6
Ket, matkap a umarunsa atamoyna nin magꞌin anan manakem sa pammemper. Andiꞌ tamo anamana nin umanen a panaranaan nin pagꞌaadal tamo maipaꞌkaꞌ sa byay tamo a iti kona ni Cristo. Kai mi ana anaod kumon nin matkap nin sublien nin ipapalaway a bubagay a naiyakay ana komoyo a bilang say pangungurot tamo sa gawaꞌ-gawaꞌ nin kasan kakanaan sa pangingikit nan Dios tan say maipaꞌkaꞌ sa pagmamatalek tamo kona 2 tan say maipaꞌkaꞌ sa pakaparinggas, say pangrisibi konan Ispirito na, say isusubliꞌ ran mabyay nin nunati tan say paninintinsya na liꞌ nin Dios nin pakadusa anggan-angga.3 Sawanin, umarunsa atamoynaod ana! Baleꞌ pakandaen moyo. Bangliꞌ no kai na nin aburuyan nin Dios 4 ta kasayna gapon magwaꞌ nin rimidyo ta pigaw nin mapagbabawiꞌ sara anamanaet a saray wanti e:
Alimbawaꞌ ket main nin tutawo nin napalawayan nayna nin Dios a kanakman ra maipaꞌkaꞌ kona ni Jesu-Cristo ket, nasariꞌ raynay kaabigan a mangibwat konan si rigalo na nangibwat sa langit tan, katagem rayaynay Ispirito nan Dios tan, 5 mangkasariꞌ raynay mabistan nipangakoꞌ nan Dios tan say pakayadiꞌ na nin maipadar liꞌ nin liso no marateꞌ a panaon. 6 Wanin man, ginurutan ra et a ginwaꞌ nan Dios. Ket, kasayna gapon rimidyon mapasubliꞌ sara anamanaet konan Dios ta baraꞌmon sinintinsyawan rayan diri anamanaet nin ipasak sa kudos a Anak nan Dios tan mambyan rasaray tutawo nin rason a tuyaꞌ-tuyaen raya.
7 Anaod, siꞌtamon tutawo, maiyarig atamo sa lutaꞌ a pirmin marapeg. Say bindisyon nan Dios, iti sa lutaꞌ nin abaw a prudukton makalap kona para konran saray mampangalilaꞌ 8 baleꞌ no sitin lutaꞌ ket tubuan ya tamoꞌ nin dikot tan didiwi, kasan sirbi na ket dandani yayna nin pauryan tana tan parisen.
9 Bubsat, mataman baleꞌ nin wanin a wangko, matalek ako a say kapapaꞌsar moyo no maipaꞌkaꞌ sa nikaisalba moyo ket mabista. 10 Anaod, mapteg yay Dios ket kai na nin lingwanan a pangangadoꞌ moyo tan say maabig a ginwa-ginwaꞌ moyo para kona a manꞌipaꞌkit moyo et anggan sawanin sa man-gawꞌen moyo para konran kapada moyon tutawo nan Dios. 11 Ket, rabayen min tuloy a, say barang saya komoyo ket ituluy-tuloy nay suet tan seseg na anggan rumateꞌ ya si Cristo ta pigaw nin magaꞌmuran moyo a sarban mabistan manꞌilalwan moyo. 12 Anaod, kai mi nin rabay a tumamlad kamo no kai edet, arigen moyo sarain saray maanos nin mampagmatalek konan Dios, ket banaꞌ ta wanin ra, gaꞌmuran ra liꞌ a nipangakoꞌ na nin Dios.
Sigurado a Nipangakoꞌ nan Dios
13 Alimbawaꞌ, sin nagpangakoꞌ yay Dios kona ni Abraham, nipatutuo na sa lalaman na nin diri a tukiden nay pangakoꞌ na ta kasaynan siꞌnuman nin ataꞌgay et nin magwaꞌ nan sambawan, 14 ket wana kona ni Abraham,
“Ipangakoꞌ ko nin bindisyunan kata anaod tan
gawꞌen kon pinasyan kaꞌbawan ra liꞌ nin puri mo.”a.
15 Edet, si Abraham, pinasyan anos nan tinmaꞌgan ket nagaꞌmuran nay nipangakoꞌ na nin Dios.b
16 Anamaet a lamang, si sayay tawo, no rabay nan paꞌgeten a animan nin pipapagket sa sayay pididimandawan, sumamba ya nin usaren nayay ngaran nan mas ataꞌgay dyan sya. Ket pibuknulen anaod nin samba a pipapagket. 17 Bilang sa wanin si Dios ket, sa karabayan na nin ipaꞌkit konran tutawo na nin nagpangakuan na a kasan dwadwa nin tukiden nay nipangakoꞌ na konra, sinmamba ya anamaet. 18 Oꞌ, rwan bagay a ginwaꞌ nan Dios, nagpangakoꞌ ya tan sinmamba ya nin tukiden nay nipangakoꞌ na. Kai nin manguman in ta kai nin magwaꞌ a mibulaꞌ-bulaꞌ yay Dios. Ginwaꞌ na in a rwa ta pigaw nin siꞌtamo nin nako nipaisalipneꞌ sa pangangampayaꞌ na, mapaririket atamon maong banaꞌ kona ta napagsen atamo sa pangingilalo tamo sa nipangakoꞌ na.
19 Bilang sayay pundo, siti nin pangingilalo tamo ket madaer tan paniguradwan ya sa byay tamo. Mangipunta yadtaw kontamo sa adapan na nin Dios sa rubariꞌ nan kurtinac sa Timplo sa langit 20 banaꞌ ta linmuob yaynadtaw si Jesus nin nuꞌna kontamo. Sawanin mangingisaꞌleꞌ yadtaw para kontamo ta Sangkataꞌgayan nin Padiꞌ tamoya anggan-angga nin kapadan nikapadiꞌ na ni Melquisedec.