3
aSiꞌkamo anamaet nin uasawan bubbayi, paisirong kamo konran uasawa moyo ta pigaw nin mataman no kai sara nin mampagkabyay nin sigon sa minsahi nin nangibwat konan Dios ket masagyat sara nin mamper banaꞌ sa mabistan pigagawaꞌ moyo. Mataman nin kai moyo sarayna nin kumbinsyen, masagyat saraynan lamang 2 banaꞌ ta maꞌkit ran malinis a kabibyay moyo banaꞌ sa pangingigalang moyo konan Dios. 3 Say kabistawan moyo ket matkap a kai nin naipatukdoꞌ sa kabistawan nin bakas; amboꞌ nin banaꞌ sa pammabista nin sabot, o banaꞌ sa piaalahas o banaꞌ sa pisisket.b. 4 Ana edet, say puon nin kabistawan moyo ket no ani a iti sa kanakman moyo. Wanin ta say kabistawan a magnayon nin sangkablyan konan Dios ket say pagꞌin nan mauyamoꞌ tan madꞌen nin sayay tawo. 5 Wanin a pigagawaꞌ ran saray makaDios nin bubbayi sin nuꞌna a nagmatalek sara konan Dios ket nikwinta saran magana-gana leleg a pinaisirong sara konran asawa ra. 6 Saya ya si Sarac konran saraytin bubbayi. Tinmulok ya sa wanan asawa nan si Abraham tan inalilbiꞌ naya nin uunuren na. Ikwinta kamon puri na ni Sara no gawꞌen moyo a kanepegan tan kai kamo nin madaepan.7 Siꞌkamo anamaet nin uasawan lulalaki, igalang moyo saray asawa moyo. Kikalamuan moyo sara nin main nin pananaros konra ta nipudir sara komoyo ta mainumꞌay saran maagrabyado tan banaꞌ ta si Dios, binyan nasara anamaet nin si mabistan rigalo nan byay a iti kona a kapada moyo. No kai moyo nin gawꞌen in, kai nin magkuri a kadadasal moyo.
8 Sawanin, siti a kadinepan nin nibaritaꞌ ko komoyon sarban mammemper. Mipapasaya kamo sa pangingisip moyo. Kiingar kamo konran kalalamoꞌ moyo. Kawaꞌnanen moyo a saya tan saya. Matkap a mapaingangaꞌdo kamo sa saya tan saya. Mipaayupaꞌ kamo. 9 No main nin gumwaꞌ nin dukaꞌ komoyo, andiꞌ kamo nin gumaleꞌ. No main nin magꞌirgo nin dukaꞌ komoyo, andiꞌ kamo nin umbat nin dukaꞌ, no kai edet, idasalan moyo sara a bindisyunan nasara kumon nin Dios. Wanin a gawꞌen moyo banaꞌ ta si Dios, sinagyat nakamo ngaꞌmin ta pigaw nin bindisyunan nakamo. 10 Tandaꞌ moyo in ta main nin mabasa sa Masanton Kasuratan a wana,
“No rabay nan sayay tawo a mabistay byay na
ket maririket ya,
matkap a andiꞌ ya nin magꞌirgon makadukaꞌ sa raruma,
o nin bulaꞌ-bulaꞌ.
11 Gurutan nayna a pangngawaꞌ nan dukaꞌ,
ket ana edet say maabig a gawꞌen na,
tan gawꞌen nay sarban mababaan na a mabistay pakikalamoꞌ na sa kapada nan tawo.
12 Wanin a byay na ta si Catawan, sipapaga ya konan tawo nin mapteg sa pangingikit na
tan ubatan na a dasal na,
baleꞌ kuntrawen nasara a gumu-gumwaꞌ nin dukaꞌ.”d.
Saliꞌ no Mangirangep atamon Idap Abirno nin Maabig a Gawaꞌ tamo
13 Ket sawanin, no say maabig a masulit moyon gawꞌen, main para nin mangwaꞌ nin dukaꞌ komoyo? Sa wangko kasa. 14 Wanin man, no paidapen rakamo banaꞌ sa maabig a man-gawꞌen moyo, makarmaꞌ kamoynan lamang. Ket andiꞌ kamo nin maliꞌmo sa gawꞌen ra tan andiꞌ nin magulo a kaisipan moyo,e. 15 ana edet, gawꞌen moyo a si Cristo ket syay tutuon Uunuren moyo. Ilamoꞌ moyo sa sain a sisasadyaꞌ kamo lawas a no main nin mangusisaꞌ komoyo maipaꞌkaꞌ sa puon nin pangingilalo a maꞌkit sa kabibyay moyo, ket maubatan moyo sara. 16 Baleꞌ matkap a siuuyamoꞌ tan siaayupaꞌ kamo nin umbat. Matkap anamaet a pirmi nin malinis a kunsinsya moyo ta pigaw nin, no main nin magꞌirgon paninidaꞌ komoyo banaꞌ sa mabistan pigagawaꞌ moyo nin tumutumbok kona ni Cristo ket, saray madingꞌeyan sa irgo ra. 17 Panemtemen moyo a mas maong ana a, no siin a karabayan nan Dios, say pangingirangep moyo ket banaꞌ sa nipangwaꞌ moyo nin maabig dyan banaꞌ sa nipangwaꞌ moyo nin dukaꞌ.
18 Anaod, isipen moyoyti e: Mataman anamaet nin si Cristo ket pinangirangep ya sin pinati ya banaꞌ sa kukasalanan tamo. Nati ya tamoꞌ nin niꞌsa tan kai nayna nin matkap a mati nin uman. Sya nin sayay kasa gapon kasalanan, nati ya para kontamo nin makasalanan ta pigaw nin maikadani natamo konan Dios. Mataman nin napati yadti sa lutaꞌ, ginwaꞌ anamaet nin mabyay ya sa kapapaꞌsar a ispirito. 19 Ket sa sain a kapapaꞌsar, nako ya sa lugar a mangkaipriswan ran uispirito tan nipatandaan na konra a maipaꞌkaꞌ sa pananalo na. 20 Sarayti saray mangkapriso ket saraytaw saray sinmubag konan Dios sin saytaw sin man-gawꞌen naya ni Noe a alakin baluto. Si Dios, inanusan nasara intaw a tutawo angga sin nayadiꞌ yayna a baluto, ket walo ra tamoꞌ nin katawo a sinumrep sa baluto kanyaꞌ nin sarayti tamoꞌ a naisalba sa ranom.f
21 Kapada sa wanin, maisalba kamo banaꞌ sa pakabawtismog moyo; siin ket amboꞌ nin kapada nin pakauyas nin lalaman moyo ta pigaw nin maringgasan no kai edet, say pagpangakoꞌ moyo konan Dios mangibwat sa maringgas a kanakman moyo. Maisalba nakamo yupaꞌ sa nipamasubliꞌ nan mabyay kona ni Jesu-Cristo 22 ket itaw yayna sawanin sa wanan nan Dios. Oꞌ, sinmubliꞌ yadtaw sa langit tan nikwa sara sa sirong na a sarba ran uanghil tan raruma et nin pinarsa a kai nin maꞌkit nin main nin pakauray o pakayadiꞌ.