Konran Kapada kon
HEBREO
nin Piniliꞌ nan Dios
Nikiirgo yay Dios kontamo Yupaꞌ konan Sya a Anak na
1
Sin saytaw sin nuꞌna, si Dios, nangusar yan nagsikabarang nin padalan sa naduma-duman panaon ta pigaw nin nikiirgo ya konran pupuon tamo. Niyusar nasaray prupita na sa nipangwaꞌ na nin wanin. 2 Baleꞌ sa siti nin susuyot nin panaon, si nangipadalanan nan Dios nin kiirgo kontamo ket, anak naya. Yupaꞌ konan sitin anak na, nagwaꞌ nan Dios nin pinarsa a sarba ngaꞌmin tan ipaikon na et kona a sarba ngaꞌmin. 3 Syay pakaꞌkitan nin kataꞌgayan nan Dios tan pinakarupa nayan Dios banaꞌ ta no ani yay Dios, wanin ya anamaet. Mangibwat sa pakayadiꞌ nin irgo na tamoꞌ nin sitin anak na ket, mauksoy nayna a sarba. Sin nailaꞌpos nayna a gawaꞌ na ta pigaw nin ringgasan natamo sa kukasalanan tamo, tinmekreꞌ ya nin itaw ya sa pawanan nan Dios nin Sangkataꞌgayan itaw sa langit,a 4 ket pinagꞌin yan mas ataꞌgayb dyan saray uanghil. Kapada a mas ataꞌgay ya dyan saray uanghil, si titulo a nibi nan Dios kona ket mas ataꞌgay ya dyan say titulo ran uanghil.Mas Ataꞌgay ya anaod tin Anak nan Dios Dyan saray Uanghil
5 Wanin ta kasa gapo nin anghil a namaritaan nan Dios nin wana,
“Siꞌka, anak kata.
Oꞌ, sawanin, pinaꞌget koy nipanuyoꞌ ko komo.”c
Kai na anamaet nibaritaꞌ nin Dios sa sayay anghil,
“Siꞌta, mitraama ata.”d
6 Anaod, sin panaon anamaet nin nibakiꞌ nayadti sa lutaꞌ a sya mansabtan yan Kakae, wanan Dios,
“Matkap a raywen raya nin sarba ran uanghil ko.”f
7 Ibaritaꞌ na nin Dios maipaꞌkaꞌ konran uanghil na a wana,
“Ibabakiꞌ kosara ket
magwaꞌ kosaran ibakiꞌ sa naduma-duman padalan
bilang wadiꞌ, siri o apoy sara.”g
8 Baleꞌ maipaꞌkaꞌ konan Anak na, wanan Dios,
“O Dios, magꞌadiꞌ kan kasan anggawan
tan say pagꞌuuray mo ket matuꞌrir.
9 Kaririktan moy mapteg a gawaꞌ-gawaꞌ tan guraꞌ moy dukaꞌ.
Ket banaꞌ ta wanin, siꞌko nin si Dios mo, tinudoꞌ katan magꞌin nin ataꞌgay sa sarba
tan ginwaꞌ katan mas maririket dyan saray kalalamoꞌ mo.”h.
10 Wana et nin Dios,
“Siꞌka, Uunuren, pinarsa may mundo sin taranaꞌ
tan mataman nin say langit ket gawaꞌ nin gamet mo.
11 Sarban sain nin pinarsa mo, makasa,
baleꞌ siꞌka, main ka anggan-angga.
Sain say pinarsa mo, umran nin kapada nin seket
12 ket kapadan panglusꞌok mon manilin aysing,
galten tan silyan mo in.
Baleꞌ siꞌka, amboꞌ kan wanin;
kasan pangumanan mo tan kasan anggawan mo.”i.
13 Kasa gapon lamang ni saya nin anghil a namaritaan nan Dios nin sayti e a nibaritaꞌ na konan Anak na:
“Tumekreꞌ kadti sa pawanan ko
legꞌan a sarba ran kuntra komo ket,
pasukuen kosaran liso sa adapan mo.”j
14 Siꞌno sarayti anaod saray uanghil? Ispirito sarayti ngaꞌmin nin mampagsirbi konan Dios ket, ibakiꞌ nasara nin tumulong konran tutawon maisalba.