Nikaꞌ naya ni Jesus a Mas Mabistan Daꞌton
9
Anaod, itaw sa nuꞌnan nitarato a saray tutawo ket magꞌin maakoꞌ nasaran Dios, main nin pupanumbukan sa pagsisirbi konan Dios tan main nin naitandaꞌ nin Abung-abong nin Piikapan a ginwaꞌ nin tawo.a 2 Siti nin Abung-abong, rwa ray parti na. Si uꞌnan parti a mantawagen nin Masanton Lugar, itaw yay pammatukduan nin tyoꞌ tan si lamisawan nin pangangwan nin tinapay nin nitalaga konan Dios. 3 Si luuban sa sitin parti ket nakurtinawan ya. Si ikarwan parti nin sinalimbengan yaynamaet nin kurtina nin pidalinan, say tawag kona ket “Si Sangkasantusan nin Lugar.” 4 Kalamoꞌ nan sitin parti ket si altar a balitok nin pammuuran nin insinso tan si kaban a mantawagen yan Kaban nin Kataratwan. Nakubriwan yan balitok tan say laman na ket si kuden a balitok a main nin laman nin kanen a baraꞌmon tinapay a mantawagen nin mannab a nibi nan Dios konran Israelita. Laman naya et nin Kaban a baston na ni Aaron a ginmulongc tan saray rway tiniblak nin bato a nakaisuratan nin say ipatumbokd nan Dios konran Israelita. 5 Sa babo nan Kaban ket main nin istatwa ran rwa ray pinarsa a main nin pakpak a mantawagen nin kerubin nin kikalamoꞌ sa sangkabistawan a pakaipadar nan Dios. Nibukaꞌ a pakpak ra nin sirungan rayay sakeb nan Kaban a syay lugar nin pangingidaꞌtunan nin dayaꞌ sa pakidawat nin ingangaꞌdo konan Dios. Maipaꞌkaꞌ sa sain, anggadti tanay maipapalaway ko sawanin.6 Ket mayadiꞌ nin naisadyaꞌ a sarban sain, saray pupadiꞌ, sumrep saradtaw nin pirmi sa uꞌnan parti ta pigaw nin gawꞌen ray gawaꞌ ra bilang padiꞌ. 7 Baleꞌ itaw konan ikarwan parti, kal-la si Sangkataꞌgayan nin Padiꞌ tamoꞌ a makasrep, tan miꞌsa tamoꞌ sa sayay taon. Baleꞌ maiyawaꞌ anaod a sumrep yadtaw no kasan dayaꞌ nin uayep nin idaꞌton na konan Dios. Matkap a mangidaꞌton yan sain banaꞌ sa nipagkasalanan na, tan wanin anamaet sa kai ra naaraman nin kukasalanan ran tutawo.e 8 Sayti e a ipaꞌkit na kontamo nin Ispirito nan Dios mangibwat sa sain:
Legꞌan a sain nin pupanumbukan maipaꞌkaꞌ konan sitin pangraywanf ket mantumbuken et, kai ya et nin magwaꞌ nin dalanan nin tawo a serpan sa naitalagan kamiꞌnan nan Dios.
9 Say isen konan siin nin pangraywan ket baraꞌmon mangiritrato tamoꞌ nin say natukid nayna sawanin nin Cristo. Edet, say pangiprisinta nin rigalo tan dudaꞌton sigon sa sain nin panumbukan ket kai nin makaparinggas nin kanakman ran mangrarayo konan Dios. 10 Anaod, sain nin pupanumbukan ket main nin kabiangan tamoꞌ sa lalaman a bilang sa pangangan tan pinnom tan sa pangriringgas nin bubagay, tan sa raruma et. Nigan-gan nan Dios nin tumbuken in angga tamoꞌ sa panaon a mampagkuri ana a baꞌyon padalan na nin ikusto a sarba.
11 Edet si Cristo, sin inmadap ya konan Dios, syay Sangkataꞌgayan nin Padiꞌ nin mamangibwat nin mabibistan bubagay yupaꞌ konan si baꞌyon nitarato. Kinmadani ya et kona nin Dios nin dinmalan ya konan si sangkataꞌgayan tan sangkabistawan nin Abung-abong para konan Dios. Amboꞌ nin tawo a nangwaꞌ konan siti tan saya et, amboꞌ yan iti sa mundo. 12 Amboꞌ anamaet nin dayaꞌ nin kabron tan kal-lakyan nin bakag a awit na nin nikaꞌ nidaꞌton itaw sa naitalagan kamiꞌnan nan Dios no kai edet, say dayaꞌ nan diri nin tinmuroꞌ. Ket sa wanin, niꞌsa ya tamoꞌ nin sinumrep itaw tan kai nayna nin matkap a sumrep anamanaet ta ginaꞌmuran nayna a pakaipalꞌis tamon anggan-angga sa pagꞌuuray nin kukasalanan tamo. 13 Oꞌ tutuo, sa uꞌnan nitarato, saraytaw saray ikwinta nin nikasamaꞌ, maringgasan a lalaman ra sa pangwarsik konra nin dayaꞌ nin baka tan kanding tan abunsyang nin pinuuran a gumalasang nin bakah, ket no wanin, maaburuyan saran kikalamoꞌ sa pangrarayo. 14 Wanin man nin sain, maringgasan atamon adayoꞌ baleꞌ nin dayaꞌ na ni Cristo. Rininggasan nayna a kukanakman tamo sa gawaꞌ-gawaꞌ tamon kai nin makabunga nin byay, ta pigaw nin say gawꞌen tamoyna ket si pagsirbyan yay Dios a syay pangibwatan nin byay. Yupaꞌ sa tulong nan Ispirito nan Dios a main ya anggan-angga, si Cristo, nidaꞌton na konan Dios a kadiryan na nin kasa gapo nin dungis ket maringgasan natamoyna.
