Si Moises, Tagasirbi ya; Si Jesus, Anak ya
3
Banaꞌ anaod sa sain, siꞌkamo bubsat nin ikon nan Dios banaꞌ ta makakiramaꞌ kamo sa nipanagyat na mangibwat sa langit, adalen moyoy maipaꞌkaꞌ konan si manꞌipatandaan tamon Sangkataꞌgayan nin Padiꞌ tan Ibabakiꞌa nan Dios kontamo maipaꞌkaꞌ sa pammemper tamo, sya si Jesus. 2 Maruros a nakem nan tinmulok sa nipagwaꞌ nan Dios a syay nanudoꞌ kona, kapada a si Moises ket maruros a nakem nan tinmulok sa nipagwaꞌ nan Dios kona sin saytaw maipaꞌkaꞌ konran paꞌsar pammali nan Dios nin nipagamet nan Dios kona. 3 Baleꞌ si Jesus, mas maikanaꞌ ya sa alaki nin kagalangan dyan si Moises, nin kapada a si namaꞌdeng nin sayay bali ket mas maikanaꞌ ya sa alakin kagalangan dyan si balin nipaꞌdeng na 4 ta no main nin nipaꞌdeng, main nin nangipaꞌdeng.Sawanin, si Dios a nangwaꞌ sa sarba ngaꞌmin. 5 Ket si Moises, mailalwan yan tagasirbi sa sarban iti sa paꞌsar pammali nan Dios. Nami yaynan pauꞌna sa ipatandaan na liꞌ nin Dios. 6 Si Cristo, mailalwan yan lamang sa paꞌsar pammali nan Dios. Baleꞌ syay Anak a nipagamet nan Dios kona a paꞌsar pammali na tan sitin paꞌsar pammali na ket siꞌtamo dapot no dumaer atamon mampilalo kona tan sa siririket nin pananaꞌgan tamo sa sarban nipangakoꞌ na ni Cristo kontamo.
Pakandaꞌ nin Andiꞌ nin Gurutan a Niyuprisi nin Pakapainawa
7 Banaꞌ sa sain, pakandaꞌ kamo ta wanti e a wanan Ispirito nan Dios,
“Sawanin ana, rengꞌen moyoytin wanan Dios!
8 Andiꞌ nin matibꞌey a ulo moyo nin bilang konran pupuon moyo a kinuntra rako,
a bilang sin sinubok rako sin itaw sara sa lugar a kasan tawo.
9 Mataman nin sa leleg nin aꞌpat a puloꞌ a taon ket naꞌkit ray mumilagro nin ginwa-ginwaꞌ ko,
sinubuk-subok rako et.b
10 Ket banaꞌ ta wanin, pinasyan sager ko konran sarayti
ket wangko, ‘Say tikapen ra ket say mangibarang tanan pirmi
tan kai ra gapo nin adalen no ani a karabayan ko para konra.’
11 Ket sa sager ko, nisamba ko a wangko,
‘Kai sara gapo nin kiramaꞌ sa pakapainawa nin nisadyaꞌ ko.’ ”c
12 Bubsat, pakandaꞌ kamo a kasadsen komoyo nin dukaꞌ a pinanakem nan kai mamper ket banaꞌ sa sain, gurutan nayay Dios a sibibyay. 13 Anaod, mintras a main et nin panaon, lawas tamon paksawen a nakem nin saya tan saya ta pigaw nin kasa ni saya kumon a matibꞌey a ulo na nin kisyay ya banaꞌ ta naitawtaw ya nin sain say amboꞌ nin matunong sa pangingikit nan Dios. 14 Oꞌ a ta kiramaꞌ atamo sa sarba nin iti kona ni Cristo dapot no dumaer atamo sa say nakaipatukduan nin puon nin pangingilalo tamo kona. 15 Matkap tamo a dumaer leleg nin maibaritaꞌ na et nin Ispirito nan Dios a,
“Sawanin ana, rengꞌen moyoy wanan Dios!
Andiꞌ nin matibꞌey a ulo moyo nin bilang konran pupuon moyo a kinuntra rako.”
16 Pakandaꞌ kamo anaod ta, siꞌno sarayti konran saray pupuon tamo a abirno nin narngeꞌ raynay busis nan Dios ket kinuntra raya et a lamang? Kasa anaod nin raruma no kai saraytaw saray nilakwan nan nipalꞌis ni Moises sa Egipto. 17 Siꞌno sarain anamaet saray si Dios ket masager ya konra sa leleg nin aꞌpat a puloꞌ a taon? Saraytaw nin lamang. Nagkasalanan sara konan Dios, kanyaꞌ nin dinusa nasara tan nati-nati saradtaw sa lugar a kasan tawo. 18 Siꞌno sara et a nisamba na nin Dios sin sa sager na ket wana, “Kai sara gapo nin kiramaꞌ sa pakapainawa nin nisadyaꞌ ko”? Kasa anaod nin raruma no kai saray kai nin tinmulok kona.
19 Maꞌkit tamo edet sa sain nin nangyadiꞌ a kai ra nin nagaꞌmuran a pakapainawa nin nisadyaꞌ na para konra banaꞌ ta kai sara nin namper kona.