Surat koyayti komoyo nin niramaꞌ nan Dios sa pagmamatalek a parihoy kaalagawan komoyo tan komi. Siin ket nangyadiꞌ mangibwat sa kamaungan tan katunungan na ni Jesu-Cristo nin Dios tan Mangingisalba tamo.

2 Sapa kumon ta si Dios ket lalo na et nin ipaꞌkit lawas a bindisyon na komoyo tan lalo nan pabistawen a kapapaꞌsar moyo leleg a mantanda-tandaen moya a sya nin Dios tan si Uunuren tamo a si Jesus.

3 Wanin ta, banaꞌ sa pakayadiꞌ na ni Jesus ta Dios ya, nibi nayna kontamo a sarba nin matkap tamo ta pigaw nin mabyay atamo tan makapagkabyay atamo nin makapaririket nin tuloy kona. Magwaꞌ tamo in ta katandaꞌ tamoyayna a Dios, a sya sinagyat natamo mangibwat sa sangkataꞌgayan a kagalangan nin pigagawaꞌ na tan kamaungan na.^a 4 Banaꞌ a lamang sa sayti nin sangkataꞌgayan a kagalangan a pigagawaꞌ na tan kamaungan na, nibi na kontamo a kaabigan nin nipangakoꞌ na nin makapakaꞌngap tan maalaga nin tuloy. Nibi nayti ta pigaw nin makakiramaꞌ atamo sa kinasiꞌno na tan malakwanan tamoyna a dukaꞌ nin kabibyay a mangibwat sa pangangapes tamo nin madaliꞌ nin manidaꞌ kontamodti sa mundo.

5 Banaꞌ anaod ta wanin, gawꞌen moyo a mababaꞌ moyo a, say pagmamatalek moyo kona ni Jesu-Cristo ket paaluyunan moyon kabistawan nin ugaliꞌ; say kabistawan nin ugaliꞌ ket paaluyunan moyon pakatandaꞌ sa manepeg nin gawꞌen; 6 say pakatandaꞌ sa manepeg nin gawꞌen ket paaluyunan moyon pagdadangkaꞌ sa lalaman moyo; say pagdadangkaꞌ sa lalaman moyo ket paaluyunan moyon pangingitpel; say pangingitpel ket paaluyunan moyon pagkabyay nin makapaririket konan Dios; 7 say pagkabyay nin makapaririket konan Dios ket paaluyunan moyon pangangawaꞌnan sa kapadan mammemper; say pangangawaꞌnan sa kapadan mammemper ket paaluyunan moyon pangangawaꞌnan lamang sa sarban tawo. 8 Sulitan moyon paaluyunan nin sayti a pagmamatalek moyo ta no mintras a manꞌumteng ket main ti komoyo tan manꞌumget anamaet nin iti komoyo, sayti ket gawꞌen nin main nin kakanaan tan kuri a pakatandaꞌ moyo kona ni Jesu-Cristo nin Uunuren tamo. 9 Baleꞌ si sayay mammemper a kasayti nin pigagawaꞌ kona, paꞌsar na ket sayay rayam o sayay bulag ta nalingwanan nayna a naringgasan yayna sa kasalanan na sa gindat a kabibyay na.

10 Edet anaod, bubsat, gawꞌen moyo et a mababaꞌ moyo nin mapatutuꞌwan a piniliꞌ tan sinagyat nakamo nin Dios ta pigaw nin magꞌin nin tutawo na. No gawꞌen moyo in, kai kamo gapo nin maibarang, 11 ana edet, si Dios, siririket yan pangibwaten na nin makaluob kamo sa kasan anggawan a Pagꞌadian nan Uunuren tan Mangingisalba tamo a si Jesu-Cristo.

12 Kanyaꞌ nin mataman nin tandaꞌ moyoynayti nin bubagay tan mandumaer kamoyna nin mantumumbok sa katutuꞌwan a niyakay komoyo, ituluy-tuloy ko et a lamang nin ipapanemtem komoyo. 13 Sa wangko, nepeg a gawꞌen ko in mintras a mangkabyay ako et 14 ta nipatandaan na nin Uunuren tamo a si Jesu-Cristo kongko a adani ana a patiti ko^b. 15 Kanyaꞌ nin gawꞌen ko a sarba nin mababaꞌ ko a, mataman liꞌ nin nati akoyna ket, maipapanemtem in et nin niyakay komoyo.

16 Panemtemen moyo in ta say nipatandaan mi komoyo maipaꞌkaꞌ sa pakayadiꞌ na ni Uunuren tamon Jesu-Cristo tan say isusubliꞌ nadti ket amboꞌ nin istu-isturya nin pinabrika ran masisirib a tutawo. Wanin ta naꞌkit mi nin mismo a kataꞌgayan nin nikaDios na. 17-18 Oꞌ, pinagalangan tan nipataꞌgay naya nin Dios nin Ama sin kalamoꞌ nakamidtaw sa talugtog nin piniliꞌ nan Dios. Siꞌkamin mismo, narngeꞌ mi a busis nan Sangkataꞌgayan nin Dios nin nangibwat sa langit a wana,

19 Konan siin anaod, lalo nin napatutuꞌwan a nibaritaꞌ rayna sin saytaw et sin nuꞌnan panaon nin saray prupita nan Dios. Ket maabig no tumulok kamo sa sayti nin wanra banaꞌ ta baraꞌmo nin lampadawan ti nin mampamalaway sa madedlem, anggan sa awro nin sumubliꞌ ya si Cristo. Siin nin isusubliꞌ na ket baraꞌmon kapibuklas tan sya ket baraꞌmo ya nin kabuntatalaꞌ sa buklas nin mamalaway nin kanakman moyo.

20 Muꞌna-muꞌna, tandaen moyayti e: