Sitin surat, sinurat naya ni Pedro a sayay apostol konran mammemper kona ni Jesu-Cristo, angangko itaw sa bubabali sa Asia Minor (2 Pedro 3:1; 1 Pedro 1:1). Sinurat naya sin adani ana nin mangangga a byay na (1:13) nin angangko sin pibutlayan nin A.D. 61 tan A.D. 68.

Say gagara na ni Pedro sin sinurat nayayti ket si pauꞌnawan nasara a mammemper maipaꞌkaꞌ konran saray mampangyakay nin amboꞌ nin tutuo. Si sayay bagay a manꞌiyakay ra ket, si Cristo kai yayna kano nin sumubliꞌ. Kinuntra nasara ni Pedro nin wana si Cristo ket peteg a sumubliꞌ ya. Si rason a naꞌteng anay tyimpo sin nibaritaꞌ na ni Cristo baleꞌ anggan sawanin kai ya et nin sinmubliꞌ ket, banaꞌ ta si Dios manꞌanusan nasaray tutawo ta pigaw nin magbabawiꞌ sara sa kukasalanan ra (3:9,15).

Kanyaꞌ nin mambibilinen nasara ni Pedro a mansuratan na nin andiꞌ sara nin paibarang sa amboꞌ nin kuston uakay, no kai edet, dumaer sara sa tutuon uakay ran prupita nan Dios tan ni Jesu-Cristo (3:1), nin lamuꞌnan ra lawas a pakataros ra sa kamaungan nan Uunuren tamon si Jesu-Cristo, wanin et sa pakatandaꞌ ra kona (3:17-18). Matkap raynamaet a magkabyay nin matulok konan Dios (3:11-13).