11
Ani edet a pagmamatalek? Syay maꞌget a pangipatukduan tamon paninigurado tamo a matukid a manꞌilalwan tamo. Syay pangaꞌgetan tamo nin maipaꞌkaꞌ sa katutuꞌwan nin say kai tamo nin maꞌkit, 2 ta wanin a maꞌkit tamo konran saray tutawo sin nuꞌnan panaon. Banaꞌ sa pagmamatalek ra, pinatutuꞌwan nan Dios a inakoꞌ nasara.3 Mangibwat sa pagmamatalek tamo, mataros tamo a si Dios, ginwaꞌ nayay sangkamundwan nangibwat sa irgo na tamoꞌ;a edet, sarba nin maꞌkit ket naparsa nangibwat sa kai nin maꞌkit.
4 Nangibwat sa pagmamatalek na, si Abel, nami ya konan Dios nin mas maikanaꞌ nin daꞌton dyan say daꞌton na ni kaka nan si Cain.b Nangibwat sa sain nin pagmamatalek na ni Abel, inalilbiꞌ nan Dios a matunong ya, a sayti ipaꞌkit nin nipangrisibi nan daꞌton na ni Abel. Ket abirno nin nati yaynan naꞌteng si Abel, manꞌiyakay natamo et a lamang sa wanin nin pagmamatalek na.
5 Nangibwat sa pagmamatalek na ni Enoc, inawit nayaynadtaw sa langit nin Dios ket kai ya nin nati. Main nin nibaritaꞌ nan Dios sa Masanton Kasuratan a kai ya nin nadumog si Enoc ta kinalap naya, baleꞌ nuꞌna et konan siin ket pinatutuꞌwan nan Dios a napaririketan ya kona ni Enoc.c 6 Sawanin, si sayay tawo nin kasan pagmamatalek, kai naya nin mapaririket a Dios. Wanin ta si siꞌnuman nin kumadani konan Dios matkap a mamper ya a main ya a Dios tan a si Dios, gun-gunawan nasaray masuet nin kumadani kona.
7 Nangibwat sa pagmamatalek na, si Noe, timper nan main nin liꞌmo a pammatalad nan Dios a magkamain nin pinasyan kaalakyan nin layos.d Abirno nin kai na et nin mangkaꞌkit nin manlumayos sin saytaw, ginwaꞌ nayay alakin baluto ta pigaw nin malibri saran mipamilya ket yupaꞌ sa katutulok na banaꞌ sa pagmamatalek na ni Noe, naipaꞌkit a kai ra nin nipamper nin raruma ket konan siin nirebreb sara; baleꞌ sya, ginun-gunawan yan byay nin nikwintan mapteg ta main nin pagmamatalek na.
8 Nangibwat sa pagmamatalek na, si Abraham, tinmulok ya sin nibakiꞌ naya nin Dios itaw sa lugar a nipangakoꞌ na nin ibi kona.e Nibwat yan nako si Abraham sa nangibakian nan Dios kona mataman no kai na nin tandaꞌ no adti yaytaw nin lugar.
9 Nangibwat a lamang sa pagmamatalek na, mataman no nipangakoꞌ ya anaod kona in nin lugar ket nagmantini yadtaw si Abraham nin bilang sayay sanꞌili tamoꞌ nin niikap sa abung-abong. Wanin anamaet konan si anak nan si Isaac tan si apo nan si Jacob, a sara ket nagpangakuan na anamaet nin Dios. 10 Nakaitpel yaynaod si Abraham nin wantaw banaꞌ ta, si manꞌilalwan na ket, say miikap yadtaw liꞌ sa syudad nin magnayon anggan-angga, a si nangiplano tan nangwaꞌ konan siin nin syudad ket si Dios.
