4
Edet, si pangakoꞌ nan Dios a main ana nin pakapainawa nin nisadyaꞌ na nin kiramaan tamo ket main ya et. Ket banaꞌ ta wanin, pakandaen tamo a kasa ni saya kontamo a kai et nin mangkiramaꞌ ana sa sain, 2 ta siꞌtamo, narngeꞌ tamoya anamaet a Mabistan Patandaꞌ nin kapada a narngeꞌ rayan pupuon tamo sin nuꞌnan panaon. Baleꞌ sitaw nin narngeꞌ ra ket kasan nagꞌin nin kakanaan na konra banaꞌ ta sin narngeꞌ raya ket kai raya nin timper. 3 Anaod, mangibwat sa pagmamatalek tamo ket makakiramaꞌ atamo ta kai sara nin nakakiramaꞌ taw saray kai nin namper, banaꞌ ta wanti ey wanan Dios maipaꞌkaꞌ konra,“Sa sager ko, nisamba ko a wangko,
‘Kai sara gapo nin kiramaꞌ sa pakapainawa nin nisadyaꞌ ko.’a ”
Say tutuo ket, kai sara nin kiramaꞌ mataman no naisadyaꞌ anan gindat ti a pakapainawa nangibwat et sin naparsa nayna nin Dios a sarba. 4 Tandaꞌ tamo a naisadyaꞌ in ta main nin mabasa tamo sa Masanton Kasuratan maipaꞌkaꞌ konan ikapiton awro a wana,
“Sin ikapiton awro, si Dios, pinainawa ya banaꞌ ta nayadiꞌ nayna a gawaꞌ na.”b
5 Umanen koyay nibaritaꞌ nan Dios a wana,
“Kai sara gapo nin kiramaꞌ sa pakapainawa nin nisadyaꞌ ko.”
6 Ket maꞌkit tamo sa sain a main nin nisadyaꞌ nan pakapainawa nin Dios tan nigagara na a main nin kiramaꞌ. Saraytaw baleꞌ saray nuꞌnan nakarngeꞌ konan siin a mabistan patandaꞌ, kai nasara nin inaburuyan nin Dios nin kiramaꞌ itaw banaꞌ ta kai sara nin tinmulok kona. 7 Ket, nangitalaga ya anamanaet a Dios nin saya nin awro, a siti ket sawanin ana. Anaod, sin napalabas anay anron panaon nangibwat sin kai sara nin nakakiramaꞌ sa sain nin pakapainawa, si Dios, tininreg naya si Adiꞌ David ket wana nin naibaritaꞌ koyna,
“Sawanin ana, rengꞌen moyoy wanan Dios!
Andiꞌ nin matibꞌey a ulo moyo.”c.
8 Mantumuloy ya et edet a pangakoꞌ nan Dios ta, no sitaw si lugar a nangikaan ni Josued konran pupuon tamo ket syaynaytaw a peteg nin pakapainawa a nisadyaꞌ nan Dios para konra, kai yayna kumon nangitalaga a Dios nin saya anamanaet nin awro a saray tutawo ket makakiramaꞌ sara. 9 Ket ta wanin anaod, main in et nin naiduman pakapainawa nin nisadyaꞌ nan Dios para konran tawo na. 10 Anaod, si siꞌnuman a mangkiramaꞌ ana sa sitin pakapainawa nin nisadyaꞌ nan Dios, mampainawa yayna anamaet mangibwat sa gugawaꞌ nan dirie kapada a si Dios ket nipainawa yayna ta nakumplito nayna a gawaꞌ na.
11 Siꞌtamo edet, asikaswen tamon maong a kiramaꞌ atamo sa pakapainawa nin nisadyaꞌ nan Dios para kontamo, ta pigaw nin kasa ni saya kontamo a miugot sa pakasidaꞌ nin bilang konran saraytaw saray pupuon tamo a kai nin tinmulok sa nibaritaꞌ nan Dios konra. 12 Gawꞌen tamo in banaꞌ ta say irgo nan Dios ket mabyay nin makapangyayadiꞌ tan main nin magwaꞌ. Mas makagwaꞌ dyan si sayay daga nin midmang a tadem na. Sumulpot a irgo nan Dios sa sangkaararman nan kararwa tan kanakman nan tawo tan masukisok na mataman et say sangkaadiwan ana nin manꞌisipen tan manꞌapesen tamo. 13 Kasaynaod nin maiyadi nin animan konan Dios, nin siꞌnuman. Sarba ngaꞌmin, nakapadar sa pangingikit na, tan kona, kikwintawan atamo sa sarba.
Si Sangkataꞌgayan nin Padiꞌ tamo, si Anak nan Dios
14 Anaod banaꞌ ta nakapadar atamo konan Dios, bubsat, tumarigꞌen atamon iti konan si manꞌipatutuo tamo. Pakatarigꞌen atamo anaod banaꞌ ta main nin Sangkataꞌgayan nin Padiꞌ tamon naiduman adayoꞌ, ta linmuob yan itaw sa adapan nan Dios sa langit, tan siti ket si Jesus nin Anak nan Dios. 15 Pakatarigꞌen atamo et ta siti nin Sangkataꞌgayan nin Padiꞌ tamon si Jesus, makataros ya tan makakiingar ya kontamo sa kakapuyan tamo banaꞌ ta nadalanan na a tinukso sa sarban padalan, kapada a matukso atamo anamaet. Wanin man, sya, kai ya gapo natukson nakagwaꞌ nin kasalanan. 16 Edet, kumadani atamo nin siiilalo konan Dios a syay subor nin sarban ingangaꞌdo ta pigaw nin ingangaꞌdwen tan tulungan natamo sa udas nin pakatkapan tamo.