5
Saray napiliꞌ nin Sangkataꞌgayan nin Padiꞌ ran Judio, tinudoꞌ sara nin mangiꞌdeng konran tutawo konan Dios. Trabaho ray mangiprisintan rurigalo ran tutawo konan Dios tan dudaꞌton para sa kukasalanan ra. Tawo ya tamoꞌ a sayay padiꞌ 2 nin makagwaꞌ yan abas, kanyaꞌ nin mapangabot yaynamaet konran kapada nan tutawo nin nalingo banaꞌ ta kurang a pakatandaꞌ ra. 3 Ket banaꞌ anaod ta malingo ya anamaet a lamang, matkap nay mangiprisinta nin daꞌton para sa pakapirduna nin kukasalanan nan diri bilang anamaet a lamang sa pangiprisinta nan daꞌton para konran tutawo. 4 Bilang tandaꞌ tamo, kasan siꞌnuman a magꞌin nin Sangkataꞌgayan nin Padiꞌ sa karabayan nan bukod, no kai edet, matkap a piniliꞌ nayan Dios nin makakalap konan sitin ataꞌgay nin butang a bilang sin piniliꞌ naya si Aarona.5 Wanin a lamang anamaet, si Cristo, kai na nin nipataꞌgay a lalaman na nin diri nin magꞌin nin Sangkataꞌgayan nin Padiꞌ no kai edet, si Dios a nanudoꞌ kona ta wanan Dios kona,
“Siꞌka, anak kata.
Oꞌ, sawanin, pinaꞌget koy nipanuyoꞌ ko komo.”b
6 Wana et nin Dios a mabasan lamang sa Masanton Kasuratan,
“Siꞌka, magnayon ka nin padiꞌ anggan-angga a
say nikapadiꞌ mo ket kapadan nikapadiꞌ na ni Melquisedecc.”
7 Sin iti ya et nin mampagkabyay sa lutaꞌ si Jesus, inmakis yan dinmasal tan inmayꞌay konan Dios nin makababaꞌ nin mangiligyas kona sa patiti. Banaꞌ sa masulit nin karabayan nan tumulok ni Jesus kona, nangrengeꞌ yay Dios sa dasal na 8 ket naadal nay pipaꞌkaan nin katutulok mangibwat sa nipangitpel na nin dyaꞌdyaꞌ nin dinalanan na mataman no Anak nayan Dios. 9 Ket sin naadal naynan maong, nagꞌin syay Puon nin Anggan-anggan Pakaisalba ran sarba ran tumulok kona. 10 Wanin banaꞌ ta si Dios, tinudoꞌ nayan Sangkataꞌgayan nin Padiꞌ nin kapadan nikapadiꞌ na ni Melquisedec.
Suetan moyon Magaꞌmuran a Manꞌilalwan tamo
11 Abaw et a rabay kon ipatandaan komoyo maipaꞌkaꞌ konan siin, baleꞌ maidap kon magwaꞌ banaꞌ ta matamlad kamon manaros. 12 Naꞌteng kamoynan mammemper ket, sa eteng ana, makaiyakay kamoyna kumon nin raruma, baleꞌ kai, ta anggan sawanin, matkap et nin iyakay komoyo a panaranaan nin adalend sa nibaritaꞌ nan Dios. Baraꞌmon mamaanunor kamo nin paꞌsar gatasen kamo anaet imbis nin mampangan kamoynan matibꞌey nin kanen. 13 Anaod, si sayay paꞌsar gatasen et sa pammemper, kai na et nin napasal nin pibarawesen no ani a mapteg tan abas. 14 Baleꞌ saray mangatuntawoyna sa pammemper, makataros sarayna nin kukatutuꞌwan a paꞌsar matibꞌey nin kanen, ta naparmaw sarayna ket mapibarawes raynay matunong tan dukaꞌ.