asikaswen moyo a pagkabyay moyo! Matkap nin italaga moyoyna a kadiryan moyo konan Dios tan magkabyay kamo nin maikanaꞌ kona 12 nin mantagaꞌnan tan mampaapurawen moyoynan rumateꞌ in a panaon nan Dios nin sintinsyawan na a sarba nin tawo. Peteg anaod a konan sitaw liꞌ nin panaon, mapuuran a kalangitan tan say sarba nin itaw ket tunawen nin apoy. 13 Baleꞌ siꞌtamo, mantagaꞌnan tamo a tukiden nan Dios a nipangakoꞌ na, ket magkamain liꞌ nin baꞌyon kalangitan tan baꞌyon lutaꞌ, a sarba ra nin miikap itaw ket mapteg a pigagawaꞌ ra.

14 Anaod bubsat, mintras a mantumaꞌgan kamo konan siin a awro, gawꞌen moyo a mababaꞌ moyo a malinis kamo nin kasa gapo nin pakabalawan moyo sa adapan nan Dios tan ta pigaw nin makakituno kamo kona. 15 Panemtemen moyo a kanyaꞌ nin manꞌumanos ya a Uunuren ket banaꞌ anaod ta mambyan nasaray tutawo nin pagkanawanawa nin maisalba.

Say maipaꞌkaꞌ a lamang sa sayti a wana ni manꞌaduen tamon busat a si Pablo sa surat na komoyo mangibwat sa pakatandaꞌ a nibi nan Dios kona. 16 Sa sarba nin surat na ket main nin nibaritaꞌ na maipaꞌkaꞌ sa nibaritaꞌ kodti. Oꞌ, main taw anaod say maidap nin tarusan nin nisurat na. Ket, saray tutawo nin kurang a pakatandaꞌ ra kona ni Cristo tan amboꞌ sara et nin madaer sa pammemper ra, sinilya-silyan ran abas a katarusan nin bilang sa gawaꞌ ra sa raruman itaw sa Masanton Kasuratan. Ket banaꞌ sa wanin a man-gawꞌen ra, mampangibwaten ray pakadusa ran diri.

17 Baleꞌ siꞌkamo, bubsat, nipau-pauꞌna koyna komoyo a maipaꞌkaꞌ sa sain. Edet, pakatalad kamo ta bangliꞌ no maibarang rakamon saraytin tutawon mataktika yupaꞌ sa abas a manꞌiyakay ra ket maisyay kamo sa katutuꞌwan nin no adti ket madaer kamoyna. 18 Say maabig ket si lamuꞌnan moyo a mabistan gawaꞌ-gawaꞌ moyo nin pakaꞌkitan nin kamaungan na ni Jesu-Cristo a syay Uunuren tan Mangingisalba tamo. Lamuꞌnan moyo et a lamang a pakatandaꞌ moyo kona.

Itandudoꞌ yay ngaran na sawanin tan anggaynan-angga!