Madaeg nin Pagmamatalek konan Cristo a say Kuntra konan Dios
5
Si siꞌnuman a mantepren na a si Jesus ket sya a Cristo nin nipangakoꞌ nan Dios, si Dios, gawꞌen nayaytin anak nan diri. Si mangawaꞌnan konan Dios a syay nangwaꞌ nin anak kona, kawaꞌnanen nasara anamaet a lamang nin siti a aꞌnak nan Dios. 2 Kanyaꞌ nin matandaan tamo sawanin a kawaꞌnan tamo sara anamaet a kalalamoꞌ tamo a sarayti aꞌnak nasaran Dios no mangkawaꞌnanen tamoyay Dios tan mantumulok atamo sa gan-gan na. 3 Oꞌ ta, no tutuo anaod a mangkawaꞌnanen tamoyay Dios, tumulok atamo sa bibilin na. Anamaet, amboꞌ nin maidap nin tuloy nin tukiden 4 banaꞌ ta si sayay anak nan Dios, lawas a madaeg na a pakatukso iti sa mundo nin sumubag konan Dios. Say manꞌipanaeg tamo, ket say pagmamatalek tamo.5 Wanin banaꞌ ta kasan raruma nin makadaeg sa subag sa karabayan nan Dios iti sa mundo no kai si saya nin mamper a si Jesus ket Anak nayan Dios.
Pinatutuꞌwan nan Dios a si Mampagmatalkan tamo ket Anak naya
6 Sin nako yadti sa lutaꞌ si Jesu-Cristo, main nin rwa nin namatutuo a Anak naya nin Dios. Si saya, si nikabawtismoa na sa ranom. Amboꞌ tamoꞌ anaod nin say nikabawtismo na sa ranom a mamatutuo, no kai pati say dayaꞌ nan tinmuroꞌ sin nati yan nipasak sa kudos. Ket sawanin, main nin ikatlo, si Ispirito nan Dios, a syay pangibwatan nin katutuꞌwan ket patutuꞌwan na in nin maipaꞌkaꞌ kona ni Jesu-Cristo. 7 Kanyaꞌ nin main nin tulo ra nin mamatutuo sa maipaꞌkaꞌ kona ni Jesu-Cristo, no siꞌno ya:
8 Si Ispirito nan Dios, say ranom, tan say dayaꞌ.
Sain nin tulo, say pammatutuo maipaꞌkaꞌ kona ni Jesu-Cristo ket pari-pariho. 9 Oꞌ anaod, pinatutuꞌwan nan Dios a si Jesus ket Anak naya. Magwaꞌ tamo nin tepren a pammatutuo nin tawo tamoꞌ, baleꞌ say pammatutuo nan Dios ket mas maꞌget, kanyaꞌ nin matkap tamo nin tepren. 10 Si siꞌnuman a magmatalek konan Anak nan Dios, sigurado ya a sain a pammatutuo nan Dios ket peteg a tutuo. Ket si siꞌnuman anamaet a kai nin mamper sa pammatutuo nan Dios, mampaliwaen nan mabulaꞌ yay Dios banaꞌ ta kai na nin tepren a wanan Dios maipaꞌkaꞌ konan si Anak na a si Jesus. 11 Anaod, sayti a pammatutuo nan Dios:
Siꞌtamon mammemper, binyan natamoyna nin anggan-angga nin byay a iti kona ket, si ibwatan nan siti nin byay, si Anak na.
12 Kanyaꞌ nin si siꞌnuman a naipasaya konan Anak nan Dios, main nin byay na a iti konan Dios, baleꞌ si saya nin kai nin naipasaya konan Anak nan Dios, kasa kona a byay a iti konan Dios.
Say Paninigurado nin Naikon anay Byay a iti konan Dios
13 Manꞌisurat koyti ngaꞌmin komoyo nin mampagmatalek sa ginwaꞌ nan Anak nan Dios ta pigaw nin matandaan moyo a main nin anggan-angga nin byay moyo a iti konan Dios.
14 Oꞌ, banaꞌ sa wanin, sigurado atamo a animan a dawaten tamo kona nin kumpruntado sa karabayan na, ket rengꞌen na. 15 Ket banaꞌ ta tandaꞌ tamo a rengꞌen na a animan a dawat tamo, sigurado atamon lamang a ibi nay mandawaten tamo.
16 Bilang wadiꞌ ket mangkaꞌkit tamoya nin mampagkasalanan a kapada tamo nin mammemper, matkap a idasalan tamoya ta pigaw nin pabyayen naya et nin Dios, no dapot tana a say kasalanan na ket saytaw say amboꞌ nin pangibwatan nan maisyay konan Dios anggan-angga. Nibaritaꞌ ko in ta main nin kasalanan a makaisyay konan Dios anggan-angga ket kai ko nin manꞌibaritaꞌ a idasalan tamo sara a tutawon mampangwaꞌ nin wantin klasin kasalanan. 17 Sarba nin dukaꞌ a gawaꞌ ket kasalanan. Wanin man, main nin kasalanan a kai nin pangibwatan nin maisyay konan Dios anggan-angga.
18 Anaod, tandaꞌ tamo nin kasan anak nan Dios a tumuloy nin magkasalanan, banaꞌ ta si Anak na nin si Jesu-Cristo iyilag nasara, ket kai nasara nin mapaꞌno nin si sya a Kadukaan.
19 Tandaꞌ tamo a mataman nin mampagꞌurayan nasara nin si sya a Kadukaan a sarba ran kai nin mamper, siꞌtamo baleꞌ, aꞌnak natamon Dios.
20 Tandaꞌ tamo et a si Anak nan Dios, nako yadti ket binuꞌkasan nay kukaisipan tamo ta pigaw nin nakatandaꞌ tamoya a sya, tutuo ya. Anaod, ta naipasaya atamo konan si Anak na a si Jesu-Cristo, ket naipasaya atamo anamaet konan Dios a sya, tutuo ya. Sya a tutuon Dios tan sya a ibwatan nin anggan-angga nin byay a iti konan diri.
21 Manꞌaduen kon aꞌnak, pakandaen moyo a kasa gapo nin raruman mangalap nin lugar nan tutuon Dios sa kabibyay moyo.