Surat koyayti komoyo nin piniliꞌ nan tutawo nan Dios a nataboy nin nako nin niikap sa amboꞌ moyon lugar nin diri itaw sa prubinsya ran Romano a Ponto, Galacia, Capadocia, Asia tan Bitinia. 2 Si Dios nin Ama, piniliꞌ nakamoyna nin gindat para sa gagara na a gawꞌen nakamo nin si Ispirito na, nin naipurok a uaꞌnak nan Dios. Piniliꞌ nakamo anaod ta pigaw nin tumulok kamo kona ni Jesu-Cristo tan, ta pigaw nin maringgasan kamon dayaꞌ^c na ni Jesu-Cristo ta pigaw nin maikanaꞌ kamo konan Dios.

Sapa kumon ta si Dios ket lalo na et nin ipaꞌkit a bindisyon na komoyo tan lalo nan pabistawen a kapapaꞌsar moyo.

3 Raywen tamoya a Dios a syay Dios tan Ama nan Uunuren tamon si Jesu-Cristo! Wanin ta sabtan ingangaꞌdo na a, nangibwat sa nipamasubliꞌ nan mabyay kona ni Jesu-Cristo, ginwaꞌ nan paꞌsar naiyanak atamo sa byay a iti kona. Ket sigurado a pangingilalo tamo sa sitin byay. 4 Nigagara na anamaet nin ibi liꞌ kontamoytaw say niyator naynadtaw sa langit nin para kontamo. Sayti, kasa nin pagkurangan, kai nin masidaꞌ tan kai nin manguman. 5 Niyator nayti nin Dios para komoyon manꞌiyawaꞌ nin pakayadiꞌ na banaꞌ sa pagmamatalek moyo kona ni Cristo. Manꞌiyawaꞌ nakamo ta pigaw nin kiramaꞌ kamo liꞌ sa bungan pangingisalba na a nisadyaꞌ nayna tan ipadar nayna liꞌ no anggawan anan panaon.

6 Ket, rumiriket kamon maong! Wanin anaod mataman no magwaꞌ a mangirangep kamo yapoꞌ nin nagsikabarang nin dyaꞌdyaꞌ sa anted nin panaon. Matkap a wanin 7 ta pigaw nin mapalaway nin maꞌkit a tutuo a pagmamatalek moyo. Mas mabli a pagmamatalek moyo dyan say balitok a, mataman no ipadalan sa apoy ta pigaw nin maꞌkit no puro, kai et lamang nin magnayon. Ket no maꞌkit nin tutuo a pagmamatalek moyo, raywen, itaꞌgay tan pagalangan nakamo liꞌ nin Dios no maipadar yayna si Jesu-Cristo. 8 Abirno nin kai moya et gapo nin naꞌkit, kawaꞌnan moya. Mampagmatalek kamo kona mataman no kai moya nin mangkaꞌkit sawanin ket pinasyan ririket moyo. Saytin ririket, kasa gapo nin kapada tan kasan saritaꞌ nin makaibalikas no paꞌno. 9 Wanin a ririket moyo banaꞌ ta man-gaꞌmuran moyoyna a bunga nin pagmamatalek moyo a say pakaisalba moyo.

10 Say maipaꞌkaꞌ sa sain, inusisaꞌ raynan inusisaꞌ tan inadal raynan inadal nin saray prupita nan Dios. Nipadles rayna sin saytaw et a maipaꞌkaꞌ sa sain nin pakaꞌkitan nin kamaungan nan Dios komoyo. 11 Baleꞌ, sin nipadles na konra nin si Ispirito na nin sya a Cristo nin mampagꞌuray konra, a maipaꞌkaꞌ sa pakapadyaꞌdyaꞌ na tan say sangkaandaan nin mangyadiꞌ a sumunor sa sain, rinabay ran matandaan no kaꞌno tan no ani a mangyadiꞌ liꞌ no rumateꞌ ti nin pangingisalba na. 12 Nipatarusan nan Dios konra a saytaw say manꞌipatandaan ra ket amboꞌ nin para sa kaabigan ra no kai para sa kaabigan moyo sawanin. Oꞌ, ta say nipatandaꞌ ran prupita, sain a lamang a nibaritaꞌ ran saray nangipatandaꞌ konan Mabistan Patandaꞌ komoyo mangibwat sa pakayadiꞌ na nin Ispirito nan Dios nin nibakiꞌ na nangibwat sa langit. Mataman nin saray uanghil, masulit ran apes anamaet nin matarusan a maipaꞌkaꞌ sa saytin pangingisalba na.

