Matkap tamon Subuken a Sarban Akay
4
Kukawaꞌnan ko, andiꞌ kamon tampor nin mamper konran mangibaritaꞌ a say akay ra ket nangibwat konan Ispirito nan Dios. No kai edet usisaen moyon maong no say manꞌibaritaꞌ ra ket peteg a nangibwat konan Dios. Wanin banaꞌ ta abaw sarayna sawanin iti sa mundo a mampibulaꞌ-bulaꞌ nin manꞌibaritaꞌ ra a prupita nasaran Dios. 2 Si pangipurukan moyo a say manꞌibaritaꞌ ra ket nangibwat konan Ispirito nan Dios ket siti:Alilbien ra a si Jesu-Cristo ket nagꞌin ya nin tawo.
3 Baleꞌ no kai ra nin alilbien a si Jesus ket sya a Cristo nin nagꞌin nin tawo, amboꞌ nin si Ispirito nan Dios a iti konra no kai edet, si nangibwat konan si kuntra kona ni Cristo. Narnge-narngeꞌ moyoyna a main liꞌ nin rumateꞌ nin kuntra kona ni Cristo ket ibaritaꞌ ko komoyo a iti ana sawanin.
4 Baleꞌ siꞌkamon kawa-kawaꞌnan ko, ikon nakamon Dios. Oꞌ a ta nadaeg moyo sarayna in saray mampangyakay nin bulaꞌ-bulaꞌ banaꞌ ta si Ispirito nan Dios nin iti komoyo ket mas makapangyayadiꞌ ya dyan si kuntra kona ni Cristo nin mampagꞌuray konran kaꞌbawan nin tawodti sa mundo. 5 Sarain anamaet saray mampangyakay nin bulaꞌ-bulaꞌ, say ibwatan ran sarayti ket iti tamoꞌ sa mundo. Ket, say iti sa mundo a pamatukduan ra nin manꞌiyakay ra ket, saray tutawon kapada radti sa mundo, mangrengeꞌ sara konra. 6 Baleꞌ siꞌkamin apostoles, ikon nakami anaod nin Dios. Kanyaꞌ nin si siꞌnuman a katandaꞌ nayay Dios ket mangrengeꞌ ya sa iyakay mi. Baleꞌ saray amboꞌ nan ikon nin Dios, andiꞌ sara nin rumngeꞌ. Mangibwat sa sayti, maipurok tamo saray mampagꞌurayan nan Ispirito nan Dios a syay ibwatan nin katutuꞌwan tan no siꞌno sara a mampagꞌurayan na ni Satanas a syay ibwatan nin kabulaan.
Kinawaꞌnan natamon Dios Ket Mikawaꞌnanan atamo anamaet
7 Kukawaꞌnan ko, matkap a kawaꞌnanen tamo a saya tan saya banaꞌ ta say pangangawaꞌnan ket nangibwat konan Dios. Ket si saya nin mampangawaꞌnan nin kalalamoꞌ na, saya yaynan anak nan Dios tan katandaꞌ naya a Dios. 8 Si saya anamaet nin kai nin mampangawaꞌnan, kai naya gapo nin katandaꞌ a Dios. Wanin, banaꞌ ta say pigagawaꞌ nan Dios ket si pirmi ya nin mangawaꞌnan. 9 Ket wanti na e nin nipaꞌkit nin Dios a pangangawaꞌnan na kontamo: Nibakiꞌ nayadti sa lutaꞌ a kapagkapag nin Anak na ta pigaw nin yupaꞌ kona, ket magkamain atamo nin byay a iti konan Dios. 10 Kanyaꞌ nin sawanin, naꞌkit tamoyna no paꞌno a peteg nin pangangawaꞌnan. Siti ket amboꞌ nin no paꞌno tamoya nin kinawaꞌnan a Dios, no kai edet, no paꞌno natamo nin kinawaꞌnan nin Dios ket nibakiꞌ nayadti a Anak na ta pigaw nin syay dusawen nin dusa nin kasalanan tamo ta pigaw nin sayti ket mapirduna.
11 Kukawaꞌnan ko, banaꞌ ta wanin ana a pangangawaꞌnan nan Dios kontamo, matkap anamaet a kawaꞌnanen tamo a saya tan saya. 12 Tutuo a kasa et gapo nin tawon nakaꞌkit ana konan Dios, baleꞌ no kawaꞌnan tamo a saya tan saya, iti yay Dios kontamo ket, say pangangawaꞌnan nan Dios, magꞌin maꞌkit nin tuloy kontamo.
13 Say pakatandaan tamo a mangkikalamoꞌ atamo konan Dios tan mangkikalamoꞌ ya kontamo a Dios, ket si Ispirito na a nibakiꞌ nayan miikap kontamo. 14 Ket siꞌkami, naꞌkit miya anaod si Jesus kanyaꞌ nin matistigusan mi a si Dios, nibakiꞌ nayadti sa lutaꞌ a Anak na a si Jesus ta pigaw nin isalba nasaray tutawo. 15 Sawanin, si sayay mangalilbiꞌ a si Jesus ket Anak naya nin Dios, siti, mangkikalamoꞌ ya konan Dios tan si Dios mampisyon ya kona. 16 Kanyaꞌ nin siꞌtamo nin mampangalilbiꞌ kona ni Jesus, nasariꞌ tamoyna a pangangawaꞌnan nan Dios tan mampagmatalek atamo sa pangangawaꞌnan na kontamo.
Say pigagawaꞌ nan Dios ket si pirmi nin mangawaꞌnan. Kanyaꞌ nin si tawo nin lawas nin mampangawaꞌnan konan Dios tan konran kalalamoꞌ na, siti nin tawo mangkikalamoꞌ ya konan Dios tan si Dios mampisyon ya anamaet kona. 17 Ket ta wanin a kabibyay tamo, mapasibulot a pangangawaꞌnan tamo, ket kasa liꞌ nin sukat nin ikaliꞌmo tamo no marateꞌ a Awron Manintinsya yay Dios konran tutawo. Wanin tamo ta mapasibulot ana a pangangawaꞌnan tamodti sawanin kapadan sibulot nin pangangawaꞌnan na ni Cristo. 18 No main nin pangangawaꞌnan, kai magwaꞌ nin mailawok a liꞌmo banaꞌ ta say pangangawaꞌnan a peteg, galten a liꞌmo. Say peteg a ikaliꞌmo ran tutawo ket say pakadusa kanyaꞌ nin no ikaliꞌmo tamo et a pakadusa, mapalaway a say pangangawaꞌnan tamo ket main et nin pagkurangan.
19 Si Dios, kinawaꞌnan natamoyna yapoꞌ nin nuꞌna, kanyaꞌ nin siꞌtamo, kawaꞌnan tamoyay Dios tan saray kalalamoꞌ tamo. 20 Sawanin, no si sayay tawo ket ibaritaꞌ na a kawaꞌnan naya a Dios baleꞌ mampangwaꞌ yan kuntra konran kalalamoꞌ na, mabulaꞌ ya. Wanin ta no si kalamoꞌ nan mangkaꞌkit na ket kai naya nin maadoꞌ, paꞌno naya kadiꞌ nin maadoꞌ a Dios a kai na nin maꞌkit? 21 Siti anaod e a nigan-gan nan Dios kontamo: Si mampangawaꞌnan konan Dios matkap anamaet a kawaꞌnanen nasara a kalalamoꞌ na.