Say Gugawaꞌ nin Maikanaꞌ sa Adapan nan Dios
13
Ket, ituluy-tuloy moyoy mikawaꞌnanan a mibubsat sa pammemper.2 Andiꞌ moyo nin isiblet a mananꞌili. Saray raruma a mapananꞌili sara ket nananꞌili sarayna nin uanghil nin kai ra nin naaraman.
3 Andiꞌ moyo sara nin pauryan a itaw sa priswan tan saray mangkaduksa-duksaꞌ no kai kidamay kamo konra nin bilang nin isen kamon lamang sa wanin nin kapapaꞌsar.
4 Matkap a kabilangan nin sarba a kasagradwan nin kasal. Saray mitraasawa, matkap a andiꞌ ra nin sidaen a pikalamoꞌ ran mitraasawa ta tandaꞌ tamo a dusawen nasara liꞌ nin Dios a kiraray sa amboꞌ ran asawa tan saray mamabayi o kilalaki.
5 Andiꞌ kamo nin rupan kwarta. Mapdaꞌ kamoyna sa no ani a main moyo banaꞌ ta wanan mismo nin Dios,
“Kai kata gapo nin pauryan tan kai kata gapo nin lakwanan.”a.
6 Ket ta wanin, bubsat, kai atamo magꞌalangan nin mamaritaꞌ a wantamo,
“Si Dios a mantumulong kongko ket,
kai ako nin maliꞌmo sa magwaꞌ nin gawꞌen kongko nin tawo tamoꞌ.”b
7 Panemtemen moyo saray pupangulo moyon nangiparateꞌ komoyo nin minsahi a nangibwat konan Dios. Dalepdepen moyoy mabistan nagwaan nin nipagkabyay ra, ket arigen moyoy gesen nin pagmamatalek ra kona. 8 Anaod, si Jesu-Cristo, kai ya gapo nin manguman. No siꞌno ya sa linmabas anan panaon, sya et sa anggan sawanin nin panaon, tan sya et liꞌ a lamang sa anggan-angga. 9 Kanyaꞌ nin andiꞌ kamo anamaet nin paibarang sa nagsikabarang nin uakay a naiduma sa Mabistan Patandaꞌ a niyakay komoyo. Oꞌ, say mabista anaod ket si mapagsen a kanakman tamo yupaꞌ sa kamaungan nan Dios. Amboꞌ nin say panunumbok tamo sa ibaritaꞌ nin Gugan-gan maipaꞌkaꞌ sa pangangan a makapamagsen kontamo, ta kasa anamaet nin naitulong nin sain konran saraytaw saray nanumbu-tumbok ana.
10 Main nin pinakadaꞌton tamo a sya nin diri si Jesus. Saray mantumumbok sa Gugan-gan, kasan kanepegan ran kitao konan sitin daꞌton. 11 Anaod, kapada ya in nin daꞌton ran Judio para sa pakapirduna nin kukasalanan. Sa saytin daꞌton, ikaꞌ na nin si Sangkataꞌgayan nin Padiꞌ itaw sa Sangkasantusan nin Lugar a dayaꞌ ran daꞌton nin uayep ket say laman ra matkap nin puuran itaw sa rikor nin babali.c 12 Wanin anamaet, si Jesus a syay pinakadaꞌton tamo, pinadyaꞌdyaꞌ yan nati sa rikor nin babali ta pigaw nin mangibwat sa dayaꞌ na nin tinmuroꞌ ket maparinggas nay tutawo sa kukasalanan ra. 13 Kanyaꞌ nin, bubsat, kikalamoꞌ atamo kona nin rumikor ana sa pammemper a naimatawan tamo tan kiranod atamoyna sa nikatuyaꞌ-tuyaꞌ na 14 ta, sitin mundo, amboꞌ yayti a peteg nin lugar tamo no kai rabay tamoyan tuloy nin marateꞌ taw si peteg nin piikapan tamo liꞌ nin anggan-angga.
15 Ket, banaꞌ sa ginwaꞌ na ni Jesus, raywen tamoyan pirmi a Dios, a ibari-baritaꞌ tamoy sangkabistawan nin ginwaꞌ na para kontamo. Say pangwaꞌ tamo nin wanin ket pinakadaꞌton tamo kona. 16 Matkap a pirmi kamo et nin mangwaꞌ nin maabig yupaꞌ sa panunulong moyo sa saya tan saya, banaꞌ ta say pangwaꞌ moyon wanin ket pinakadaꞌton moyo nin makapamaririket konan Dios.
17 Rengꞌen moyo sara in saray mampangipangulo komoyo tan tumulok kamo sa irgo ra banaꞌ ta trabaho ra in say pagawan rakamo ket umbat sara liꞌ konan Dios no paꞌno ra nin ginwaꞌ in. Paririketen moyo sara sa sitin trabaho ra tan andiꞌ moyo nin paidapen a nakem ra ta kasan magaꞌmuran moyo sa sain.
18 Idasalan rakami. Anaod, tandaꞌ min kasan abas a ginwaꞌ mi ta rabay min say sarban gawꞌen mi ket matunong. 19 Lalu-laloynan dawaten ko komoyo a idasal moyo nin madaliꞌ nakoynan isubliꞌ nin Dios isen komoyo.
Bindisyon tan Masusuyot nin Pangingigalang
20 Anaod, marayo yay Dios! Syay mampamangibwatan nin mabistan kapapaꞌsar. Pinasubliꞌ nayan mabyay si Uunuren tamon Jesus, ket pinagꞌin nayan Sangkabistawan nin Pastor kontamon baraꞌmon kukarniro na sin pinaꞌget na yupaꞌ sa dayaꞌ na nin tinmuroꞌ a magnayon anggan-angga nin nitarato na nin Dios sa tawo. 21 Sawanin, ibi na kumon komoyo mangibwat kona ni Jesu-Cristo a sarba nin matkap moyon tulong ta pigaw nin magwaꞌ moyoy karabayan na para komoyo leleg nin gawꞌen na komoyo no ani a makapaririket kona. Ket, sapa kumon ta itandudoꞌ ya a ngaran na anggan-angga!
Peteg a wanin.
22 Bubsat ko, ta anted ya tamoꞌ man layi ti si surat ko ket dawaten ko komoyo a tarusan moyo nin maong a manꞌibibilin ko.
23 Rabay kon matandaan moyo a si busat tamo nin si Timoteo, bulos yayna ket no kai nin mabalam a kararateꞌ nadti, kalamoꞌ koya liꞌ no mako akodsen komoyo.
24 Iparateꞌ moyoy pammakumusta mi konran saray pupangulo moyo tan konran sarba ran tutawo nan Dios isen.
Saray bubsat nin taga Italia, mampakumustawen rakamo.
25 Sapa kumon ta bindisyunan nakamo ngaꞌmin nin Dios.