Mas Ataꞌgay a Nikapadiꞌ na ni Cristo dyan ni Aaron
7
Anaod, siti si Melquisedec, adiꞌ ya intaw nin syudad nin Salem. Padiꞌ ya et nin nagsirbi konan Dios a Sangkataꞌgayan sa Sarba. Ket, sa niꞌsa nin nirarateꞌ ra ni Abraham nin ibat nikigira nin tinalo rasara a aꞌpat a uadiꞌ, si Melquisedec, sinnaꞌ naya ket binindisyunan naya si Abraham, 2 tan binyan naya anamaet ni Abraham nin kakapuloꞌ nin sarban nakalap na sa gira. Muꞌna-muꞌna, maimatunan tamo a pinangaranan yan “Adiꞌ a magꞌuray nin matunong” ta siin a katarusan nan si Melquisedec nin ngaran na. Ket adiꞌ ya et nin Salem a say rabay nin irgwen “Adiꞌ a mamagkamain nin katinekan.”a 3 Saya et, kasan mabasan pakatandaan maipaꞌkaꞌ konran ama tan ina na, o konran pupuon na, o sa tinmaranaan na tan sa nanganggawan na. Kanyaꞌ nin kapada nan Anak nan Dios, magnayon a padiꞌ ya anggan-angga.4 Kiten tamo tana no paꞌno na kataꞌgay ni Melquisedec!
Mismo nin si Abraham a tandaꞌ tamo nin sangkataꞌgayan nin puon tamo, ket nami ya kona nin kakapuloꞌ nin sarban nakalap na sa gira. 5 Anaod, sin saytaw, nigan-gan saray pupadiꞌ nin Judio a puri na ni Levi sa Gugan-gan a naibi kona ni Moises, a nangalap sara nin kakapuloꞌ nin sarban kayamanan ran sarba ran kapada ran Judio. Kinalapan rasara mataman no kapada rasara nin puri na anamaet a lamang ni Abraham. 6 Baleꞌ si Melquisedec, kuntra konra, amboꞌ naya nin puri ni Levi. Wanin man, nami ya kona si Abraham nin kakapuloꞌ.
Ket anamaet, si Melquisedec, binindisyunan naya a tawon dirin nagpangakuan naya anaod nin Dios, si Abraham. 7 Tandaꞌ baleꞌ nin kaꞌbawan a si mamindisyon ket mas ataꞌgay ya dyan si bindisyunan na.
8 Siti et e, saraytaw saray pupadiꞌ nin pupuri na ni Levi, nangalap saran kakapuloꞌ ket nati saran lamang, baleꞌ si Melquisedec, sa naibaritaꞌ maipaꞌkaꞌ kona a mabasa sa Masanton Kasuratan, mabyay ya et.
9 Anaet, si Levi, syay puon ra nin sarba ran pupadiꞌ nin Judio a nangalap nin kakapuloꞌ. Baleꞌ sin nami yan kakapuloꞌ si Abraham kona ni Melquisedec, maibaritaꞌ anan lamang a nami ya anamaet si Levi kona ni Melquisedec. 10 Maibaritaꞌ tamo nin wanin banaꞌ ta, sin nami yan kakapuloꞌ si Abraham kona ni Melquisedec, naisakop nayayna si Levi banaꞌ ta puri naya ni Abraham, mataman nin kai ya et nin naiyanak sin saytaw si Levi.
11 Sawanin, say nikapadiꞌ na ni Aaron a sya puri naya ni Levi, ket gawꞌen nin magkuri a Gugan-gan konran tutawo. Ket no mapapteg saray tutawo sa pangingikit nan Dios mangibwat sa nipagkuri nin Gugan-gan ran saraytaw nin pupadiꞌ, kai ana kumon matkap a main et nin sakalakon klasi sa nikapadiꞌ na ni Aaron. Baleꞌ matarusan a kai sara nin mapapteg ta mansabtan nan Dios a say nikapadiꞌ nan Uunuren tamo ket kapada nin nikapadiꞌ na ni Melquisedec.b 12 Anaod, no main nin nasilyan sa klasin nikapadiꞌ, matkap a main anamaet nin masilyan sa panumbukan maipaꞌkaꞌ sa sain. 13 Ket maꞌkit tamo a nasilyan ana a klasin nikapadiꞌ ta si Sangkataꞌgayan nin Padiꞌ a manꞌirgwen tamo ket amboꞌ nayan puri ni Levi, no kai nangibwat ya sa sakalakon puri. Konan siin nin puri ket kasa et gapo nin nagsirbi sa altar bilang padiꞌ ta 14 naisurat a, si Uunuren tamo, nangibwat ya sa puri na ni Juda. Ket kasa gapo nin naisurat sa Gugan-gan a nipataoy yupaꞌ kona ni Moises maipaꞌkaꞌ sa pagꞌin nin padiꞌ mangibwat sa puri na ni Juda.
