Pakailag atamo Maipaꞌkaꞌ sa Pakikalamoꞌ tamo sa Saya tan Saya
5
Edet, komoyo nin mampangipangulo sa dudupong ran mammemper, main nin ibibilin ko komoyo. Tandaꞌ moyo a siꞌko ket sayay pangulo ako anamaet tan sayay nakaꞌkit sa nipamadyaꞌdyaꞌ kona ni Cristo tan makakiramaꞌ ako sa kataꞌgayan na nin maipadar liꞌ no marateꞌ a panaon. Sayti e anaod a ibaritaꞌ ko komoyo:2 Pagawan moyo saran maong a mammemper a naipudir komoyo, a bilang saran karniro nin nipapasturan nan Dios komoyo. Gawꞌen moyoytin trabaho moyo nin siririket a kai kamo nin mapasu-pasuet banaꞌ ta wanin a rabay na nin Dios. Wanin et a amboꞌ kumon nin kwarta a puon nin gawꞌen moyo a trabaho moyo, no kai edet, banaꞌ ta maririket kamon magsirbi konan Dios tan konran kalalamoꞌ moyo. 3 Andiꞌ kamo nin magꞌamu-amo konran sarain saray naipudir komoyo. Ana edet, mangimey kamo sa padalan nin mabyan saran mabistan ihimplo nin arigen ra. 4 Ket, liꞌ no sumubliꞌ yayna si Cristo a syay Sangkataꞌgayan nin Mammastor ra nin mammemper, byan nakamo liꞌ nin primyo nin magnayon anggan-angga a siti ket say pakakiramaꞌ moyo sa kataꞌgayan na.
5 Siꞌkamo anamaet nin mangalalagoꞌ, paisirong kamo konra nin mangatuntawo.
Ket sarba moyon siꞌkamon mammemper, mipaayupaꞌ kamon magsirbi sa saya tan saya. Matkap a wanin moyo banaꞌ ta mabasa sa Masanton Kasuratan a wana,
“Kuntrawen nasaran Dios a marangas,
baleꞌ tulungan nasara anamaet a maayupaꞌ a nakem.”a
6 Anaod, mipaayupaꞌ kamon paisirong sa pammatunong nan Dios nin makapangyayadiꞌ sa sarba, ta pigaw nin ipataꞌgay nakamo liꞌ sa awro nin nitalaga na. 7 Mipaayupaꞌ kamon italek konan Dios a sarba nin mangkaaburidwan moyo banaꞌ ta si Dios, mampagawan nakamo.
8 Matkap a mapagdangkaꞌ kamo sa sarba nin gawꞌen moyo tan pakailag kamo, banaꞌ ta si Kalaban moyo a sya a Dimunyo ket baraꞌmo ya nin mabayani nin leon a mampikadaw nin maningkap nin masinan na. 9 Risistyan moya tan dumaer kamo sa pagmamatalek moyo konan Dios. Panemtemen moyo a mampangirangep sara anamaet nin wantin dyaꞌdyaꞌ a kapada moyon mammemper sa intiro nin mundo.
10 Ket si Dios nin diri, mayadiꞌ a anted a panaon nin pangingirangep moyon wanti, ket pasublien nay mabistan kapapaꞌsar moyo; paksawen nay nakem moyo; pagsenen nakamo; tan patarigꞌenen nakamon tutawo na. Sya a mampami komoyo nin sarban bindisyon na tan syay nanagyat komoyo nin kiramaꞌ sa kataꞌgayan na nin kasan anggawan banaꞌ sa nikaipasaya moyo kona ni Cristo. 11 Anggan-angga anaod nin magꞌuray yan main nin pakayadiꞌ sa sarba!
Peteg a wanin.
Patanid
12 Naisurat yayti nin anted nin surat ko komoyo sa tulong na ni Silas a tandaꞌ kon sayay kapagpyawan a busat tamo sa pammemper. Yupaꞌ konan sitin surat ko komoyo, rabay kon pagsenen a pammemper moyo tan patutuꞌwan ko komoyo a sain say mangkasariꞌ-sariꞌ moyo ket mangipaꞌkit nin peteg nin kamaungan nan Dios. Andiꞌ moyo kumon nin gurutan tin kamaungan nan Dios!
13 Mampakumustawen rakamo nin saray iti nin kapadan mammemper a taga Babiloniab a sara ket piniliꞌ nasara anamaet nin Dios.
Mampakumustawen nakamo anamaet ni Marcos a manꞌikwinta kon anak ko.
14 Mipakumustawan kamo nin pangipaꞌkit moyo a kawaꞌnan moyo a saya tan saya.
Sapa kumon ta mabista lawas a kapapaꞌsar moyo ngaꞌmin nin mammemper isen kona ni Cristo.