3 Sigurado atamo a katandaꞌ tamoyay Dios banaꞌ ta mantumulok atamo sa gan-gan na. 4 Kanyaꞌ nin no ibaritaꞌ nan sayay tawo a katandaꞌ nayay Dios baleꞌ kai ya nin mantumulok sa gan-gan na, mampibulaꞌ-bulaꞌ ya tan madlaw a kai na nin inakoꞌ a katutuꞌwan a nipatandaan nan Dios kona. 5-6 Baleꞌ si sayay tawo nin mantumulok sa nibaritaꞌ nan Dios, sya a mampangawaꞌnan nin kusto konan Dios.^a Anaod, si sayay mamaritaꞌ a mangkikalamoꞌ ya konan Dios, matkap a say kabibyay na ket kapaday kabibyay na ni Jesu-Cristo. No wanin a gawꞌen tamo, siin a pakasiguradwan tamo a peteg a mangkikalamoꞌ atamo konan Dios.

7 Kukawaꞌnan ko, amboꞌ yan baꞌyon gan-gan ti si manꞌipatandaꞌ ko komoyo no kai siti yaytaw lamang si gindat a gan-gan a narnge-narngeꞌ moyoyna nangibwat et sin tinmaranaꞌ kamon tumumbok kona ni Jesu-Cristo. Siti anaod ket si mangkarnge-karngeꞌ moyoyna a gan-gan a wana matkap moyon kawaꞌnanen a saya tan saya. 8 Baleꞌ baraꞌmo yaynan lamang ti nin baꞌyon gan-gan banaꞌ ta siti ket naꞌkit ya sa nipagkabyay na ni Cristo tan wanin anamaet sa kabibyay moyo sawanin. Wanin ta say kadedleman nin kadukaan ket mangkaglat ana komoyo tan si tutuo nin palaway ket mansumlag yayna sa kabibyay moyo.

9 No main nin mangibaritaꞌ a mampagkabyay yayna nin iti sa palaway nan Dios, baleꞌ man-guraen nasaray kalalamoꞌ na, sya, mampagkabyay ya et a lamang sa kadedleman. 10 Anamaet, si saya nin mampangadoꞌ sa kalalamoꞌ na ket mampagmantini yan mampagkabyay nin iti sa palaway nan Dios, sa sain a pigagawaꞌ na ket kasan pagkasalananan na.^b 11 Baleꞌ si saya a man-guraen nasaray kalalamoꞌ na, mampiikap ya et sa kadedleman tan say pigagawaꞌ na ket dukaꞌ. Kai na mangkaꞌkit no adti a mangkeen na banaꞌ ta binulag ya nin kadedleman.

14 Anamanaet, mampanurat ako anaod komoyon paꞌsar ket aꞌnak, banaꞌ ta katandaꞌ moyayna a Ama tamo; komoyon paꞌsar ket mangatuntawo, banaꞌ ta katandaꞌ moyaytaw si main yayna nin gindat sin tinmaranaꞌ a sarba; tan komoyon paꞌsar ket mangalalagoꞌ, banaꞌ ta magsen kamo sa pammemper moyo, tan banaꞌ ta naimula a minsahi nan Dios sa kapusuan moyo, tan banaꞌ ta nadaeg moyayna si sya a Kadukaan.

15 Anaod, matkap a andiꞌ moyo nin paalagawan a pigagawaꞌ a kuntra sa no ani a rabay nan Dios ni say bubagay iti sa mundo. No paalagawan moyoyti, kasa nin pangangawaꞌnan moyo konan Dios a Ama tamo. 16 Wanin banaꞌ ta say pigagawaꞌ a kuntra sa no ani a rabay nan Dios bilang say gawꞌen a animan a manꞌapesen, say rabayen nin maikon a bubagay a maꞌkit, o say pasirayo banaꞌ sa kapapaꞌsar sa byay, sayti ket kasan kabiangan konan Dios ta kai ti nin nangibwat kona a syay Ama tamo no kai edet, nangibwat iti sa mundo. 17 Anamaet a lamang, si mundo tan say manꞌapes-apesen nin iti kona ket pariho liꞌ nin makasa; baleꞌ si saya nin mantumulok sa no ani a rabay nan Dios, lawas a mabyay ya anggan-angga.

