Konran Kapada kon
HEBREO
nin Piniliꞌ nan Dios
Say Maipaꞌkaꞌ konan Sitin Surat
Sitin surat konran Judio nin mantumumbok kona ni Jesus, kai nin tandaꞌ no siꞌnoy nanurat. Si gagara a sinurat ya ket ta pigaw nin mapagsen a nakem ra maipaꞌkaꞌ sa pammemper ra. Banaꞌ ta manꞌumabaw nin kasan tegen a idap, dandani rayna nin pauryan a pammemper ra kona ni Cristo ket sumubliꞌ sarayna sa rilihyon ran Judio. Iti konan sitin surat mampauꞌnawan nasaradti nin miꞌnem nin parso maipaꞌkaꞌ sa panunusa nan Dios konran mamauryan sa pammemper ra kona ni Jesus (2:1-4; 3:7-19; 4:11-13; 5:11–6:12; 10:26-39; 12:25-29). Liwaliwawen nasara anamaet yupaꞌ sa pangingipada na konra konran puon ra nin madaer sara sa pagmamatalek ra konan Dios (10:39–12:3). Mampagsenen nan nanurat a nakem ra yupaꞌ sa pangingipatandaꞌ na nin say maipaꞌkaꞌ sa sangkataꞌgayan a kapapaꞌsar nan si syay Anak nan Dios.
Nipapalaway nayti e nin tulon bubagay a maipaꞌkaꞌ kona ni Jesus:
Si primiro ket, sya a Anak nan Dios nin kasan taranaꞌ tan kasan anggawan. Naadal na a katutulok konan Dios sin nangirangep yan dyaꞌdyaꞌ, ket banaꞌ sa sain tan banaꞌ ta syay Anak nan Dios, mas ataꞌgay yan adayoꞌ dyan saray prupita tan si Moises, tan wanin et konran uanghil.
Ikarwa, say ginwaꞌ na ni Jesus ket mas mablin adayoꞌ dyan say man-gawꞌen ran pupadiꞌ ran Judio, kanyaꞌ nin sya a sinmili konra ta iꞌdeng nasaran anggan-angga a tutawo konan Dios.
Ikatlo, banaꞌ kona, nilaꞌpos a pangingisalba konran tutawo banaꞌ ta sya a maikanaꞌ nin mangwaꞌ nin matukid a kaugalian ran Judio tan say gagara nin pangingidaꞌton nin uayep konan Dios.
Anaod, si nanurat, nibaritaꞌ nay maipaꞌkaꞌ sa sain ta pigaw nin saray makabasa konan siti ket, magꞌin nin maꞌget a pammemper ra kona ni Jesus, mataman nin sabtan anan tuloy nin pakapai-paidap ra. Sa suyot a parti nan surat, binibilin nasaran maong ta pigaw nin kai sara nin kumadayoꞌ konan Dios no kai edet, magkabyay saran mamaririket kona.
Say Linaman nan Sitin Surat
Sangkataꞌgayan ya si Cristo (1:1–10:18)
Nikiirgo yay Dios kontamo nin naipadalan na konan si saya a kapadan-kapada na (1:1-4)
Mas ataꞌgay ya anaod si Jesus dyan saray uanghil (1:5–2:18)
Si Moises, tagasirbi ya; Si Jesus, anak ya (3:1–4:13)
Say nikapadiꞌ na ni Cristo, mas ataꞌgay dyan say nikapadiꞌ nin naipatukdoꞌ sa Gugan-gan (4:14–7:28)
Nipagamet ya kona ni Jesus a mas mabistan nitarato (8:1-13)
Nikaꞌ naya ni Jesus a mas mabistan daꞌton (9:1–10:18)
Idengan moyoy magkabyay nin maikanaꞌ konan Dios (10:19–13:19)
Dumaer nin milalo sa nipangakoꞌ nan Dios (10:19–12:3)
Say idap nin irangep nan sayay tawo nan Dios ket nigagaran mangipatunong kona (12:4-10)
Parmawen moyo a magkabyay nin bilang sa pagkabyay nan Dios (12:11-29)
Say gugawaꞌ nin maikanaꞌ sa adapan nan Dios (13:1-19)
Bindisyon tan masusuyot nin pangingigalang (13:20-25)