Tumarigꞌen atamo nin Gumurot sa Kadukaan
3
Panemtemen moyo no paꞌno natamo nin kawaꞌnan nin maong nin Dios a Ama tamo. Wanin natamo nin kawaꞌnan ket manꞌikwinta natamo nin aꞌnak na! Oꞌ, peteg anaod a aꞌnak natamo! Baleꞌ saray tutawo nin say mangkapagawan ra ket say maipaꞌkaꞌ iti sa mundo, kai ratamo nin maalilbiꞌ nin aꞌnak nan Dios banaꞌ ta kai raya anaod nin katandaꞌ a Dios. 2 Kukawaꞌnan ko, aꞌnak natamoyna nin Dios sawanin sa kapresan, baleꞌ kai tamo et nin peteg nin mataros a pagꞌinan tamo liꞌ sa adapen. Wanin man, tandaꞌ tamoyna a no sumubliꞌ ya liꞌ si Cristo, maꞌkit tamoyna liꞌ a peteg a kapapaꞌsar na, ket magꞌin atamo nin bilang kona. 3 Kanyaꞌ nin si sayay mampangilalo sa sain, tumarigꞌen ya nin gumurot sa kadukaan ta pigaw nin maringgas ya lawas a kapada naya si Cristo a malinis ya.4 Si sayay mampagkasalanan, mangkumuntra ya konan Dios, ta say kasalanan, syay kakukuntra konan Dios. 5 Tandaꞌ moyoyna a nako yadti sa lutaꞌ si Cristo ta pigaw nin galten na a kukasalanan, tan tandaꞌ moyo a kasa gapo nin animan nin kadukaan nin main kona. 6 Ket banaꞌ ta wanin, si siꞌnuman a dumaer yan kikalamoꞌ kona ni Cristo, kai nayna nin ituloy a pagkakasalanan na. Baleꞌ si siꞌnuman nin mantumuloy nin magkasalanan, kai na et nin naꞌkit a kinasiꞌno na ni Cristo, ni kai naya nin katandaꞌ.
7 Kawa-kawaꞌnan kon aꞌnak ko, pakatalad kamo a kai kamo maibarang nin siꞌnuman maipaꞌkaꞌ sa sayti. Si sayay mampangwaꞌ nin no ani a mapteg sa pangingikit nan Dios, sya, matunong ya a bilang si Cristo nin matunong. 8 Baleꞌ si saya nin manꞌituluy-tuloy nay magkasalanan, sya, mampagꞌurayan nayan Dimunyo. Tandaꞌ tamo nin wanin banaꞌ ta si Dimunyo, mampagkasalanan yayna nangibwat et sin taranaꞌ. Ket si gagara anaod a nako yadti sa lutaꞌ a Anak nan Dios ket ta pigaw nin sidaen nay gawaꞌ-gawaꞌ nan Dimunyo.
9 Kanyaꞌ nin si sayay tutuon anak nan Dios, kai ya nin tumuloy nin magkasalanan banaꞌ ta say pinanakem na nin Dios a iti kona. Banaꞌ anaod ta si ibwatan na ket si Dios, kai magwaꞌ a tumuloy ya nin magkasalanan. 10 Sawanin, maipurok tamo no siꞌno saray aꞌnak nan Dios tan no siꞌno saray aꞌnak nan Dimunyo, ta si sayay mampangwaꞌ nin amboꞌ nin mapteg, sya, amboꞌ naya nin anak nin Dios. Wanin ya anamaet a saya nin kai nin mampangawaꞌnan nin kalalamoꞌ na.
