12
Edet, sabtan kaꞌbawan ran sarain a main nin kabiangan kontamo. Baraꞌmo atamon mangkilumbaꞌ nin malayo a manꞌantabayan ra. Kanyaꞌ anaod nin siꞌtamo, matkap tamon galten a sarban makabyat sa pal-layo tamo laloynay kasalanan a maitumba atamo. Ket, ipamuspusan tamoyan palaywen in a nasukat nan Dios para kontamo. 2 Matkap tamon ipasayay nakem tamo konan si saya a syay ibwatan nin pagmamatalek tamo konan Dios tan sya et a lamang a mamaꞌget sa sayti angga nin makusto. Sya si Jesus a banaꞌ sa ririket a mantumaꞌgan kona, nirangep nay idap nin nipasak nin mati, tan inakoꞌ nayti mataman nin makapadingꞌey. Ket sawanin, mantumekreꞌ yadtaw sa sangkataꞌgayan a kagalangan sa wanan na nin Dios. 3 Anaod, ta pigaw nin kai kamo nin tumapoꞌ tan gumurot, dalepdepen moyo a nipangagwanta na nin idap a ginwaꞌ ra kona nin saray tutawon sikakasalanan.Say Idap nin Dalanan para sa Pakaipatunong
4 Siꞌkamo, kai et nin nirateꞌ sa mapati kamo a pangunguntra moyo sa kadukaan. 5 Nalingwanan moyaynayti para a bibilin na nin Dios kontamo nin manꞌikwinta nan aꞌnak na? Wana,
“Anak ko, andiꞌ mo nin gawꞌen nin kasan kwinta no pangirangepen kata nin pangangakay ko komo,
tan andiꞌ nin tumapoꞌ a nakem mo no dusawen kata nin pangipatunong ko komo,
6 banaꞌ ta siꞌko, si siꞌnuman a kawaꞌnan ko, pangirangepen koya nin pangangakay ko kona
tan dusawen koya nin pangipatunong ko kona banaꞌ ta manꞌikwinta koyan anak ko.”a.
7 Ket, mampangirangepen nakamo nin Dios nin pammatunong na komoyo banaꞌ ta manꞌikwinta nakamon aꞌnak na. Anaod, kasan anak a kai na nin iyakay nin ama na. 8 No kai nakamo nin manꞌiyakay nin Dios a kapada sa man-gawꞌen na sa barang anak na, say kapada moyo, aꞌnak sa rikor nin kai ra mantungtungen nin uama ra. 9 Saya et, saray mangatua tamodti, no ipatunong ratamo ket kabilangan tamo sara. Mas matkap nin adayoꞌ a ipaipatunong tamoy byay tamo konan si Ama tamo a namin peteg nin byay kontamo, ket maibyay tamoy byay na. 10 Oꞌ, ipatunong ratamon mumatua tamodti sa umnoy taon tamoꞌ dipindi sa wanra a syay maabig baleꞌ si Dios, ipatunong natamoynaod para sa kaabigan tamo nin say panganggawan ket makakiramaꞌ atamo sa kapapaꞌsar nan naiduma.
Parmawen moyo a Magkabyay nin Bilang sa Pagkabyay nan Dios
11 Sawanin, mintras a manꞌipatunong yay sayay tawo, maidap a nakem na, baleꞌ no nayadiꞌ ana liꞌ, say bunga konan si naipatunong ket say mapteg nin kabibyay, ket makapatinek yan kanakman ran raruma. 12 Kanyaꞌ nin siꞌkamo bubsat a baraꞌmon mangkilumbaꞌ nin malayo, paksawen moyo a baraꞌmon nalpok nin takyay moyo. Pagsenen moyo a baraꞌmon makapoy ana nin tuod moyo.b 13 Ket, pakandaen moyon ipatuꞌrir a pagkabyay moyo nin diri-diritso a kalalako moyo sa kuston dalan nan Diosc ta pigaw nin saray kalalamoꞌ moyo a baraꞌmon pilay sa kabibyay ra ket kai sarayna nin mapaꞌno et no kai edet, mapaandaꞌ sara banaꞌ sa kabibyay moyo.
