Dalepdepen Moyoy Maipaꞌkaꞌ sa Nikaisalba moyo
2
Banaꞌ anaod ta wanin anay kataꞌgayan nan Anak nan Dios, kanyaꞌ nin matkap a amingawen tamon maong a maipaꞌkaꞌ kona nin niyakay kontamo ta pigaw nin kai atamo nin matawtaw.2 Anaod, say Gugan-gan a nipataoy yupaꞌ konran uanghila ket matkap talagan tukiden ket, si siꞌnuman a sinmubag, dinusa yan manepeg sa barang nipanubag na. 3 Ay ket, madusa atamon mas mabyat nin adayoꞌ no gurutan tamo a pinasyan andaꞌ a nikaisalba tamo nin ginwaꞌ nan Anak; kai tamo gapo nin mapalꞌisan in.b Si Uunuren tamo nin diri nin si Jesus a nuꞌnan nangibaritaꞌ nin maipaꞌkaꞌ sa pangingisalba na kontamo ket saray nakarngeꞌ kona, nipatandaan ra anamaet kontamo tan tinistigusan ray katutuꞌwan. 4 Si Dios anamaet, pinatutuꞌwan nay nipatandaꞌ ra yupaꞌ sa man-gawꞌen nan makapakaꞌngap nin pakatandaan a nangibwat kona tan nagsikabarang a mumilagro, tan yupaꞌ sa nipuyaꞌ na konra nin niduma-duman pakababaꞌ a mangibwat konan Ispirito na, dipindi no siꞌnoy napiliꞌ nan puyaan.
Si Jesus, syay Bida tamo
5 Matkap tamo et anamaet nin amingawen in nin maipaꞌkaꞌ kona ta konan nadundon liꞌ nin sangkamundwan a manꞌibaritaꞌ ko, amboꞌ nin saray uanghil a piniliꞌ nan Dios nin mangaꞌget liꞌ no kai saray tutawo, 6 ta main nin partin Masanton Kasuratan nin wanti ey mabasadtaw,
“O Dios, ani ket a tawo? Basta tawo sara
baleꞌ mapanemtem mosara tanan pirmi
tan pagawan mosara!
7 Nikwa mosara et sa butang nin ayupaꞌ dyan saray uanghil sa anted a panaon,
ket a lamang ginun-gunawan mosara nin pakayadiꞌ
tan kagalangan a baraꞌmon sayay adiꞌ,c
8 ta nikwa mo a sarban bubagay sa pakauray ra.”d.
Ket banaꞌ ta nikwa nan Dios a sarban bubagay sa pakauray nin tawo, maꞌkit tamo edet a kasa liꞌ gapo nin animan nin amboꞌ nin iti sa pakauray nin tawo.
Wanin man, sawanin nin panaon, say sarba ket amboꞌ et nin talagan iti sa pakauray nin tawo. 9 Mataman baleꞌ nin wanin, maꞌkit tamo nin iti yayna sa uꞌna tamo si Jesus! Nikwa nayan Dios sa “butang nin ayupaꞌ dyan saray uanghil sa anted a panaon” sin nagꞌin yan tawo ket, banaꞌ sa nipati na, ginun-gunawan nayaynan “pakayadiꞌ tan kagalangan nin baraꞌmon sayay adiꞌ.” Banaꞌ sa kamaungan nan Dios, pinati ya si Jesus ta pigaw nin awiten nay dusan patiti nin barang sayay tawo.
10 Oꞌ, pinarsa na a sarba nin Dios tan say sarba ket para kona ket, nigagara na a ikaꞌ nasara sa pinasyan andaꞌ nin Pagꞌadian na, saray abaw a mantawagen nan aꞌnak na. Edet, maibagay a yupaꞌ sa nipangirangep na nin dyaꞌdyaꞌ ni Jesus nin kapadan pangirangep ra, ket ginwaꞌ nayan Dios nin maikanaꞌ nin peteg nin syay Bida ran saray naisalba.
11 Maibagay a nangirangep yan dyaꞌdyaꞌ ta, syan si Jesus nin mampangitalaga konran tawo konan Dios, tan saran manꞌitalaga na ket sayan-saya a parihon pamilya ra. Ket, banaꞌ ta wanin, kai na idingꞌey a tawagen natamon bubsat na. 12 Wanti e nin nibaritaꞌ na,
“Ipatandaan ko konran bubsat ko a maipaꞌkaꞌ komo, O Dios,
tan sa busel mi nin sarban mangrayo komo, mangansyon akon pangrarayo komo.”e
13 Wana et anamaet,
“Siꞌko, mampagmatalek ako konan Dios.”f
Wana et,
“Iti kami nin saray aꞌnak nan Dios a nipya na kongko.”g
14 Banaꞌ ta saraytin aꞌnak nin mantukuyen na ket tawo sara nin naiketeg nin mati a lalaman ra, si Jesus anamaet ket nagꞌin yan tawo nin mati anamaet. Ket dinalanan nay patiti ta pigaw nin mangibwat sa patiti na ket, madaeg nayay Dimunyo a syay mampagꞌuray konran saray naiketeg nin mati. 15 Nati ya anaod ta pigaw anamaet nin maglat nasara sa paꞌsar nikaigalot ra sa liꞌmo sa patiti leleg raynan nabyay.
16 Anaod, tandaꞌ tamo a amboꞌ nin saray uanghil a nigagara nan tulungan, no kai saray tawon maikwintan puri na ni Abraham.h 17 Banaꞌ konan siin nin rason a pinangirangep nayan Dios si Jesus nin say sarban dalanan tamo nin siꞌtamon tawon bubsat na. Matkap a wanin ta pigaw nin magꞌin yan si Sangkataꞌgayan nin Padiꞌ tamoi a makakiingar ya kontamo, tan maipaꞌkit a mailalwan ya sa bubagay maipaꞌkaꞌ konan Dios, tan ta pigaw nin maariglo nay kukasalanan ran saray tutawo na. 18 Tandaꞌ tamo anaod a manepeg a pinangirangep yan wanin ta, banaꞌ ta dinalanan nayna a nangirangep nin idap nin tinukso, mababaꞌ nasara anamaet nin tulungan a mantukswen.