siꞌko si Santiago a aripen nan Dios tan ni Uunuren a Jesu-Cristo. Surat koyayti komoyo ket iparateꞌ ko a pammagalang ko.

2 Bubsat ko sa ngaran na ni Cristo, no main nin rumateꞌ-rateꞌ komoyo nin saka-sakalakon pakasariꞌ-sariꞌ, akuen moyoyti nin tutuon siririket 3 banaꞌ ta tandaꞌ tamo a no maagwantawan nin pagmamatalek tamo konan Dios ti nin panunubok, magkamain atamon pakababaꞌ nin mangirangep nin animan. 4 Kanyaꞌ nin, andiꞌ kumon nin kumapoy a nakem moyo no kai edet, pakaanos kamo anggan banaꞌ sa pangingirangep moyo ket magꞌin kustoy nikatawo moyo tan kasan pakabalawan moyo.

5 Ket no main komoyo a kurang a kadunungan na maipaꞌkaꞌ sa animan sa kabibyay, matkap a dumasal yan kidawat konan Dios ket byan naya ta maruros a nakem nan mami konran sarban tawo. Kasan dugaꞌ no mami ya tan mabulos a kanakman na. 6 Baleꞌ no kidawat yaytin tawo, matkap a masibulot a pammemper na tan andiꞌ ya magdwadwa ta si sayay magdwadwa, kapada nay daluyon sa taaw nin ipadpad nan siri abirno adti. 7-8 Ket sitin tawon amboꞌ nin napasayay pinanakem na, andiꞌ ya edet milalon mangrisibin animan a mangibwat konan Catawan ta ipaꞌkit nin kabibyay na a kai na maitudoꞌ no siꞌnoy mantumbuken na.

9 Rumiriket kamo, bubsat. Rumiga kan siꞌkan mampagkurang, sa nipangitaꞌgay nan Dios komo sa kapapaꞌsar a bilang kona ni Cristo. 10 Rumiga kaynamaet nin siꞌkan mayaman sa nipamatulok nan Dios komo ta say byay mo,^a kapada a burak nin rabot, kai nin magnayon. 11 Say rabot, makriꞌ sa masakit a amot nan awro, maragrag anay burak, tan masidaꞌ a bista. Wanin anamaet konan mayaman, maꞌmet nayay byay na sa kapresan nan mampipayaman.

12 Makarmaꞌ tan maririket yay tawon makaagwanta nin panunubok ta no nasubok anay pammemper na, makagaꞌmor yan kurunan kasan raruma no kai say byay a nipangakoꞌ nan Catawan konran mangadoꞌ kona. 13 Andiꞌ na kumon ibaritaꞌ nin siꞌnuman a mampangirangep nin panunubok a wana, “Mantukswen nakon Dios.” Si Dios kai ya matukso nin mangwaꞌ nin dukaꞌ tan kai yaynamaet manukso nin siꞌnuman. 14 No kai edet matukso yay tawo no maꞌwit tan maitawtaw yan dukaꞌ a kaririktan nan lalaman nan diri. 15 No tinmuboꞌ tan nakayamot a dukaꞌ a apes, gumungan kasalanan. No nagꞌuray anay kasalanan, umangga sa patiti. 16 Mampablyen kon bubsat, andiꞌ kamo malingo maipaꞌkaꞌ sa puon nin pakatukso.

17 Anaod, sarban maong tan kasan pagkurangan a naibi ana tan maibi et ket mangibwat sa taꞌgay konan Ama nin namarsan palaway sa langit. Masilyan nin dedlem a palaway baleꞌ si Dios, kai ya gapo nin manguman. Say kimey na anamaet ket kai nin pangibwatan nin dedlem nin kabibyay. 18 Sa bukod nin karabayan na ket magꞌin atamon uaꞌnak na sa nipamataros nan minsahin maipaꞌkaꞌ sa katutuꞌwan kontamo. Ginwaꞌ nayti ta pigaw nin naipurok atamon bilang primiron yatab na tan binyan natamon sangkataꞌgayan a lugar sa sarban pinarsa na.

19 Tandaꞌ moyo in, mampablyen kon bubsat. Kanyaꞌ nin matkap tamon adalen a rumngeꞌ tan no magꞌirgo atamo, adalen tamon maong tan andiꞌ atamo madaliꞌ nin umamot a ulo 20 ta say sager, kai nin makatulong sa tawo ta pigaw nin makapangwaꞌ yan matunong sa pangingikit nan Dios. 21 Kanyaꞌ nin gurutan moyo a sarban dukaꞌ a gawaꞌ tan galten moyoy dukaꞌ a pitatawo moyo. Siaayupaꞌ tan situtulok nin akuen moyoy minsahi nan Dios a sin narngeꞌ moyo, naimula sa nakem moyo. Sain say Saritaꞌ nan Dios a makaisalba komoyo.

22 Sawanin, magkabyay kamon kumpruntado sa minsahi nan Dios. No rengꞌen moyo tamoꞌ baleꞌ kai moyo nin sunuren, manluku-lukwen moyo anaod tamoꞌ a lalaman moyo. 23 Anaod, si rumngeꞌ tamoꞌ sa saritaꞌ nin kai nayti nin sunuren, kapada nay sayan mampagꞌispiho. 24 Kikiten nay bakas na miꞌsa yayna mibwat ket tampor a malingwanan nayna a bakas nan naꞌkit na sa ispiho. 25 Kanyaꞌ nin kai sumadag a marngeꞌ moya tamoꞌ ti nin gan-gan a mamin pagkanawanawa kontamo nin gumwaꞌ sa karabayan nan Dios tan kasan pagkurangan. Si tawon magꞌadal nin maong tan sumunor konan siti ket bindisyunan naya nin Dios sa sarban gawaꞌ na.

26 No sa angan-angan nan sayay tawo ket alaki anay pammemper na konan Dios baleꞌ kai na madugaan a pagꞌiirgo na, manluku-lukwen na tamoꞌ a lalaman na ket kasan kakanaan a pagkarilihyuso na. 27 Say tutuon pagkarilihyuso a makapaririket konan Dios a Ama tamo ket, si sayay tawo kai ya nin pasagyat sa dukaꞌ nin tutawo. Edet, alilaen nasaran tulungan a ulila tan saray bubbayin balo nin mampatapuen nin mabyat a prublima.