11 Nangibwat et a lamang sa pagmamatalek na ni Abraham, abirno nin nalabas anay siken na tan abirno nin si asawa na a si Sara ket baog ya, nabyan saran pakagawaꞌ a nanganak sara et a lamang. Nangyadiꞌ in ta kona ni Abraham ket mailalwan yay Dios nin nagpangakoꞌ kona.f 12 Ket mataman no kai yayna kumon nin makaanak si Abraham banaꞌ ta masiken yaynan tuloy, syay puon ran namuyek-muyek nin tutawo a kapada kaꞌbaw nin bituen tan kai nin mabilang a kapadan buyangin.g
13 Mampagmatalek sara et si Abraham tan saray pamilya na konan si nipangakoꞌ nan Dios konra anggan sin awron nati sara, mataman no kai ra et nin narisibi. Siririket saran tinmaꞌgan leleg nin byay ra ta baraꞌmo raynayti nin mangkatamuraw ket inalilbiꞌ ran sanꞌili tamoꞌ a paꞌsar ra sa siin nin lugar. 14 Oꞌ, saray tutawo nin mangalilbiꞌ a sanꞌili saradti tamoꞌ sa mundo, manꞌipatnag ra a main et nin mantikapen ran lugar a pirmaninti ra liꞌ nin piikapan. 15 Sara si Abraham, no si pipanemtem ra kumon ket si lugar a ibwatan ra, magwaꞌ a sinmubliꞌ sara, 16 baleꞌ kai ta si manꞌapesen ra ket si lugar a mas mabista nin itaw sa langit. Kanyaꞌ nin si Dios, kai na gapo nin ikadingꞌey a sya ket tawagen rayan Dios ra. Anaod, nangisadyaꞌ ya nin syudad a piikapan ra.
17 Nangibwat sa pagmamatalek na, sin sinubok nayan Dios, napasaya anay nakem na ni Abraham nin patyen nayan idaꞌton konan Dios a kapagkapag nin anak nan si Isaac.h Patyen naya kumon nin idaꞌton kona abirno nin nipangakoꞌ naynan gindat nin Dios kona 18 wana, “Saray mangibwat kona ni Isaac, sara tamoꞌ a ikwintan puri mo.”i 19 Si Abraham, timper na a si Dios ket main nin pakayadiꞌ nan pasublien saran mabyay a nunati. Ket kona ni Abraham, nati yaynaod si Isaac tan nisubliꞌ naya nin mabyay nin Dios kona.j
20 Nangibwat a lamang sa pagmamatalek na, si Isaac, binindisyunan nasara a aꞌnak nan si Jacob tan si Esau maipaꞌkaꞌ sa gawꞌen nan Dios para konra sa adapen.k
21 Nangibwat sa pagmamatalek na, si Jacob, sin dandani yayna nin mati, nangrayo ya konan Dios nin nitayukod ya ket binindisyunan nasaray rway apo nan lulalaki nin aꞌnak na ni Jose.l
22 Nangibwat sa pagmamatalek na, si Jose, sin dandani yayna nin mati, nibaritaꞌ na konran kapada nan Israelita a rumateꞌ liꞌ a awro a makalakwan saradtaw sa Egipto, ket nibibilin nan iꞌras ra liꞌ a butꞌol na.m
23 Nangibwat sa pagmamatalek ra, saray matua na ni Moises, kai sara nin linmiꞌmo nin sinmubag sa gan-gan nan adiꞌ a patyen sara ngaꞌmin a lulalakin abing nin Hebreo. Ket niyadi raya si Moises sa luob nin tuloy bulan nangibwat sin niyabing ya banaꞌ ta naimatunan ran naiduma ya nin anak.n
24 Nangibwat sa pagmamatalek na, si Moises, sin iti yaynan talaga sa idad, kai nayna inakoꞌ a alilbien ya et nin anak nan prinsisa a anak nan adiꞌ. 25 Piniliꞌ nayna edet a nangirangep nin dyaꞌdyaꞌ nin kalamoꞌ ran saray tutawo nan Dios dyan si mabista a byay na sa anted tamoꞌ nin panaon no pauryan nasaray tawo nan Dios. 26 Para kona, mas alaki ana edet a pakinabang nin pangingirangep nin panunuyaꞌ-tuyaꞌ para konan Mesias a sya a ibakiꞌ na liꞌ nin Dios, dyan say maikon nay kayamanan nan Egipto. Anaod, nipatyoꞌ nay kaisipan na sa tubaleꞌ na liꞌ nin Dios kona.
27 Nangibwat sa pagmamatalek na, linmakwan yadtaw sa Egipto si Moises, a kai ya nin maliꞌmo sa pinasyan sager nan adiꞌ. Kai ya gapo nin tinmapoꞌ abirno nin aninay idap no kai inagwantawan na banaꞌ ta baraꞌmo nayan mangkiten-kiten nin kalamoꞌ na a Dios a kai nin maꞌkit.