18 Manꞌaduen kon aꞌnak, dandani ana mangangga a kapresan nin kapapaꞌsar iti sa mundo! Narnge-narngeꞌ moyoyna sa niyakay komoyo a main liꞌ nin lumiwaꞌ a mansabtan nin si kuntra kona ni Cristo. Ket sawanin maꞌkit moyo a abaw sarayna a manlumwas nin kuntra kona ni Cristo, ket banaꞌ sa wanin, masigurado tamo a peteg nin dandani ana anaod nin mangangga. 19 Sarain nin mampanguntra kona ni Cristo, nikikalamoꞌ saran gindat kontamo, baleꞌ amboꞌ tamo sara nin peteg nin kalalamoꞌ kanyaꞌ nin sinumyay sara. Anaod, no peteg a kalalamoꞌ tamo sara kai sara kumon nin nikisyay. Ket banaꞌ anaod ta nikisyay sara, naipaꞌkit a sara ngaꞌmin ket amboꞌ tamo saran peteg nin kalalamoꞌ.

20 Baleꞌ siꞌkamo, mampisyon ya komoyo a Ispirito nan Dios a nibakiꞌ na nin sya Masantos ya, a sya si Cristo, kanyaꞌ nin tandaꞌ moyo nin ngaꞌmin a mangipurok nin katutuꞌwan a mangibwat konan Dios. 21 Amboꞌ nin banaꞌ ta wangko ket kai moyo nin tandaꞌ a katutuꞌwan kanyaꞌ nin mampanurat ako komoyo, no kai edet, banaꞌ ta tandaꞌ moyoyti tan tandaꞌ moyon lamang a kasan bulaꞌ a mangibwat sa katutuꞌwan.

22 Sawanin ibaritaꞌ ko komoyo no siꞌnoy mabulaꞌ! Sitaw si mangibaritaꞌ a si Jesus ket amboꞌ ya a Cristo nin nipangakoꞌ nan Dios! Si mampangibaritaꞌ nin siin ket sya a kuntra kona ni Cristo, ket amboꞌ ya tamoꞌ a Anak nan Dios a kai na nin manꞌalilbien no kai pati si Ama nan Anak. 23 Wanin banaꞌ ta si siꞌnuman a kai nin manungtong konan Anak nan Dios, siti, kai ya nin naipasaya konan Dios a Ama na. Wanin a lamang, si manungtong konan Anak nan Dios, naipasaya yaynan lamang konan Dios a Ama.

24 Ket siꞌkamo, matkap anaod nin pirmi moyo nin imula sa nakem moyo a katutuꞌwan a mangkarnge-karngeꞌ moyoyna nangibwat et sin tinmaranaꞌ kamon tumumbok kona ni Jesu-Cristo. Banaꞌ ta no gawꞌen moyo in ket mampisyon kamoynan lamang nin iti konan Ama tan iti konan Anak na, 25 ket manꞌibyay moyoynay anggan-angga nin byay a iti konan Dios a nipangakoꞌ^c na nin diri ni Cristo kontamo.

26 Manꞌisurat koyti komoyo ta pigaw nin pakandaꞌ kamo maipaꞌkaꞌ konra nin saray marabay nin mangibarang komoyo. 27 Baleꞌ siꞌkamo, si Ispirito nan Dios nin nibakiꞌ na ni Jesu-Cristo ket mampisyon ya komoyo. Kanyaꞌ nin kai moyoyna nin matkap a raruma et nin mangyakay komoyo nin katutuꞌwan nin nangibwat konan Dios no kai edet, syay mangyakay komoyo sa sarban matkap moyon tandaen. Sarba nin iyakay na ket tutuo, amboꞌ nin bulaꞌ-bulaꞌ, kanyaꞌ nin matkap moyoy dumaer nin kikalamoꞌ kona ni Jesu-Cristo a bilang sa niyakay naynan Ispirito komoyo.

28 Ket banaꞌ anaod ta wanin, aꞌnak, dumaer kamon makikalamoꞌ kona ni Cristo ta pigaw nin kasa liꞌ nin ikaliꞌmo tan ikadingꞌey moyo kona no sumubliꞌ ya. 29 Tandaꞌ moyoyna a si Cristo ket kasa gapon kasalanan na, kanyaꞌ nin matkap moyo anamaet nin matarusan a saray mampangwaꞌ nin mapteg tan matunong, sarayti aꞌnak nasaraynan Dios.