10
Anaod, si sistima nin yupaꞌ sa panunumbok nin Gugan-gan ket baraꞌmo tamoꞌ nin alina a mangitudoꞌ sa mabista nin rumateꞌ kontamo. Amboꞌ in a say peteg ana. Kanyaꞌ nin say uman-uman nin pangingidaꞌton ra nin tinaun-taon ket kai gapo nin nagwaꞌ nin pinaringgas saran peteg sa kukasalanan ray kumadani konan Dios. 2 No magwaꞌ in kumon nin sain, kai rayna nin matkap a mangidaꞌton et nin saray kumadani konan Dios ta naparinggas sarayna tan kai sarayna nin mangkabyatan banaꞌ sa kukasalanan ra. 3 Baleꞌ say katutuꞌwan ket, nipapanemtem konra nin say nipangidaꞌton ra nin tinaun-taon a kai et nin naglat a kukasalanan ra. 4 Wanin banaꞌ ta say dayaꞌ nin nidaꞌton nin baka tan kanding ket kai gapo makapanglat nin kukasalanan. 5 Kanyaꞌ anaod nin sin adapen nayna ni Cristo a makodti sa lutaꞌ, nibaritaꞌ nay wanti e konan Dios:“Amboꞌ nin say dudaꞌton nin uayep tan raruma et a tikapen mo,
kanyaꞌ nin binyan nako nin lalaman.
6 Kai ka nin napaririket nin
bubagay a pinuuran tan nidaꞌton nin
ipanakeb nin kukasalanan.
7 Ket banaꞌ anaod ta wanin, wangko komo, O Dios,
‘Edet, iti ako
ta pigaw nin gawꞌen ko a karabayan mo, a
sayti ket naisurat anan gindat maipaꞌkaꞌ kongko sa Masanton Kasuratan.’ ”a.
8 Tandaan moyo a wana ni Cristo,
“Amboꞌ nin say dudaꞌton nin uayep, say daꞌton nin trigo, say daꞌton a pinuuran sa altar tan say dayaꞌ a nidaꞌton para sa kasalanan a tikapen mo;
amboꞌ in a makapaririket komo.”
“Edet, iti ako
ta pigaw nin gawꞌen ko a karabayan mo.”
Edet, nangibwat sa karabayan nan Dios, naglat yaynay uꞌnan nitarato na ket magkuri yaynay ikarwa. 10 Nangibwat anamaet sa karabayan na nin Dios ket rininggasan natamoyna sa kukasalanan tamo ni Cristo tan naitalaga natamoyna konan Dios, nangibwat sa niꞌsa tamoꞌ nin nipangidaꞌton na nin kadiryan na.
11 A lamang et, saray pupadiꞌ, inawru-awro nin itaw sara sa Abung-abong nin Piikapan nan Dios nin nangiprisi-prisintan pari-parihon klasin dudaꞌton. Wanin man, saytaw nin dudaꞌton ra ket kai nin nakapanglat nin kukasalanan. 12 Baleꞌ, sitin padiꞌ tamo a si Cristo, say nipangidaꞌton nan niꞌsa, sumadag anan galten lawas a kukasalanan tamo. Ket sinmunor, nako ya nin tinmekreꞌ sa lugar nin sangkagalangan sa pawanan nan Dios 13 a mantagaꞌnan nan sarba ran kukalaban na ket ipadaeg nasaran liso nin Dios kona.b 14 Anaod, sa niꞌsa nin nipangidaꞌton nan lalaman nan diri, nikusto na lawas sa pangingikit nan Dios a kapapaꞌsar ra nin saray tutawo nin mamparinggasen nayna.
15 Si Ispirito nan Dios anamaet, patutuꞌwan na a naikusto anay kapapaꞌsar ra sa pangingikit nan Dios ta mabasa tamon midadandan a wanti e sa Masanton Kasuratan:
16 “Wanti liꞌ ey baꞌyon itarato ko konra no marateꞌ a panaon wanan Dios:
Ipasrep ko liꞌ sa kukanakman ra a uakay ko.
Ipadalepdep ko konra a gugan-gan ko.”
17 Ket sumunor,
“Pirdunawen koy nipanubag ra, tan kai koyna gapo nin isingir konra.”c
18 Edet, no say kukasalanan ket napirdunayna, kai ana matkap a mangiprisinta et nin daꞌton para sa pakapirduna nin sayti.
Idengan moyon Gawꞌen a Karabayan nan Dios
19 Kanyaꞌ anaod, bubsat, nin kumadani atamo konan Dios. Gawꞌen tamo in ta kanawanawa tamoynay makasrep sa Sangkasantusan nin Lugar nan Dios banaꞌ sa nipangidaꞌton na ni Jesus nin kadiryan na a tinmuroꞌ a dayaꞌ na. 20 Inabryan nayayna para kontamo a dalanan sa salaband sa kakadani konan Dios. Siin nin dalanan ket pinagkamain ya nin nipangidaꞌton nan lalaman nan diri ni Jesus, ket kapangabri na konan siti, tan mami yan byay nin iti konan Dios. 21 Kumadani atamo anamaet a lamang konan Dios ta, sitin Sangkataꞌgayan nin Padiꞌ tamo a si Jesus, mampagawan natamon siꞌtamon pammali nan Dios. 22 Kanyaꞌ nin kumadani atamo anaod konan Dios nin masibulot a nakem tamo ta magsen a pagmamatalek tamo kona nin kasan dwadwa banaꞌ ta naringgasan ana a kunsinsya tamo nin dayaꞌ na ni Jesus sa kukasalanan tamoe tan say gawaꞌ-gawaꞌ tamo ket bilang nin nauyasan sa ranom nin maringgasf.