15 Ket banaꞌ ta wanin, si Cristo, inumdeng ya sa pisaꞌlean nan Dios tan saray tutawo a pinangibwat nay pagkamain nin baꞌyon nitarato a maituno atamo konan Dios. Itaw ya ta pigaw nin saraytaw saray sinagyat nan Dios ket magaꞌmuran raytaw say magnayon anggan-angga nin bindisyon a nipangakoꞌ nan Dios. Mangyadiꞌ a wanin banaꞌ sa patiti na ni Cristo nin ipasbot nasaran Dios a tutawo kona sa dukaꞌ a kaugutan ra sa nipanubag ra sin itaw sara et sa sakop nin uꞌnan tistamintoi nan Dios. 16 Bilang sa wanin, no si sayay tawo ket mangwaꞌ ya nin tistaminto, matkap a main yapoꞌ nin pakaꞌkitan a nati yayna baꞌyo nin matawir nin siꞌnuman a kamamain na, 17 banaꞌ ta kasa et nin kuri nan tistaminto antaran mabyay ya et. Ket magkuri tamoꞌ a wanan tistaminto no nati yaynaytaw si nangwaꞌ.
18 Ket bilang sa wanin, konan si uꞌnan padalan a pinangibwat nan Dios, main nin pinatin ayep nin pinaturoꞌ a dayaꞌ na ta pigaw nin alilbien yan main nin kuri a nitaratwan. 19 Anaod, wanti e a nangyadiꞌ:
Si Moises, nipatandaan na ngaꞌmin konran tutawo a ipatukid nan Dios konra nin itaw sa Gugan-gan. Ket kayadiꞌ na nin ginwaꞌ in, kinalap nay dayaꞌ nin kanding tan baka nin linawukan na nin ranom ket, winarsikan nasaray sarban tutawo tan say nakaisuratan nin Gugan-gan, a nangusar yan sanga nin tanaman a mantawagen nin isopo a nakerkeran ya sa parpar nin kulor lila nin abel a mantawagen nin lana. 20 Leleg nan man-gawꞌen in wana konran tutawo,
“Sayti a dayaꞌ nin pinaturoꞌ nin mamaꞌget sa nitarato nan Dios nin ipasunor na komoyo.”j
21 Winarsikan naya anamaet nin dayaꞌ a Abung-abong nin Piikapan nan Dios tan say sarba nin bubagay nin usaren sa pagsisirbi kona. 22 Anaod, tandaꞌ tamo mangibwat sa Gugan-gan a, dandani sarba, maringgasan nin pammaturoꞌ nin dayaꞌ. Wanin anamaet a say kal-la padalan nin pakapirduna nin kukasalanan tamo nin tutawo ket say pammaturoꞌ nin dayaꞌ.
23 Ket banaꞌ ta wanin, matkap anaod nin maparinggas ya yupaꞌ sa pangwarsik nin dayaꞌ ran nidaꞌton nin uayep a lugar nin pangraywan konan Dios iti sa lutaꞌ tan say bubagay nin usaren itaw. Baleꞌ, ritrato in tamoꞌ nin say itaw sa peteg nin pangraywan itaw sa langit. Ket sa say itaw sa pangraywan itaw sa langit, mas mabli nin daꞌton a matkap. 24 Anaod, si Cristo, nakasrep ya, amboꞌ sa lugar nin pangraywan a ginwaꞌ nin tawo nin ritrato tamoꞌ nin si peteg, no kai itaw mismo sa peteg nin pangraywan sa langit. Ket sawanin itaw ya sa adapan nan Dios ta pigaw nin syay mangisaꞌleꞌ kontamo kona. 25 Si Cristo anamaet, amboꞌ yan bilang konan sayay Sangkataꞌgayan nin Padiꞌ nin Judio a sinumrep ya nin tinaun-taon sa Sangkasantusan nin Lugar itaw sa pangraywan iti sa lutaꞌ, nin nangidaꞌton yan dayaꞌ nin uayep. Niꞌsa ya tamoꞌ matkap nin sinumrep si Cristo nin nikaꞌ na nin nidaꞌton a lalaman nan diri. 26 No say pangingidaꞌton na ni Cristo ket pariho kumon sa pangingidaꞌton ra, nangibwat et sin kapamarsa konan mundo, matkap kumon a niꞌnu-niꞌno yayna nin nati. Baleꞌ amboꞌ nin wanin! Niꞌsa ya tamoꞌ nin nakodti tan sa kusto nin panaon ta pigaw nin, mangibwat sa nipangidaꞌton nan lalaman nan diri ket rarusan natamo sa kukasalanan tamo.
27 Niketeg nan Dios a say tawo, mati nin miꞌsa, ket sumunor a pakasintinsya konan Dios. 28 Kapada nin sain, nati ya si Cristo sin nidaꞌton nay lalaman nan diri nin niꞌsa, ta pigaw nin makauray ya sa kukasalanan nin abaw a tutawo. Kanyaꞌ nin no sumubliꞌ yadti liꞌ, amboꞌ ana nin banaꞌ sa kukasalanan nin tutawo, no kai edet, mako yadti nin uman para konran masuet nin mantumaꞌgan kona ta pigaw nin aluyunen nasaran makodtaw nin kikalamoꞌ konan Dios.k