Si Tito, saya yan amboꞌ nin Judio; nagꞌin ya nin mammemper kona ni Jesu-Cristo yupaꞌ sa nipangipatandaꞌ na ni Pablo konan Mabistan Patandaꞌ. Nagꞌin nayan kala-kalamoꞌ ni Pablo a katulungan naya sa trabaho para konan Catawan. Saya yan mailalwan kanyaꞌ nin nibatiꞌ nayadtaw sa islan Creta ta pigaw nin tulungan tan ipatunong nay kapapaꞌsar nin dudupong ran mammemper itaw.

Sin sinurat nayayti ni Pablo say kapapaꞌsar sa dupong ran mammemper ket makapabereng. Kasa et nin nasuyoꞌ nin pupangulo nin dudupong nin mammemper, tan abaw sara konra a mampangyakay nin abas a uakay ket manlingwen saray raruma konran mammemper. Saya et, sarain nin mangangakay ket mampangwaꞌ saran dukaꞌ nin mampangikadayoꞌ konran mammemper sa mabistan byay a rabay na nin Dios. Kanyaꞌ nin sinmurat ya si Pablo kona ni Tito ta pigaw nin matandaan na a kuston pangrisulba sa saytin prublima.

Iti konan sitin surat na ni Pablo, manꞌipapanemtem na kona ni Tito no ani-ani a matkap a pigagawaꞌ nan sayay manepeg a magꞌin nin pangulon dupong ran mammemper itaw. Manꞌiyakay na et kona ni Tito no paꞌno a matkap a piuugaliꞌ ran nagsikabarang nin myimbro tan no paꞌno nasaran ipangulwan tan iyakay ni Tito. Manꞌibibilin na anamaet kona ni Tito a matkap a imaꞌnwen nasaray mampangyakay nin kuntra sa tutuon akay a nangibwat konan Dios ta sayti ket mampangibwatan nin pipupurpya tan pakasidaꞌ nin uksoy ran mammemper.