23 Dumaer atamo sa saytin pangingilalo tamo nin nipatutuo tamon iti kontamo. Andiꞌ atamo gapo nin magdwadwa banaꞌ ta si Dios a syay nikitarato kontamo ket tutuo ya sa nibaritaꞌ na tan gawꞌen nay nipangakoꞌ na. 24 Pagawan tamo anamaet a maninreg nin saray kalalamoꞌ tamo ta pigaw nin mas mikawaꞌnanan atamo tan gawꞌen tamo no ani a maabig para sa barang saya. 25 Ket andiꞌ tamo nin itgen a pididinep tamo nin amboꞌ nin bilang konran raruma a no miꞌsa tamoꞌ, no kai edet, mididinep atamo ta pigaw nin matulungan tamoy barang saya nin mikawaꞌnanan atamo tan gawꞌen tamo no ani a maabig. Matkap tamon tuloy nin gawꞌen ti laloyna sawanin banaꞌ ta maibaritaꞌ tamo a say awro nin isusubliꞌ na ni Uunuren tamon Jesus ket adani ana.
26 Gawꞌen tamo in ta, no ituluy-tuloy tamo et a pagkakasalanan tamo mataman nin peteg a tandaꞌ tamoynay katutuꞌwan maipaꞌkaꞌ kona ni Cristo, kasaynan magwaꞌ et nin idaꞌton nin makapanguyas nin kasalanan tamo. 27 Kasaynan magwaꞌ et para konran tutawon mangwaꞌ nin wanin no kai tumaꞌgan tana sa makapasalak a panunusa nan Dios tan say burung-burong nin apoy a mangpos konran saray kumuntra kona. 28 Tandaꞌ tamo a no main nin nangagaran sinmubag sa Gugan-gan a naibi kona ni Moises, ket sain nin nipanubag na tistigusan ran tulo o rway katawo, siin nin nanubag ket dusawen yan patyen nin kasan ingangaꞌdo.g 29 Edet ta wanin, mas mabyat liꞌ nin adayoꞌ a dusa na nin si tawon ginwaꞌ nayan kasan sirbi a Anak nan Dios. Siin, basta-bastawen na a dayaꞌ nin nangwaꞌ a magkuri a baꞌyon nitarato nan Dios nin naitalaga atamo konan Dios. Siin a lamang, muda-mudawen naya a Ispirito nan Dios nin mampamayabor nin say kamaungan nan Dios kontamo. 30 Dusawen naya banaꞌ ta tandaꞌ tamo a si namaritaꞌ nin wanti e ket si Dios nin diri:
“Siꞌko a gumaleꞌ;
siꞌko a manusa konra sa dukaꞌ a gawaꞌ-gawaꞌ ra.”
Sya et a lamang a namaritaꞌ nin wanti e:
“Siꞌko, Si Uunuren, sintinsyawan kosara liꞌ a tutawo ko.”h.
31 Anaod, makapasalak nin tuloy a dusa na konran saray mangwaꞌ nin wanin kona nin Dios a sibibyay tan makapangyayadiꞌ ya!
32 Ket, panemtemen moyoy pangingilalo moyo sin amboꞌ et nin naꞌteng a pinalawayan nakamoyna nin Dios. Sin saytaw, abaw nin idap a nirangep moyo. 33 Main taw say pinadi-padingꞌeyan tan sinasa-sasakit kamo sa adapan nin tutawo, tan main taw anamaet say nikidamay kamo konran saray ginwa-ginwaan nin wanin. 34 Anaod, dinamayan moyo saray napriso, tan kai kamo nin ginmereng mataman no kinalap komoyoy sarba nin main moyo banaꞌ ta tandaꞌ moyo nin main et nin ikon moyo nin nipangakoꞌ nan Dios a mas mabistan adayoꞌ tan magnayon anggan-angga. 35 Kanyaꞌ nin, bubsat, andiꞌ moyo nin galten a pangingilalo moyo kona ta magun-gunawan atamo liꞌ nin alaki banaꞌ konan siin. 36 Oꞌ, matkap a mangitpel kamo ta pigaw nin sa wanin ket magaꞌmuran moyoy nipangakoꞌ nan Dios, banaꞌ ta ginwaꞌ moyoy rabay na. 37 Anaod, wanan Dios a mabasa tamo sa Masanton Kasuratan,
“Amboꞌ ana nin maꞌteng ket
sitaw si mantagaꞌnan moyon rumateꞌ, rumateꞌ yayna.
Kai na nin itantan a kararateꞌ na.
38 Ket si tawo nin nikwinta kon mapteg, magkabyay yan naipatukdoꞌ sa pagmamatalek na kongko.
Baleꞌ, no gurutan nako, kai ako nin mapaririktan kona.”i
Dalepdepen a Maipaꞌkaꞌ konran saray Nagmatalek konan Dios
39 Baleꞌ siꞌtamo, bubsat, amboꞌ ratamo nin kapada nin sarain saray gumurot ket dusawen nasara nin Dios, no kai edet, siꞌtamo ket kapada ratamon saray nagmatalek konan Dios ket naisalba nasara.