15 Mas lalon mapalaway nin maꞌkit a nasubrayan anay kapapaꞌsar nin nikapadiꞌ tan Gugan-gan nin mantumbuken no mapanemtem tamo a main anan pinagꞌin nin padiꞌ a say nikapadiꞌ na ket kapadan nikapadiꞌ na ni Melquisedec. 16 Kai ya nagꞌin nin padiꞌ banaꞌ ta puri naya ni Levi a siin a panumbukan a nibi nin Gugan-gan, no kai edet, nagꞌin yan padiꞌ nangibwat sa pakayadiꞌ nin byay a kai nin madaeg nin patiti. 17 Wanin a wanan Dios kona nin mabasa tamo sa Masanton Kasuratan. Wana,
“Siꞌka, magnayon ka nin padiꞌ anggan-angga a
say nikapadiꞌ mo ket kapadan nikapadiꞌ na ni Melquisedec.”c
18 Anaod, ginlat ana a panumbukan sa nikapadiꞌ ran puri na ni Levi banaꞌ ta kai nin maiyarak a tutawo konan Dios. Kasan kaalagawan 19 banaꞌ ta kai atamo mapagꞌin nin mapteg sa pangingikit nan Dios. Ket banaꞌ ta wanin, si Dios, nangikwa yan sakalakon klasi nin nikapadiꞌ ket mas main nin ilalo tamo ta, konan siin nin klasin nikapadiꞌ, magwaꞌ tamoynay umarak sa adapan nan Dios.
20 Siti et e: Main nin nisamba na nin Dios sin pinagꞌin nayan padiꞌ si Jesus!
Sin pinagꞌin nasara nin pupadiꞌ taw saray pupuri na ni Levi ket kai ya nin sinmamba. 21 Baleꞌ anaod si Dios, sinmamba ya kona ni Jesus nin wana,
“Siꞌkon si Dios, isamba koyti ket kasan sapo nin mangyadiꞌ:
Siꞌka, magnayon ka nin padiꞌ anggan-angga.”d
22 Kanyaꞌ nin anggan sa sain nin punto ket ginwaꞌ naya si Jesus nin syay mampigaꞌget konan sitin baꞌyon nitaratoe na a mabista nin adayoꞌ dyan si gindat.
23 Saya et, abaw saray pupadiꞌ sa nuꞌna nin klasin nikapadiꞌ ta nasilya-silyan sara no nati yaynay saya. 24 Kuntra si Jesus, banaꞌ ta mabyay ya anggan-angga, kai nin matkap a kasilyan na nin padiꞌ. 25 Ket banaꞌ anaod ta wanin, maisalba nasaran lawas tan peteg a sarban tutawo nin banaꞌ sa pagmamatalek ra kona ket kumadani sara konan Dios. Wanin ta maisaꞌleꞌ nasara tanan pirmi konan Dios para sa tulong na konra banaꞌ ta mabyay ya anggan-angga.
26 Ket maꞌkit tamo a siin a klasin padiꞌ a maibagay para kontamo. Makapaririket ya konan Dios ta sin nagkabyay yan sayay tawodti sa lutaꞌ, kai ya gapo nin nagkasalanan, tan kasa gapo nin kadukaan nin iti kona. Kasa gapo nin nakairanudan na sa gawaꞌ-gawaꞌ nin tutawon makasalanan. Oꞌ, pinataꞌgay ya sa pagꞌin nan padiꞌ nin kasan kipada itaw sa langit. 27 Kai ya matkap nin nangiprisinta nin daꞌton nin inawru-awro bilang konran saray nuꞌnan Sangkataꞌgayan nin Padiꞌ. Nangidaꞌton sara, muꞌna para sa kukasalanan ran diri, miꞌsa para sa kukasalanan ran tutawo. Siti nin Sangkataꞌgayan nin Padiꞌ tamo, piniꞌsa-piꞌsa nayna a nipangiprisinta nin masadag nin daꞌton para kontamon tutawo sin nibi nan nidaꞌton a lalaman nan diri. 28 Anaod, saray nagꞌin nin Sangkataꞌgayan nin Padiꞌ nangibwat sa nibin panumbukan nin Gugan-gan, abaw a kakapuyan tan pagkurangan ra.
Baleꞌ sin nayadiꞌ ana nin naibi a Gugan-gan, si Dios, tinudoꞌ naya nin sinambawan na a gawꞌen nayan Sangkataꞌgayan nin Padiꞌ a saya a syay si Anak na. Sya, nasubok yayna ket masibulot nan nagwaꞌ ngaꞌmin a sarban pakatkapanf ta pigaw nin magsirbi ya lawas nin padiꞌ para konran tutawo na.