Say Dukaꞌ a Pigagawaꞌ ra liꞌ nin Tutawo sa Susuyot a Awro
3
Tandaan moyti baleꞌ: Sa susuyot a panaon ket pinasyan idap liꞌ nin maong a magtrabaho para konan Dios. 2 Wanin ta kasabyan ra liꞌ nin tutawo ket say lalaman ran diri tamoꞌ a isipen ra, rupan kwarta sara, mipaong sara, marangas sara, mamadukaꞌ saran kapada ran tawo, kai sara mangibilang konran mangatua ra, kasan utang ran maong a nakem konan Dios tan konran tutawo, amboꞌ saran makaDios, 3 kasan kaingaran ran mangawaꞌnan, kai sara makapirduna, mamadukaꞌ sara, kasan pagdadangkaꞌ ra sa lalaman ran diri, marumiꞌ sara, tan guraen ray sarban maabig; 4 tutraidor sara, ikon ray ikon ra, magmamalaki sara, gustu-gusto ran gawꞌen a makapariga sa byay dyan si aduen yay Dios. 5 Rilihyuso sara baleꞌ kai raya nin aburuyan a Dios nin umanen nay byay ra yupaꞌ sa pakayadiꞌ na. Kadayꞌan mosara a wanin nin klasin tutawo!6 Anaod, main sara konra a manaktika nin makasrep sara sa bubali ta pigaw nin mapagꞌurayan rasaray bubbayin garanggandyang. Mangkabyatan saraytin bubbayi banaꞌ sa kasalanan ra tan mangkaayat sara nin saka-sakalakoynan klasin kadukaan banaꞌ sa manꞌapesen ra. 7 Manꞌadalen ray sarbaynan klasin akay, baleꞌ kai ra et a lamang nin maalilbiꞌ a katutuꞌwan nin nangibwat konan Dios.
8 Sarain nin tutawon manglilingo, no paꞌno a si Janes tan si Jambresa ket kinmuntra sara kona ni Moises sin saytaw, wanin anamaet, sarain, mangkumuntra sara sa katutuꞌwan nin nangibwat konan Dios. Dukaꞌ anay kaisipan ra tan andian nasaran Dios maipaꞌkaꞌ sa pammemper ra. 9 Baleꞌ kai nin lamang nin tumuluy-tuloy in a man-gawꞌe-gawꞌen ra ta sa kaꞌtengan ket matandaan anaod nin sarba a abas sara kapada a say kaabasan ra ni Janes tan ni Jambres ket natandaan.
Say Namatukduan nin Bibilin na ni Pablo kona ni Timoteo
10 Siꞌka baleꞌ, Timoteo, naadal nakon maong. Tandaꞌ moy manꞌiyakay ko, say ugaliꞌ ko, say gagara ko sa byay, say pagmamatalek ko konan Dios, say anos ko, say panglalabi ko sa kapada kon tawo tan say nipangitpel ko nin abaw a nipamadyaꞌdyaꞌ kongko. 11 Tandaꞌ mo et nin abaw a dinalanan kon nipanuksa-duksaꞌ a bilang sa say nangyadiꞌ kongkodtaw sa Antioquia, sa Iconio tan sa Listra. Aninay idap saytaw a nirangep ko! Ket si Uunuren nilasat nako sa sarban sain! 12 Anaod, sarba ran marabay nin magkabyay nin mapteg sa pangingikit nan Dios banaꞌ sa nikaipasaya ra konan Cristo a si Jesus ket dumalan sara sa pakaduksa-duksaꞌ. 13 Saray dukaꞌ anamaet baleꞌ nin tutawo tan saray manglilingo, mandumukaꞌ saraynan mandumukaꞌ. Tumuluy-tuloy saran manglingo tan sara anamaet a lamang a tumuluy-tuloy nin malingo. 14 Baleꞌ siꞌka, Timoteo, dumaer ka sa sayti a naadal mo komi tan peteg a mantepren mo, banaꞌ ta katandaꞌ mosara anaod a nangyakay-akay komo 15 tan banaꞌ ta tandaꞌ mo anamaet ana a Masanton Kasuratan nangibwat et sin anak ka. Sayti ket namuꞌkas nin kanakman mo maipaꞌkaꞌ sa pakaisalba mangibwat sa pagmamatalek konan Cristo a si Jesus. 16 Say intiro nin Masanton Kasuratan, si Dios a nangipangisip a nisurat tib ket mausar ti sac pangangakay nin katutuꞌwan tan sa pakatandaꞌ sa abas a mangkagawaꞌ, sa pangingipatunong nin lingo tan sa pangangakay nin mapteg a pagkakabyay, 17 ta pigaw nin si tawo nan Dios ket magꞌin kasan pagkurangan na tan magꞌin naisadyaꞌ yan maong para sa animan a maabig a gawaꞌ.