Matkap nin Kawaꞌnanen Tamo a Saya tan Saya
11 Wanin ta si akay a matkap a kawaꞌnanen tamo a barang saya nin kalalamoꞌ tamo, ket, niyakay yayna kontamo nangibwat et sin tinmaranaꞌ kamon mamper. 12 Matkap a amboꞌ atamo nin bilang kona ni Cain, ta sya, mampagꞌurayan naya nin si sya a Kadukaan, ket pinati naya a ari na. Anaod, banaꞌ ta dukaꞌ a pigagawaꞌ na ni Cain, kuntra sa pigagawaꞌ nan ari na a sayti ket matunong, kanyaꞌ nin pinati naya. 13 Anaod, bubsat, andiꞌ kamo nin makaꞌngap a saray kuntra konan Dios ket kuntrawen rakamo anamaet.
14 Wanin man, siꞌtamo, tandaꞌ tamo a kai atamoyna nin naisyay konan Dios a bilang sin saytaw, no kai edet, main anan byay tamo nin iti kona. Tandaꞌ tamo nin wanti banaꞌ ta mangkawaꞌnanen tamo saray bubsat tamon mammemper. Si saya nin kai mampangawaꞌnan sa kapada na, paꞌsar na a nati ta naisyay ya konan Dios. 15 Wanin ta si sayay mampanguraꞌ nin kapada na, bilang yaynan lamang nin mampangmati nin kapada nan tawo tan mapalaway a si sayay mangmamati, kasa kona a anggan-angga nin byay a iti konan Dios. 16 Maadal tamoynan peteg no paꞌno a mangawaꞌnan yupaꞌ konan siti e: Si Jesu-Cristo, masibulot a nakem na nin nibi na a byay na para kontamo. Kanyaꞌ nin siꞌtamo anamaet, matkap a sisasadyaꞌ atamo nin tumulong konran kalalamoꞌ tamo mataman nin sayti ket pakamatyan tamo. 17 Sawanin anaod, no main nin saya kontamo a main nin magwaꞌ nan itulong a mangkaꞌkit nan mampagkurang ya sa byay a sayay busat baleꞌ kai nayayti nin tulungan, ipaꞌkit nin mapalaway nin sayti a kasa kona a pangangawaꞌnan a mangibwat konan Dios! 18 Kanyaꞌ nin, manꞌaduen kon aꞌnak, matkap a say pangangawaꞌnan tamo konran kalalamoꞌ tamo ket amboꞌ nin angga tamoꞌ sa irgo, no kai edet, matkap nin peteg tan matkap a maꞌkit sa gawaꞌ tamo.
Say Katutulok Pagsenen a Nakem tamo sa Adapan nan Dios
19-20 No wanin a pangangawaꞌnan tamo sa saya tan saya, matandaan tamon peteg a si puon tamo ket si sya a katutuꞌwan. Ket mataman no say kunsinsya tamo ket gulwen atamo, mapagsen tamon lamang a nakem tamo sa adapan nan Dios. Wanin banaꞌ ta katandaꞌ natamoyna nin maong nin Dios, nin mas et dyan say sain nin kunsinsya tamo ket katandaꞌ atamo, ta peteg a matukod na nin Dios a sarba. 21 Ket, kukawaꞌnan ko, banaꞌ ta malinis a kunsinsya tamo, kasan ikaliꞌmo tamon kumadani konan Dios 22 tan animan a dawaten tamo kona, ibi nayna banaꞌ ta mantumulok atamo sa nigan-gan na tan man-gawꞌen tamo no ani a makapaririket kona.
23 Ket anaod siti a nigan-gan na kontamo:
Matkap a pagmatalkan tan alilbien tamoya a Anak na a si Jesu-Cristo tan matkap a kawaꞌnanen tamo a saya tan saya, a sitin lamang a nigan-gan na kontamo ni Jesu-Cristo.
24 Anaod si saya nin mantumulok sa nigan-gan nan Dios, mangkikalamoꞌ ya konan Dios, tan si Dios mampisyon yaynamaet kona. Tandaꞌ tamo nin si Dios mampisyon ya kontamo banaꞌ konan Ispirito na nin nibakiꞌ na kontamo.