Say Pagdadangkaꞌ sa Pagꞌiirgo
3
Bubsat sa ngaran na ni Cristo, andiꞌ kumon nin masulit a kaꞌbawan komoyo nin magꞌin mangangakay nin minsahi nan Dios ta tandaꞌ tamon siꞌkamin mangangakay ket maipadar kami liꞌ sa pinasyan byat a paninintinsya dyan saray iyakay mi.2 Ket sarba tamoynaod ket makagwaꞌ nin nagsikabarang nin kukasalanan. Si kai nin magkasalanan banaꞌ sa saritaꞌ na ket bukod nay kasan pakabalawan. Banaꞌ ta marindawan nayay dilaꞌ na, kanyaꞌ nin wanin anamaet sa intiron lalaman nan diri. 3 No mapatulok tamoyay kabayo, banaꞌ tamoꞌ sa pangikwa nin busal sa bebey na ket maipatyoꞌ tamo ngaꞌmin a kimey na. 4 Kiten mosara anamaet a bapor. Abirno aninay kaalakyan ra tan abirno nin maksaw yay sungsong, mataman no si ugit ket daikleng ya tamoꞌ nin parti ra, ket mabring nayay bapor sa adtiman a diriksyon a rabay nan mangngulin. 5 Wanin na anamaet nin dilaꞌ tamo. Daikleng ya tamoꞌ, baleꞌ mairangas nan marindawan a intiron kabibyay nin tawo.
Isipen moyo tanan si daiteꞌ tamoꞌ nin baya ket mapangibwatan yan alakin puor sa tatalon! 6 Si dilaꞌ maipada ya sa puor. Syay piikapan nin kadukaan. Saya yan parti nin lalaman tamo baleꞌ sidaen nay intiron kinatawo tamo. Say duta na mangibwat sa impyirno ket mangawit sa pakasidaꞌ nin intiron kabibyay tamo.a
7 Abirno mapaamoꞌ tan napaamoꞌ nasaraynan tawo a sarban klasin atap a uayep tan manuk-manok tan saray uayep a kumayam sa lutaꞌ tan tumangoy sa taaw, 8 baleꞌ kasan siꞌnuman a makapamatulok konan dilaꞌ na. Manidaꞌ yan pirmin nakasadyaꞌ nin mangitayak nin mabayanin samal na. 9 Usaren tamoyay dilaꞌ sa pangrarayo tamo konan Ama a Uunuren tamo, tan usaren tamoya et lamang nin pagsari-saritaꞌ sa kapada tamon tawon naparsan kabakas-bakas nan Dios. 10 Bubsat ko, amboꞌ nin manepeg nin mangyadiꞌ a wanti a pangrarayo tan pagsari-saritaꞌ nin mangibwat sa sayan-sayay bebey. 11 No wanti, baraꞌmon umagos a matabꞌang tan maꞌsin nin ranom sa sayan-sayay subor. 12 Bubsat ko, si kayon igos kai ya gumungan olibo, o si ubas kai ya gumungan igos. Wanin anamaet, si maꞌsin a subor, kai ya magwaꞌ liwaan nin matabꞌang a ranom.
Say Kadunungan a Gumungan Kinamapteg
13 Siꞌnuman a madunong tan makataros komoyo, matkap nin ipaꞌkit a tutuoyti nin say kabibyay na, yupaꞌ sa matunong a gawaꞌ nan siaayupaꞌ a pakaꞌkitan nin kadunungan a iti kona. 14 Baleꞌ no sa nakem moyo ket main nin mapait nin imon tan masiblet a apes, andiꞌ moyo nin irangas a madunong kamo. No gawꞌen moyo in, mibulaꞌ-bulaꞌ kamo tan kai moyo manꞌalilbien a katutuꞌwan nin nangibwat konan Dios. 15 Amboꞌ in nin klasi a kadunungan nan Dios. Sain ket mangibwat sa kaisipan nin tawo tan kaririktan nin lalaman tan mangibwat konan dimunyo 16 ta adtiman nin mampiikap sa tawo a imon tan masiblet a apes, itaw main nin kai pidudunong tan sarbaynan kadukaan.
17 Baleꞌ say kadunungan a mangibwat konan Dios, amboꞌ nin wanin. Si tawon main nin kadunungan a nangibwat konan Dios, muꞌna-muꞌna, malinis a pinanakem na, ket mammituno ya, mapangabot ya konran kapada nan tawo tan mainumꞌay yan katarusan, rumngeꞌ ya sa pangipapalaway, napnoꞌ ya nin ingangaꞌdo tan mabistan gawaꞌ, kai ya nin magꞌaleng-aleng tan kai ya nin mikanu-kano. 18 Kanyaꞌ anaod nin say pitutuno ket bilang nin bikoy. Imula ran saray mammituno ket say bunga, say mapteg nin gugawaꞌ.