2
Banaꞌ anaod ta main anan baꞌyon byay moyo, gurutan moyoyna a sarban kadukaan; say sarba nin bakas nin pibulaꞌ-bulaꞌ, piwadiꞌ-wadiꞌ, imbel, tan paninidaꞌ nin kapadan tawo, 2 ket magꞌin kamo nin kapada na nin sayay abing. Rabay-rabay nay sumuso ket siꞌkamo anamaet, sulitan moyo a magꞌadal nin say minsahi nan Dios nin kasan sakalakon nailawok ta pigaw nin tumuboꞌ kamo sa byay moyo nin syay bungan nikaisalba moyo 3 ta nasariꞌ moyoyna a kamaungan nan Uunuren moyo.a4 Si Uunuren moyo, maiyarig yaynamaet sa sayay mabyay nin maꞌget a bato nin nakaipaꞌdengan nan sayay bali. Saray tutawo, kai raya nin rabay, anta, sya a piniliꞌ nan Dios tan maalaga yan tuloy kona. Sawanin, mangkumadani kamo kona 5 ket man-gawꞌen nakamon sayay balin naispiritwan a maiyarig kamo sa bubato nin mabyay. Anaod, nagꞌin kamon pupadiꞌ a maikanaꞌ konan Dios ta pigaw nin, sa tulong na ni Jesu-Cristo, ket mampami kamo nin daꞌton nin maikanaꞌ konan Dios tan akuen na.b 6 Tutuo nin wanin banaꞌ ta main yayti e nin mabasa sa Masanton Kasuratan a wanan Dios,
“Kikiten moyo! Nipaꞌdeng koyay sangkaimpurtantiwan nin bato
a mamaꞌget konan paꞌdeng ko sa Sionc.
Piniliꞌ koya tan sangkablyan ya.
Ket si siꞌnuman nin magmatalek kona, kai ya gapo nin maima-ima.”d
7 Kanyaꞌ anaod nin, komoyo nin mampagmatalek kona, pinasya nin kaalagawan na. Baleꞌ saray kai nin mampagmatalek kona, matukid anamaet konra a mabasa sa Masanton Kasuratan a wana,
“Sitaw si bato a nibilang ran kai nin mausar nin saray mammanday,
Syay ginwaꞌ nan Dios nin sangkaimpurtantiwan nin baton matkap sa pammaꞌdeng,”e
8 tan,
“Konan siti nin bato, bilang maipadugpaꞌ sara anamaet a tutawo ket gurutan rayan guraꞌ raya.”f
Bilang misakin sara kona banaꞌ ta kai sara nin mantumulok sa nibaritaꞌ na nin Dios. Sayti a nitalaga nan Dios nin mangyadiꞌ konra.
9 Siꞌkamon sarba baleꞌ, “Piniliꞌ nakamon magꞌin nin pamilya na nin Dios,” tan “Pupadiꞌ nakamo nin mampagsirbi kona a syay Adiꞌ tamo.” Siꞌkamo et nin sarba a “Tutawo nakamo nin mampagꞌurayan na nin naipurok para kona.” Siꞌkamo a “Tutawo nin ikon na.”g Wanin a pakikalamoꞌ moyo konan Dios ta pigaw nin ipatandaan moyoy mabibistan ginwaꞌ na. Syay nanagyat komoyo nin maipalꞌis sa kadedleman nin byay moyo ket niyalis nakamoynan nikaꞌ sa makapakaꞌngap a palaway nin katutuꞌwan na.
10 Oꞌ, gindat ket kasan pakikalamoꞌ moyo konan Dios,
baleꞌ sawanin “Tutawo nakamoyna nin Dios.”
