Sitin surat, sinurat naya ni apostol Pedro para konran mammemper kona ni Jesu-Cristo nin niikap sa limay prubinsya sa Asia Minor (sakop na sa panrupan nin nasyon nin Turkey sawanin). Sinurat naya sin sa angan-angan ket kataranaꞌ nan taon a A.D. 60. Si sangkaimpurtantiwan a tuloy nin gagara nan si nanurat ket si pagsenen nay kaisipan ra banaꞌ ta mangkapai-paidap saraynan tuloy banaꞌ sa pammemper ra (4:19). Kanyaꞌ nin nipapanemtem na konra a sangkabistawan nin ilalo a mangibwat sa patiti, sa isusubliꞌ nin mabyay tan sa kasusubliꞌ na liꞌ iti ni Jesu-Cristo, banaꞌ ta tandaꞌ na a no say kaisipan ra ket naipatyoꞌ sa say manꞌilalwan ra nin itaw sa langit, mababaan ran itpel a pangingirangep ran uidap. Nipapanemtem na anamaet konra a manepeg nin magkabyay saran maitukoy sa karabayan nan Dios, a pusisyon ra bilang tutawon piniliꞌ nan Dios, a paisirong sara konran saray magꞌuray konra nin mantumbuken ray alimbawaꞌ nin nipangirangep na ni Cristo, a pigagawaꞌ ra nin manꞌisipen ray panaon nin susuyot, tan a dumaer sara nin pakagsen sa pammemper ra.