5
Siꞌkamon mumayaman, rengꞌen moyoyti. Umakis tan mangabet-abet kamon magbabawiꞌ banaꞌ ta rumateꞌ liꞌ a grabin idap komoyo mangibwat konan Dios. 2 Naumok tan kasan kakanaan anan kukayamanan moyo; say suseket moyo naetꞌet raynan insikto; 3 namapas tan tinmaey anay balitok tan pirak moyo nin manꞌisiblet moyo, ket say taey a mismon mangipaꞌkit nin kaaguman moyo. Baraꞌmon apoy nin mangpos liꞌ nin laman moyo a kayamanan nin dininep moyo, sa manrumateꞌ anan awron panunusa nan Dios. 4 Iti a upaꞌ ran tawon sinaor moyon kai moyo nin binayadan a pagal ran nagtrabaho sa gagawaꞌ moyo. Rengꞌen moyoy ayꞌay ra. Narngeꞌ nan Uunuren nin Mampagꞌuray sa Sarba a ayꞌay ra. 5 Nagkabyay kamodti sa babon lutaꞌ sa pipariga tan pammapdaꞌ sa kaririktan nan lalaman. Baleꞌ baraꞌmon ayep a patyen, mampipatabaꞌ kamo sa pannunor sa karabayan moyo para sa awron pangungukom nan Dios. 6 Sinintinsyawan tan nipapati moyo sara et a matunong abirno nin kai rakamo nin linabanan.Say Bibilin Para sa Maanos a Pangingitpel nin Pakapaidap
7 Kanyaꞌ anaod, kapadan mammemper, nin pakaanos kamo edet anggan rumateꞌ yay Catawan. Arigen moyay mangmumulan siiilalon mantumaꞌgan sa yatab sa lutaꞌ na a mabli kona. Maanos yan mantumaꞌgan sa irarateꞌ nan uꞌnan rapeg a mamarsik sa biniꞌ tan sa suyot a rapeg a mamnoꞌ nin rinakay. 8 Kanyaꞌ nin pakaanos kamo anamaet. Paꞌgeten moyoy pammemper moyo tan paksawen moyoy nakem moyo ta say irarateꞌ nan Catawan adani ana. 9 Bubsat, andiꞌ kamo mipaꞌleman nin sakit nin nakem ta pigaw nin kai nakamo ukumen nin Mangngukom a si Dios a lamang ta rumateꞌ yayna.
10 Bilang pangarigan sa pangingirangep tan sa kaaanos moyo, kiten moyo saray nangilalaman konan Dios a nangiparateꞌ nin saritaꞌ na. 11 Wantamon makarmaꞌ saray makaagwanta anggan kalaꞌpusan ta bindisyunan nasaran Dios. Alimbawaꞌ si narngeꞌ moyoynan say nasariꞌ na ni Job. Naꞌkit moyon nirangep nay abaw a dyaꞌdyaꞌ ket tinulungan naya anamaet nin Dios. Saytin ginwaꞌ nan Dios, mangipaꞌkit a mapaingangaꞌdo tan mapangawaꞌnan ya nin tuloy sa tutawo na.a
12 Baleꞌ, bubsat, si matkap tuloy nin gawꞌen moyo ket si andiꞌ kamo nin sumamba sa ngaran nin animan sa langit o sa lutaꞌ, o animan et ta pigaw nin kai kamo nin umadap sa paninintinsya nan Dios. Say ubat moyo, “Oꞌ” tamoꞌ no say rabay moyon irgwen ket oꞌ o “Kai” tamoꞌ no say rabay moyon irgwen ket kai.
13 No main komoyo a mangkagulo a kaisipan na, matkap yan dumasal konan Dios. No main komoyoy mariga, matkap yan magkanta nin pangrarayo.
14 No main komoyo a main nin masakit, matkap nin ipakayaban nasaray pangulo sa dupong moyon mammemper. Ket idasalan raya tan amrisan rayan ladakb sa pakayadiꞌ a nibi nan Catawan konra. 15 Say dasal ran saray main nin pagmamatalek konan Dios, mamaandaꞌ konan main nin masakit tan si Catawan ket parigsawen naya, tan no say kasalanan nay namagmasakit kona, sayti ket mapirduna ana. 16 Kanyaꞌ nin akuen moyo sa saya tan saya a kasalanan moyo, tan idasalan moyoy saya tan saya konan Dios ta pigaw nin mapaandaꞌ kamo. Makapakaꞌngap a magwaꞌ nin kadadasal nan tawon matunong.
17 Bilang si Elias, kapada tamoya anamaet nin tawo baleꞌ sin masuet nan nidasal a kasan rapeg, ket sa luob nin tuloy taon tan aꞌnem a bulan, kasa gapo nin rapeg. 18 Anamanaet dinmasal yan dinawat nan rumapeg, ket pinarapeg na nin Dios tan tinmuboꞌ a rabot tan mumula.c
19-20 Bubsat, panemtemen moyoyti. Magwaꞌ a maisyay ya wadiꞌ a saya komoyo sa katutuꞌwan. Maipatunong naya anamaet baleꞌ nin saya komoyo. Si makapangayat konan siti nin nagkasalanan a gurutan nayna a pagkakasalanan na, ket ipalꞌis nayad yupaꞌ sa nipamatunong na, sa patitin dusa nan Dios kona. Gawaꞌ na et nin sitin nangipatunong a panglilingwan nayna nin Dios sa abaw nin kasalanan.e