Arigen moya si Cristo sin Nangirangep yan Pammadyaꞌdyaꞌ
4
Edet, banaꞌ ta si Cristo ket nangirangep ya nin pammadyaꞌdyaꞌ sin iti ya sa lutaꞌ, isadyaꞌ moyo anamaet a kanakman moyo sa wanin a kapapaꞌsar. Wanin a gawꞌen moyo banaꞌ ta si tawo nin mampangirangep ket mapasal na a kai ana nin magkasalanan.a 2 Ket mangibwat anaod sawanin, tan sa leleg moyo nin mabyay iti sa lutaꞌ, amboꞌ ana a say kaririktan nin lalaman a tumbuken moyo. Siꞌkamo, magkabyay kamoynan say gawꞌen moyo ket no ani a rabay nan Dios. 3 Sadag anaytaw say panaon a napalabas nin niꞌpos moyo sa nipangwaꞌ nin gawaꞌ-gawaꞌ ran saray kai nin makatandaꞌ konan Dios. Sin saytaw, ginwa-ginwaꞌ moyo a animan nin nikasamaꞌ tan makapadingꞌey a inapes nin lalaman moyo, nipabuk-pabok kamo, nikiayi-ayi kamo sa kasan dangkaꞌ nin piririga tan sa makaparmay a pangrarayo sa dios-dios. 4 Ket sawanin, saray amboꞌ nin mammemper, mampakaꞌngapan rakamo tan mampagꞌirgu-irgo saran paninidaꞌ komoyo banaꞌ ta kai kamoyna nin mangkikalamoꞌ konra sa pangngawaꞌ nin kasan dangkaꞌ a kadukaan. 5 Sara in baleꞌ ket matkap ray umbat liꞌ sa adapan nan Dios, ta si Dios, sisasadyaꞌ yaynan manintinsya nin sarban tawo, saray mabyay et tan saray nati ana. 6 Ket sawanin, magwaꞌ nasaraynan sintinsyawan a nati ana ta nipatandaan yaynamaet a Mabistan Patandaꞌ konra, ta pigaw nin mataman nin dinalanan rayna a patiti a syay parihon dusa sa sarban tawo ket, magwaꞌ naynan ibi nin Dios konra a byay a kapadan byay na.Say Matkap nin Pagkabyay moyo sa Saytin Panaon a Susuyot ana
7 Dandani ana nin mangangga a sarban mampangyadiꞌ. Kanyaꞌ nin matkap a mapagdangkaꞌ kamo sa lalaman moyon diri tan pirmin mapalaway a pangingisip moyo ta pigaw nin makadasal kamo nin matunong. 8 Si sangkaimpurtantiwan nin matkap nin gawꞌen moyo ket si ituluy-tuloy moyoy maꞌmot a pikawaꞌnanan moyo nin saya tan saya banaꞌ ta no wanin a gawꞌen moyo, kai moyo nin pipanemtem a dukaꞌ a ginwa-ginwaꞌ ra komoyo nin saray kalalamoꞌ moyo ket mapirduna moyo sara.b 9 Pagtuluyen moyo kumon nin siririket sa bali moyo a saya tan saya. 10 Nakaipudiran kamo nin nagsikabarang nin bindisyon nan Dios ket, pagsirbyan moyo nin manepeg a saya tan saya mangibwat sa pakababaꞌ a nipuyaꞌ nan Dios sa barang saya komoyo. 11 Saraytaw saray pinuyaan nin pakababaꞌ nin mangipatandaꞌ, matkap a magꞌirgo saran bilang sayay mangingilalaman konan Dios. Saray pinuyaan nin pakababaꞌ nin tumulong, matkap a pakaseseg sara nin tumulong mangibwat sa pamamaaluyon nan gesen nin Dios konra. Wanin a gawꞌen moyo ta pigaw nin sa sarban gawꞌen moyo banaꞌ sa ginwaꞌ na ni Jesu-Cristo komoyo ket, maitandudoꞌ yay ngaran nan Dios. Sya a pagalangan tan magꞌuray anggan-angga.
Peteg a wanin.
Say Matkap nin Pangingisip moyo Maipaꞌkaꞌ sa Pammadyaꞌdyaꞌ
12 Bubsat, andiꞌ moyo nin pakaꞌngapan in say pangingirangep moyo nin dyaꞌdyaꞌ a ibaritaꞌ moyon say mampangyadiꞌ komoyo ket amboꞌ nin manepeg nin mampangyadiꞌ. Sayti nin dyaꞌdyaꞌ ket rinmateꞌ komoyo ta pigaw nin masubok no tutuo kamo. 13 Ana edet, rumiriket kamo no mampangirangep kamo nin dyaꞌdyaꞌ a wantin lamang a nirangep na ni Cristo, ta pigaw nin wanin ana liꞌ a ririket moyo no maipadar ana a kataꞌgayan na. 14 Makarmaꞌ kamo no tuyaꞌ-tuyaen rakamo banaꞌ ta tutawo nakamo ni Cristo. Banaꞌ sa wanin, matandaan moyo a si makapangyayadiꞌ nin Ispirito nin ipadar na a kataꞌgayan nan Dios ket iti yan mampiikap komoyo. 15 Baleꞌ sapa kumon ta no mapadyaꞌdyaꞌ kamo ket amboꞌ nin banaꞌ ta nangwaꞌ kamo nin dukaꞌ a bilang sa pangmamati, pananakaw, panunubag sa layi, o a mangkibbaꞌbatan moyo saray raruma nin tawo. 16 No say rason baleꞌ a mampadyaꞌdyaen rakamo ket banaꞌ ta tumutumbok nakamo ni Cristo, andiꞌ moyo nin nepeg nin ikadingꞌey. Ana edet, kisalamatan moya a Dios banaꞌ ta wanin a pangangalilbiꞌ ra komoyo.
17 Wanin a mampangyadiꞌ banaꞌ ta, si Dios, manꞌitaranaꞌ nayna a paninintinsya na, tan man-gawꞌen na a siꞌtamo nin iti sa pamilya na a muꞌnan sintinsyawan na. Ket no sayti tamoꞌ a taranaꞌ say dyaꞌdyaꞌ a manꞌirangep tamo, sigurado a say mangyadiꞌ liꞌ konran saray kai nin tumulok konan Mabistan Patandaꞌ a nangibwat konan Dios ket mas grabi. 18 Bilang wanin a mabasa sa Masanton Kasuratan,
“No mangirangep yan kaidapan a sayay matunong nin tawo leleg nin manꞌisalba ya,
lalo yaynan mangirangep nin kaidapan a sayay tawon kai nin maliꞌmo konan Dios tan dukaꞌ a pigagawaꞌ na.”c
19 Kanyaꞌ anaod nin no mampangirangep kamo nin dyaꞌdyaꞌ ta sain a karabayan nan Dios, italek moyoy lalaman moyon diri kona banaꞌ ta sya a namarsa komoyo tan tutuo ya sa nipangakoꞌ na. Ket ituloy moyoy mangwaꞌ nin maabig.