Say Puon nin Pisasangkinian ran Mammemper
4
Sawanin, ani a puon nin pisasangkinian tan piaaway moyo? Sain say pangangapes moyon karigawan nan lalaman. 2 Umapes kamo sa kasa komoyo kanyaꞌ nin abirno nin mangmati kamo sa tanay makalap moyo. Maibeg kamo anamaet sa ikon ran raruma kanyaꞌ nin milalaban kamo sa tanay maikon moyo. Kai moyo nin makalap a rabay moyo ta kai moyo nin dawaten konan Catawan, 3 tan mataman no kidawat kamo konan Catawan kai nan lamang ipagaꞌmor komoyo ta say dukaꞌ a gagara moyon kidawat, rabay moyo tamoꞌ a makadumog nin karigawan.4 Malamang nin tutawo! Matkap moyon amingawen a no kikalamoꞌ kamo konran saray dukaꞌ iti sa mundo ket manlumaban kamo anamaet konan Dios. Kanyaꞌ nin si siꞌnuman a mamaalaga konan sitin mundo ket magꞌin nin kaguraꞌ nayan Dios. 5 No wanti a man-gawꞌen moyo, ipaꞌkaꞌ moyon kasan kakanaan nan si Masanton Kasuratan a wana ket si Ispirito nan Dios nin nibi na nin miikap sa barang saya kontamo, maimon yan mangikon kontamo.a 6 Kanyaꞌ nin magnayon natamon tulungan nin Dios nin makatumbok kona ta wanin a wanan Masanton Kasuratan,
“Kuntrawen nasaran Dios a marangas,
baleꞌ tulungan nasara anamaet a maayupaꞌ a nakem.”b
7 Kanyaꞌ nin isukoꞌ moyo edet a byay moyo konan Dios ta pigaw nin tulungan nakamon sumubliꞌ kona. Labanan moyay Dimunyoc ket lumakwan ya komoyo. 8 Kumadani kamo konan Dios ket kumadani yaynamaet a Dios komoyo. Siꞌkamon makasalanan, gurutan moyoy dukaꞌ a pigagawaꞌ moyo tan siꞌkamon mampagꞌaleng-aleng, galten moyo sa nakem moyoy masiblet a apes tan tumumbok kamo konan Dios tamoꞌ. 9 Gumereng kamo banaꞌ sa dukaꞌ a pigagawaꞌ moyo. Umakis kamo tan mangabet-abet kamo; silyan moyoy piririga moyo nin kaberengan. Andiꞌ kamo nin mariga no kai edet, madingꞌey kamo ta malamang kamo. 10 Mipaayupaꞌ kamo sa adapan nan Dios ket si Dios itandudoꞌ nakamo.
11 Bubsat, andiꞌ kamo nin mipadukaan sa saya tan saya. No main nin mamadukaꞌ nin busat na, o usgawan naya, baraꞌmon manꞌibaritaꞌ nan kasan kakanaan nan gan-gan nan Dios ket manꞌusgawan nayay gan-gan. No usgawan moyay gan-gan, kai moyayna nin mantumbuken no kai edet, man-gawꞌen moyon mas ataꞌgay a lalaman moyon diri dyan si gan-gan ta manꞌusgawan moyan kusto o abas. 12 Si Dios tamoꞌ a namataoy konan gan-gan. Kanyaꞌ nin sya tamoꞌ a magwaꞌ nin mangeteg. Sya tamoꞌ a makapanintinsya nin pakaisalba tan pakasidaꞌ tamo. Kanyaꞌ nin siꞌno kan mangeteg sa kapada mon tawo ey?
Pannuduꞌyag konran Magpya sa Kadiryan ra tan saray Mayaman
13 Sawanin, rumngeꞌ kamo, siꞌkamon magꞌirgon wamoyo, “Sitin awro o dilap, mako kami konan sitin syudad; ket itaw kamin sayay taon, magkumirsyo kamidtaw ta pigaw nin makaꞌkit kamin abaw a kwarta.” 14 Kai moyo nin tandaꞌ no ani a mangyadiꞌ komoyo sa awron adapen. Kai tamo nin magaꞌgetan a byay tamo ta kapada a alupaop. Maꞌkit sawanin, baleꞌ amboꞌ nin maꞌteng ket maandipat ana. 15 Kanyaꞌ nin sayti a manepeg nin ibaritaꞌ moyo, “No iyaburoy nan Dios ket umanroy byay mi, maituloy miti nin gagara.” 16 Baleꞌ amboꞌ nin wanin a man-gawꞌen moyo no kai edet, marangas tan mampimaung-maong kamo. Sain a pimaung-maong moyo, dukaꞌ!
17 Kanyaꞌ anaod nin, siꞌnuman a makatandaꞌ nin mabistan gawꞌen na, baleꞌ kai nayti nin gawꞌen, mampagkasalanan ya konan Dios.