14 Siꞌkamo ngaꞌmin, matkap a say abot moyo lawas ket si mabistay pikakalamoꞌ moyon sarba tan say pakaiparmaw moyo sa pagkabyay a bilang sa pagkabyay nan Dios, ta no kai kamo nin magkabyay nin wanin ket kai moya gapo liꞌ nin makalamoꞌ a Dios. 15 Leleg nin gawꞌen moyo in, pagawan moyo a kasa komoyo a gurutan nay kamaungan nan Dios. Pagawan moyo et a kasa komoyo a magꞌin nin masakit a nakem na. No main nin wanin, baraꞌmo yan rabot nin makasamal. No tumuboꞌ yadsen sa busel moyo ket pangibwatan in nin magꞌin nin magulo tan maitagad nay abaw sa pagkakasalanan. 16 Pagawan moyo a kasa komoyo a mampagkabyay nin nikasamaꞌ, o kipada kona ni Esau a kai nin nangibilang konan Dios. Nisili na sa sayay pangangan a kanepegan na nin kakan anak,d 17 ket amboꞌ nin naꞌteng naipwira ya sa pammindisyon nan ama na mangibwat konan Dios. Tandaꞌ moyon wanin ta mataman nin wana ket matkap a magaꞌmuran na in, kai na gapo nin nadawat abirno nin inmakis yan nikidawat nin ingangaꞌdo, ta kai nayna nin nasilyan a nangyadiꞌ ana.
18 Gawꞌen moyo in ta say kakakadani tamo konan Dios ket amboꞌ ana nin bilang sa gindat. Sin rinisibi ra a Gugan-gan nin saray pupuon tamo, main nin naaraman ra — burung-burong a apoy; pinasyan dedlem; mangisit a gunem; rumaweswes yay siri; 19 maksaw a tunoy nin trumpita; main nin busis a sin narngeꞌ rayayti ket nikidawat saran ingangaꞌdo a tumgen yaynan magꞌirgo. 20 Wanin ta masalak sara konan gan-gan nan Dios a mataman ayep ya tamoꞌ a tumukdoꞌ konan siin si talugtog, matkap a kudasen yan mati.e. 21 Makapasalak nin talagaytaw nin nasariꞌ ra a pati si Moises ket wana,
“Nangingintar ako sa liꞌmo ko.”f
22 Amboꞌ gapo nin wanin para komoyo! Iti kamoyna sa talugtog nan Dios a mantawagen nin Siong. Iti kamoyna sa syudad nan sibibyay a Dios. Siti ket si Jerusalem a itaw sa langit. Iti kamoynan mangkiriga konran uanghil a kai nin mabilang sa kaꞌbawan. 23 Iti kamoyna sa dupong ran naiduman pinatawiran a aꞌnak nan Dios a say ngaran ra ket nailista anadtaw sa langit. Iti kamoyna sa adapan nan Dios a syay hwis sa sarban tawo. Iti kamoynan naikalamoꞌ konran saraytaw intaw saray mapteg nin tutawo a ginwaꞌ nan Dios nin kasaynan pagkurangan ran makikalamoꞌ kona. 24 Iti kamoyna konan si pinangibwat nay nikagwaꞌ nan baꞌyon pitarato ran tutawo tan si Dios. Sya si Jesus. Iti kamoyna sa pagkukuri nin dayaꞌ na nin makapangikalamoꞌ kontamo konan Dios sin tinmuroꞌ, ket mas mabista a kakanaan dyan say dayaꞌ na ni Abel nin tinmuroꞌ a maningkap nin paninintinsya.h
25 Andiꞌ atamoyna nin kai nin mangimbabaet sa manꞌibaritaꞌ na nin Dios yupaꞌ sa dayaꞌ na ni Jesus. Wanin ta, saray pupuon tamo nin kai nin nangimbabaet sa nibaritaꞌ na sa nitarato na a pinaꞌget nadti sa mundo, kai sara nin nakapalꞌis nin nadusa. Laloyna nin siꞌtamo, kai atamo nin makapalꞌis nin madusa no gurutan tamo a manꞌibaritaꞌ na nin si nangibwat sa langit! 26 Sin saytaw, say busis nan Dios ket iniyeg a lutaꞌ, baleꞌ sawanin nisamba na et kontamo,
“Miꞌsa anamanaet liꞌ nin eyegen ko, amboꞌ tamoꞌ nin si mundo, no kai pati say kalangitan.”i
27 Siin nin nibaritaꞌ na nin Dios, say rabay nin irgwen, pakasawen na liꞌ a sarba nin ginwaꞌ na a kai nin magnayon ta pigaw nin say mabatiꞌ tana ket say magnayon.
28 Edet, mangibwat sa andaꞌ nin nakem tamo nin kisalamat kona, tubaleen tamoyay Dios nin pangingibilang tan kaliliꞌmo kona ta magaꞌmuran tamo liꞌ a lugar sa kai gapo nin mategeꞌ a Pagꞌadian na. Maikanaꞌ in nin pangrarayo kona. 29 Anaod, matkap a ikaliꞌmo tamoya a Dios tamo ta say panunusa na ket bilang yan apoy nin mapungpong a puuran na.j