Si Uꞌnan Surat na ni
JUAN
Tistigusan na ni Juan a Maipaꞌkaꞌ konan si Syay Puon nin Byay
1
Konan sitin surat, manꞌisurat ko komoyo a maipaꞌkaꞌ konan si syay puon nin anggan-angga nin byay a iti konan Dios a si syay Kabalikasan nan Dios. Sya, main yaynan gindat sin tinmaranaꞌ a sarba. Sya, narngeꞌ miya nin apostoles. Sya, naꞌkit miya anaod nin diri. Sya anamaet a lamang, naimatunan tan nagaꞌge-gaꞌgetan miya. 2 Oꞌ, ta pinaipadar ya nin sayay tawodti sa lutaꞌ kanyaꞌ nin naꞌkit miya nin peteg, ket mantistigusan mi tan manꞌipatandaan mi a maipaꞌkaꞌ kona, sya nin pangibwatan nin anggan-angga nin byay a iti konan Dios. Kikalamoꞌ yan pirmi konan Ama ket nipaꞌkit nayayna komi. 3 Sawanin, ta pigaw nin makikalamoꞌ kamo komi ket ipatandaan mi komoyo a naꞌki-naꞌkit mi tan say narnge-narngeꞌ mi. Anaod, sarba tamo ket mangkikalamoꞌ konan Dios a syay Ama tan kona ni Jesu-Cristo nin Anak na. 4 Banaꞌ anaod konan siin a gagara, kanyaꞌ nin manurat-surat kami nin wanti komoyo ta pigaw nin maliso a ririket tamo.Matkap nin Malinis a Kabibyay nan Sayay Tutuon Anak nan Dios
5 Siti a nipatandaan nan Anak nan Dios komi ket manꞌipatandaan mi ti anamaet komoyo: Say pigagawaꞌ nan Dios ket palaway; kona ket, kasa gapo nin animan nin bilang kadedleman.
6 Kanyaꞌ nin no ibaritaꞌ tamo a mangkikalamoꞌ atamo konan Dios baleꞌ mampisyon atamo et sa kadedleman, mampibulaꞌ-bulaꞌ atamo banaꞌ ta say man-gawꞌe-gawꞌen tamo ket amboꞌ nin kumpruntado sa katutuꞌwan a nipatandaan nan Dios. 7 Baleꞌ no magmantini atamon iti sa palaway a kapada a si Dios ket iti ya sa palaway, magꞌin mabista a pikakalamoꞌ tamo sa saya tan saya, tan lawas a mangkaringgasan atamo sa kasalanan tamo banaꞌ sa dayaꞌ nan Anak nan si Jesu-Cristo nin tinmuroꞌ.
8 Wanin a lamang, no ibaritaꞌ tamo a kasa gapo nin kasalanan tamo, manluku-lukwen tamoy lalaman tamon diri tan kai tamoyna nin tandaꞌ a katutuꞌwan. 9 Baleꞌ no akuen tamo a kasalanan tamo konan Dios, pirdunawen natamo tan ringgasan natamo sa sarba nin kadukaan tamo banaꞌ ta mapteg ya tan tutuo ya sa pangakoꞌ na.
10 Saya et, no ibaritaꞌ tamo a kai atamo nin nagkasalanan, ibaritaꞌ tamo et a mabulaꞌ yay Dios, tan kai tamo gapo nin inakoꞌ a nibaritaꞌ na.