28 Nangibwat sa pagmamatalek na, si Moises, nigan-gan nan silibrawen ray pistan mantawagen nin Pista nin Nipanglabas tan ipunas ray dayaꞌ nin karniro sa purtan bubali ra. Gawꞌen ra in ta pigaw nin no lumabas yay anghil nin nibakiꞌ nan Dios nin mangmati konran kakan lalaki nin Egipcio, ket kai nasara patyen a Israelita.o
29 Nangibwat sa pagmamatalek ra, saray Israelita, nakadalan saradtaw sa mantawagen nin “Muꞌdit nin Taaw” nin linmalako sa makrang a lutaꞌ. Baleꞌ sin saray sundaloꞌ nin taga Egipto nin mampangamat konra a nanariꞌ nin dinmalan, sinakban saran paꞌsar ringring nin ranom sa nipikngaꞌ nin taaw.p
30 Nangibwat a lamang sa pagmamatalek ran Israelita, linmibed saran pitoy awro sa syudad nin Jerico ket mayadiꞌ ra ginwaꞌ in, naybaꞌ a padil na.q
31 Nangibwat sa pagmamatalek na, si Rahab a sayay pampam, kai ya nin pinati nin kalamoꞌ ran saray taga Jerico nin suplado konan Dios. Maꞌkit in a pagmamatalek na sin tinulungan nasara nin kapada sa amigo, saray nakodtaw nin nangispya a Israelita.r
32 Abaw et a maibaritaꞌ ko maipaꞌkaꞌ konran raruma et nin nagmatalek konan Dios, bilang sara si Gideon, Barak, Samson, Jefte, David, Samuel tan saray prupita, baleꞌ kurang anay panaon ko. 33 Banaꞌ sa pagmamatalek ra, main konra a nakadaeg nin pupagꞌadian, main konra a matunong a nipagꞌuray ra, main saray nakarisibi nin nipangakoꞌ nan Dios konra, tan main sara anamaet a kai ra nin napaꞌno nin leon ta napikmiꞌ ray bebey ra. 34 Nangibwat et a lamang sa pagmamatalek ra, main nin kai nin napuuran sin nikwa sara sa burung-burong nin apoy, tan main et nin nalibrin kai ra napati nin saray kuntra konra. Main saraytaw saray makapoy baleꞌ kinumsaw tan nagꞌin matpel sara, ket saray nikigira, napatakris rasaray kukalaban ra. 35 Main nin bubbayin banaꞌ sa pagmamatalek ra, saray nati ana nin myimbro nin pamilya ra ket pinasubliꞌ saran mabyay.
Wanin man anamaet, main saraytaw saray banaꞌ sa pagmamatalek ra ket pinaidap sara angga sin nati sara. Malibri sara kumon no gurutan ray pagmamatalek ra konan Dios, baleꞌ mas piniliꞌ ra a mati ta pigaw nin pabyayen sara sa mas mabistan byay nin kikalamoꞌ konan Dios.
36 Main saraytaw et saray wanti e a nikasubok ra:
Tinuyaꞌ-tuyaꞌ sara tan ginaru-garuti sara, tan main saraytaw et anamaet saray kinadi-kadinawan tan nipriso. 37 Saray raruma et ket pinati sara nin kinudas-kudas nin bato. Main saray pinikngaꞌ nin ginarugadiꞌ. Main saray pinati nin beneng. Main saray nakudti-nakodtaw tana tan katat nin karniro o kanding a seket ra ta pinasyan idap nin byay ra. Main saray rinumiꞌ-rumiꞌ tan dinuksa-duksaꞌ. 38 Saray tutawodti sa mundo, kai sara maikanaꞌ nin kikala-kalamoꞌ konra. Wanin man, sarayna edet in nin main nin pagmamatalek konan Dios a napalakwan nin naku-nako sa disyirto tan talugtog, tan nako pinaisalipneꞌ nin niikap sa yuyukib tan uubot.
39 Anta sarain ngaꞌmin ket, banaꞌ sa pagmamatalek ra, pinatutuꞌwan nan Dios a inakoꞌ nasara. Wanin man, kai ra nin narisibi nin liso a nipangakoꞌ nan Dios konra 40 banaꞌ ta si Dios ket, main nin mas mabistan nisadyaꞌ na para konra tan kontamo ket marateꞌ tamoꞌ a makakikalamoꞌ sara konan Dios no naipasaya atamo konra.