2 Bilang wadiꞌ, main nin sayay tawon nisingsing nin balitok tan nisket nin mabli tan mapustura a rinmateꞌ sa dupong moyon mammemper, tan main anamaet nin sayan nisket nin maꞌran, namapas tan nikasamaꞌ ana. 3 Sawanin, mas inasikaso moyay nisket nin mabista a wamoyo “Tumekreꞌ kamodti sa mabistan kamiꞌnan,” tan wamoyo konan pubri, “Umdeng kadtaw e!” O, “Manarikadkad ka tanadtaw e!” 4 Abas in say gawaꞌ moyo. Namipuruk-purok kamo. Bilang kamon hwis nin nangwaꞌ nin kategan a naipatukdoꞌ sa masiblet nin apes.

5 Rumngeꞌ kamo, mampablyen kon bubsat. Si Dios, piniliꞌ nasara a pubri iti sa mundo nin magꞌin nin mayaman sa pammemper, ket ipaikon naya konra a Pagꞌadian na nin nipangakoꞌ na konran saray mangadoꞌ kona. 6 Baleꞌ siꞌkamo, sa inugaliꞌ moyo, pinaayupaꞌ moyay pubri ket inasikaso moyay mayaman. Saray mayaman a mangrumiꞌ komoyo tan saran diri a mangidimanda komoyo. 7 Tuyaꞌ-tuyaen rayay mablin ngaran na ni Jesu-Cristo a syay manꞌalilbien nin main nin ikon kontamo.

8 Mapteg a man-gawꞌen mo no mantumbuken moy Gugan-gan nan Adiꞌ tamo bilang sa wana sa Masanton Kasuratan a, “Aduen moy kapada mon tawo nin kapadan pangangadoꞌ mo sa lalaman mon diri.”^a 9 Baleꞌ no mamipuruk-purok kamo, mampagkasalanan kamo ket sintinsyawan kamon sinmubag sa Gugan-gan. 10 Wanti ta siꞌnuman a kai nin nakasunor konan sayay gan-gan, mataman no natumbok na ngaꞌmin a raruma, sintinsyawan nayan lamang nin Dios a bilang sinubag na ngaꞌmin. 11 Sin wanan Dios, “Andiꞌ ka nin kiraray sa amboꞌ mon asawa,” wana anamaet lamang, “Andiꞌ ka nin mangmati.”^b. Abirno kai ka nin nikilalaki o namabayi, no nangmati ka, sinubag mon lamang ngaꞌmin a Gugan-gan ta sayan-saya yay puon nin gan-gan.

12 Manaritaꞌ tan kumimey kamo nin matunong ta maipadar atamo liꞌ sa pakasintinsya sigon sa gan-gan a mamin pagkanawanawa nin gumwaꞌ sa karabayan nan Dios, a sayti ket say pangawaꞌnan konan Dios tan konran kapada tamon tawo. 13 Anaod, no manintinsya yay Dios, kai naya nin nabuan nin ingangaꞌdo a tawon kai nin nangingaꞌdon kapada nan tawo. Baleꞌ saray mapangingaꞌdo sa kapada ran tawo, kasan nepeg ran ikasalak ta makapangyayadiꞌ a ingangaꞌdo nan Dios konra.

14 Bubsat sa ngaran na ni Cristo, ani a kabalikasan nin wanan sayay tawon main nin pammemper na baleꞌ kai nayti ipatnag nin pammemper na yupaꞌ sa gawaꞌ na? Maisalba ya kasi nin siin a klasin pammemper na? Kai anaod. 15 Bilang wadiꞌ, main saya komoyo a kasaynan maisket na tan magkurang yayna sa kanen. 16 Ket mataman no wamo kona, “Mako kayna a bindisyunan naka kumon nin Dios. Sumadag kumon a seket moyo tan mangan kamon kusto.” No kasa anamaet nin ibi mon saytin pakatkapan nin lalaman ra, ani a kabalikasan nin wamo? Kasa! 17 Wanin anamaet a pammemper no kai paaluyunan nin gawaꞌ, kasan lamang nin sirbi.

18 Magwaꞌ a main nin saya nin magdipinsa a wana, “Say pammemper tana a dalan nin mako konan Dios, mataman no kasan gawaꞌ.” Ket, say ubat ko baleꞌ kona, “Ipaꞌkit ko sa siꞌnuman a main nin pammemper ko nin maꞌkit sa gawaꞌ ko. Baleꞌ no kasan mapteg a gawaꞌ mo, kai mo maipaꞌkit no main nin pammemper mo o kasa.” 19 Main nin pammemper moyo sa sayan-sayay Dios.^c Kusto kamo baleꞌ kai nin sumadag a tepren moyo tana. Mataman saray dudimunyo ket namper sara kanyaꞌ nin nangingintar sara sa liꞌmo ra.

20 Benged a tawo, matkap mon alilbien a say pammemper a kai mapaaluyunan nin gawaꞌ ket kasan kakanaan. 21 Panemtemen ma si ama tamon Abraham. Yupaꞌ sa gawaꞌ na, napapteg ya sa adapan nan Dios sin nikaꞌ naya nin idaꞌton sa bubaton pangidaꞌtunan a anak na a si Isaac banaꞌ sa pammemper na sa nipangakoꞌ nan Dios.^d 22 Kanyaꞌ nin maꞌkit moyon mampialuyon a pammemper na tan gawaꞌ na ket napasibulot a pammemper na banaꞌ sa gawaꞌ na. 23 Wanin a rabay nan ibaritaꞌ nin Masanton Kasuratan a wana, “Si Abraham, nagmatalkan nayay Dios ket, nikwinta na nin Dios a mapteg ya,”^e ket nasabtan yan amigo nan Dios.^f 24 Maꞌkit moyo edet a si sayay tawo ket mapapteg ya banaꞌ sa gawaꞌ na tan amboꞌ tamoꞌ banaꞌ sa pammemper na.

25 Sayay alimbawaꞌ ya et si Rahab, sayay dukaꞌ a babayi. Pinagtuloy nasaray ispyan tawo nan Dios tan pinaliwaꞌ nasaradtaw sa lugar na sa nipangyakay na sa sakalakon dalan ta pigaw nin makalakwan saradtaw. Sa ginwaꞌ na ket napapteg ya sa adapan nan Dios.^g

26 Ket bilang sa lalaman no kasan inanawa na, ket nati ya, wanin anamaet, say pammemper nin kai napaaluyunan nin gawaꞌ, nati.