Gindat, kai kamo nin mangkakiramaꞌ sa pangingingaꞌdo nan Dios,
baleꞌ sawanin “Mangkagaꞌmuran moyoyna a ingangaꞌdo na.”h
Say Matkap a Pagkabyay ran Tutawo nan Dios
11 Bubsat, ibaritaꞌ koyti komoyo: Banaꞌ ta sanꞌili kamodti tamoꞌ sa lutaꞌ a mampiikap kamo sa amboꞌ moyo nin lugar nin diri, andiꞌ moyoyna nin byan nin lugar a kaririktan nin lalaman moyo ta sayti ket mangkumuntra sa katutumbok moyo konan Dios. 12 Ana edet, magkabyay kamo nin mapteg sa pangingikit ra nin amboꞌ nin mammemper ket mataman no manꞌibari-baritaꞌ ra nin dukaꞌ a pigagawaꞌ moyo, maꞌkit ra anamaet a lamang nin maabig a man-gawꞌen moyo ket raywen rayay Dios no mako ya konra.
13 Ta pigaw nin mapagalangan yay Uunuren, paisirong kamo konran sarba ran main nin pakauray komoyo, konan si sangkataꞌgayan nin mampagꞌuray, 14 pati konran saray raruma et nin upisyalis nin binyan nan pakayadiꞌ nin manusa konran mangwaꞌ nin dukaꞌ tan mamagalang konran saray mangwaꞌ nin maabig. 15 Wanin a gawꞌen moyo banaꞌ ta si Dios, rabay nasaran pisasaeten in saray kasan mataros maipaꞌkaꞌ sa pigagawaꞌ na, yupaꞌ sa maabig a gawaꞌ moyo. 16 Ipaꞌkit moyo sa kabibyay moyo a tutawo kamo nin main nin pagkanawanawa. Wanin man, andiꞌ moyo nin usaren tin pagkanawanawa moyo sa pangwaꞌ nin dukaꞌ, no kai edet, usaren moyo sa pagsisirbi konan Dios. 17 Rispitwen moyo sara nin manepeg a sarba nin tawo; kawaꞌnanen moyo sara a kapada moyo nin mammemper; ikaliꞌmo tan igalang moya a Dios; tan kabilangan moyay si sangkataꞌgayan nin mampagꞌuray komoyodti sa lutaꞌ.
18 iSiꞌkamo anamaet nin main nin amo, paisirong kamo konra tan igalang moyo sara. Gawꞌen moyoyti konran saray maong tan mapamasinsya nin amo moyo, wanin et a lamang konran maduksaꞌ. 19 Wanin ta no, banaꞌ sa katutuꞌwan moyo konan Dios ket itpel moyoy pammaidap ra komoyo nin kasan kasalanan moyo, raywen nakamo nin Dios. 20 Baleꞌ no banaꞌ anamaet sa kasalanan tamo kanyaꞌ nin padyaꞌdyaen ratamo ket itpel tamoyti, kai atamon lamang nin marayo. Baleꞌ mataman no kasa nin dukaꞌ a gawaꞌ tamo ket padyaꞌdyaen ratamo tan itpel tamo, si Dios, raywen natamo 21 banaꞌ ta say gagara nan Dios sin sinagyat natamo ket si makaitpel atamo para kona. Nangitpel yan dyaꞌdyaꞌ si Cristo para kontamo ket nami ya nin pangarigan nin sunuren tamo. 22 Sya, kai ya gapo nin nagkasalanan tan kasa gapo nin inirgo na nin bulaꞌ.j 23 Sin mampagsari-saritaan raya kai ya gapo nin inumbat nin nagꞌirgon dukaꞌ.k Wanin a lamang, sin mampadyaꞌdyaen raya, kai ya gapo nin nangigagaem, no kai edet, nipagamet nayna a lalaman nan diri konan Dios, a sya ket mapteg a paninintinsya na. 24 Si Cristo, inubatan nan diri a kasalanan tamo sa lalaman na sa nipati nan nipasak sa kudos ta pigaw nin gurutan tamoynay pagkakasalanan ket magkabyay atamoynan say gawꞌen ket say mabista. Edet, banaꞌ sa nikasugat na, napalimpyo kamo 25 ta gindat, baraꞌmo kamo nin karniro nin nabarang-barang.l. Baleꞌ sawanin, sinmubliꞌ kamoyna kona nin si Mammastor tan Mampamaga komoyo.