Nipagamet ya kona ni Jesus a Mas Mabistan Nitarato
8
Ket say sarban sain nin nibaritaꞌ ko komoyo, wanti e a rabay nin irgwen:Main anan Sangkataꞌgayan nin Padiꞌ tamo nin bilang sa manꞌibaritaꞌ mi. Sya, nakatekreꞌ yadtaw sa lugar nin kagalangan sa adapan nan Sangkataꞌgayan nin Dios itaw sa langit. 2 Itaw ket man-gawꞌen na a nikapadiꞌ na sa peteg nin Pangraywan itaw sa langit a amboꞌ nin tawo a nangipaꞌdeng no kai si Dios.
3 Anaod, si barang sayan Sangkataꞌgayan nin Padiꞌ, tinudoꞌ ya nin mangiꞌdeng konran tutawo konan Dios nin mangiprisinta nin rurigalo tan daꞌton kona, kanyaꞌ nin matkap a main anamaet nin idaꞌton na nin sitin Sangkataꞌgayan nin Padiꞌ tamo para kontamo. 4 Ket no iti ya et kumon sa lutaꞌ, kai ya gapo nin nagꞌin nin padiꞌ banaꞌ ta main sarayna a tinudoꞌ nin pupadiꞌ nin mampangiprisintan rurigalo nin maitukoy sa panumbukan nin nibin Gugan-gan. 5 Sain nin pagsisirbi ran sarain nin pupadiꞌ ket baraꞌmon alina tamoꞌ banaꞌ ta manꞌiritrato ya tamoꞌ a pangraywan nin peteg a itaw sa langit. Tandaꞌ tamon wanin banaꞌ ta si Dios, binibilin nayan maong si Moises sin manꞌipagwaꞌ na kona a pammaꞌdeng nin Abung-abong na. Anaod wana nin Dios,
“Pakandaen mon gawꞌen a sarba nin bilang sa wantaw sa nipaꞌkit kodtaw komo sa talugtog.”a
6 Baleꞌ si Sangkataꞌgayan nin Padiꞌ tamo, itaw ya sa langit ket nangaꞌmor yan mas ataꞌgay a klasin nikapadiꞌ dyan sarain a pupadiꞌ. Makakipada a nikapadiꞌ na sa mas mabistan nitarato a manꞌipasigurado na konan Dios tan saray tutawo ta naipatukdoꞌ ya sa mas mabista nin pangakoꞌ nan Dios.
7 Oꞌ mas mabista yaytin nitarato na ta no sitaw si nuꞌna ket kasan pagkurangan na nin mangikadani kumon kontamo konan Dios, kai kumon matkap a kasilyan nan baꞌyo. 8 Baleꞌ nipatandaꞌ nan Dios a main nin pagkurangan nan si uꞌnan nitarato ta mabasa tamo a wanti e nin wanan Dios,
“Rumateꞌ liꞌ a panaon a
mangwaꞌ akon baꞌyon pakitarato ko konran tutawo ko,
saray taga Israel tan saray taga Juda.
9 Ket siti nin baꞌyon nitaratwan
kai naya nin kapada nin si uꞌnan pakitarato nin ginwaꞌ ko konran pupuon ra
sin saytaw sin nilakwan kosara sa Egipto.
Anaod, pinauryan ray nitaratwan mi,
kanyaꞌ nin banaꞌ ta wanin pinauryan kosarayna.
10 Ket wanti liꞌ ey baꞌyon itarato ko konran puri na ni Israel:
No rumateꞌ a panaon,
ipasrep ko liꞌ sa kukanakman ra a uakay ko.
Ipadalepdep ko konra a gugan-gan ko.
Ket magꞌin siꞌkoynay Dios ra tan magꞌin saran tutawo ko.
11 Ket banaꞌ ta wanin, no saytaw liꞌ,
kai ana nin matkap a say barang saya ket ibaritaꞌ nay wanti e sa saya tan saya,
‘Tandaen may Dios’
banaꞌ ta tandaꞌ rakoyna liꞌ ngaꞌmin,
mangibwat konran saray madidintek konra anggan konran saray atataꞌgay.
12 Tandaꞌ rakoyna liꞌ
ta nasariꞌ raynan kaꞌdwan kosara
ket pirdunawen koy nipanubag ra, tan
kai koyna gapo nin isingir konra.”b.
13 Sa wanin a wana nin Dios a mangwaꞌ yan baꞌyon itarato na, maꞌkit a si uꞌna, kasaynan kausaran na; anaod, si animan a maꞌran ana tan kasaynan kausaran, ket pauryan yayna.