13 Banaꞌ anaod sa saytin makapakaꞌngap nin pangingisalba nan Dios komoyo, ikwa moyo lawas sa kaisipan moyoytaw say mabibista nin mantagaꞌnan moyon ibi na liꞌ nin Dios komoyo no sumubliꞌ yayna si Jesu-Cristo. Matkap nin naisadyaꞌ moyoynay kaisipan moyo nin mangwaꞌ nin kusto tan mangkadangkaan moyoynay sarba nin kimey moyo.

14 Ket banaꞌ ta matulok kamo nin aꞌnak nan Dios, andiꞌ moyo nin aburuyan a lalaman moyon diri nin maguyugoy et nin gindat a nikatawo moyo sin kai kamo et nin napalawayan nin katutuꞌwan a nangibwat konan Dios. 15 Ana edet, kapada nan si nangayab komoyo a maringgas ya nin naiduma, wanin anamaet, magꞌin kamon maringgas sa sarban gawaꞌ-gawaꞌ moyo. 16 Wanin ta main ti nin naisurat a wanan Dios, “Mipasantos kamo ta siꞌko, masantos ako.”^d

17 Si Dios, mantawagen moyan Ama moyo, wanin man, sarba tamon tutawo ket sintinsyawan natamo lamang, dipindi sa ginwa-ginwaꞌ nin barang saya, a kai ya nin mamaburito. Ket, legꞌan a mangkipagtuloy kamodti et sa lutaꞌ, unuren moya sa pigagawaꞌ moyo. 18 Wanin ta simbot nakamo sa kasan pikuꞌkaan nin kabibyay a naimatawan moyo konran pupuon moyo. Oꞌ, tandaꞌ moyo a say nipambot na komoyo ket amboꞌ tamoꞌ nin basta-basta nin say magꞌin nin kasan kakanaan bilang sa pirak o balitok, 19 no kai edet, say mabli nin dayaꞌ na ni Cristo. Nibi nay byay na sin pinati yan bilang sayay uybon nin karniro a kasa gapo nin samaꞌ o dipikto a nidaꞌton konan Dios. 20 Adapen et nin si Dios ket pinarsa naya a mundo, nitalaga nayayna si Cristo nin mambot konran tutawo, baleꞌ sawanin tana tamoꞌ sa masusuyot nin panaon ket nipadar ya para sa kaabigan moyo, 21 siꞌkamon mampagmatalek konan Dios banaꞌ kona ni Cristo. Si Dios a namasubliꞌ nin mabyay kona ni Cristo tan nangipataꞌgay kona ta pigaw nin syan diri nin si Dios a mampagmatalkan tan mampilalwan moyo.

22 Naparinggas anay byay moyo sin tinmulok kamo sa katutuꞌwan nin nangibwat konan Dios ket, main ana nin tutuo nin pangangawaꞌnan moyo konran bubsat moyo sa pammemper. Ket anaod, ituluy-tuloy moyoy maꞌmot nin pikawaꞌnanan nin masibulot a kapusuan moyo. 23 Wanin ta paꞌsar moyoy naiyanak anamanaet nin main anan naiduman byay. Kai in nin nangibwat sa tawo nin mati no kai konan Dios a kai gapo nin mati. Nagkamain kamon sitin byay yupaꞌ sa mamin byay nin makapangyayadiꞌ tan kai gapo nin manguman anggan-angga nin minsahi a nangibwat konan Dios. 24 Wanin a mabasa sa Masanton Kasuratan,