Say Bibilin na ni Pablo kona ni Timoteo
4
Timoteo, edengan koytin gan-gan komo sa adapan nan Dios tan nan Cristo a si Jesus. Oꞌ anaod sya, sumubliꞌ ya nin sintinsyawan nasaray mabyay et man tan saray nunati ana tan syay magꞌuray ana nin sayay adiꞌ. 2 Ket anaod, ipatandaꞌ may Mabistan Patandaꞌ. Matkap a sisasadyaꞌ kan pirmi nin gawꞌen in sa animan a kapapaꞌsar. Matkap a siaanos ka sa pangangakay mo nin ipatarusan mo konran tutawo a abas a man-gawꞌen ra tan bibilinen mosaran maong nin magbabawiꞌ sarayna tan pagsenen moy nakem ran saray man-gumwaꞌ nin no ani a mapteg. 3 Wanin ta rumateꞌ liꞌ a panaon a kai rayna nin rengꞌen nin tutawo a kuston uakay, no kai edet, banaꞌ ta rabay ra nin sunuren a dukaꞌ a uapes ra, mangkit saraynan mangkit nin mangangakay a mamaritaꞌ konra nin say no ani a rabay-rabay ran rengꞌen. 4 Kai rayna anaod nin rengꞌen a katutuꞌwan no kai say rengꞌen ra tana ket say pinabrikan istu-isturya. 5 Siꞌka baleꞌ, Timoteo, matkap a magaꞌgetan mo a kanakman mo maipaꞌkaꞌ sa sarban bagay. Itpel moy sarban dyaꞌdyaꞌ. Ipatandaꞌ may Mabistan Patandaꞌ tan gawꞌen mon maong a sarban rispunsibilidad nin nibi komo.6 Wanin ta dandani akoyna nin lumakwan konan sitin byay ket paꞌsar nin byay ko a manꞌidaꞌton ana konan Dios. 7 Ginwaꞌ koy anggawan nin mababaꞌ kon kapada nan sayay mangkilumbaꞌ nin malayo. Ket, maibaritaꞌ kon narateꞌ koyaynay peteng; nagmatalkan koy sarban nipuyaꞌ nan Dios kongko. 8 Kanyaꞌ nin sawanin, main anan naisadyaꞌ para kongko nin sayay primyo a maibi kongko banaꞌ ta mapteg a byay ko sa pangingikit nan Uunuren ko. Sya a mapteg nin hwis a mami kongko nin sitin gun-guna sa Awro liꞌ a Manintinsya ya. Amboꞌ tamoꞌ nin kongko no kai pati konran sarba ran masulit nin mantumaꞌgan sa isusubliꞌ na.
Say Kapapaꞌsar na ni Pablo
9 Timoteo, no magwaꞌ, mako kaynadtin tampor. 10 Anaod, si Cresente ket nako ya sa prubinsyan Galaciaa, tan si Titob ket sa prubinsyan Dalmacia. Si Demas baleꞌ, linakwanan nakoyna a nako ya sa Tesalonica ta kinaririktan nayna a karigawan nin madumog iti sa mundo. 11 Si Lucas tana a kalamoꞌ ko ket dalanen ma tan iꞌras ma liꞌ si Marcos ta makatulong ya kongko sa trabaho maipaꞌkaꞌ konan Catawan. 12 Ket si Tiquico anamaet, nibakiꞌ koyan makodsen sa syudad nin Efeso. 13 No mako kaynadti liꞌ, awiten maytaw si seket kon para rayꞌep a nibatiꞌ kodtaw konra ni Carpo itaw sa syudad nin Troas. Awiten mo anamaet a lulibro ko, laloynaytaw say katat a nanuratan ko.
14 Sangkadukaan a ginwaꞌ na kongko ni Alejandro a panday nin gansaꞌ. Wanin man, si Uunuren anay makauray nin manusa kona sigon sa kadukaan a ginwa-ginwaꞌ na. 15 Pakailag kan maong kona ta mangkuntrawen nan maong a manꞌiyakay tamo.
16 Sin primiro kon nidipinsa a lalaman ko sa kurti, bukud-bukod ko tamoꞌ ta pinauryan rakoyna nin sarba. Sapa kumon ta kai na ikwinta nin Dios a kasalanan ra in say ginwaꞌ ra. 17 Wanin man, si Uunuren, tinulungan nako tan pinagsen nay nakem ko ta pigaw nin maipatandaꞌ koya nin maong a Mabistan Patandaꞌ. Ket narngeꞌ rayan sarba ran tawodtaw sa kurti, tan nisalba nako anamaet sa kasan sapo nin pakasintinsya nin patiti. 18 Anaod si Uunuren, ituluy-tuloy nako nin iligyas sa sarban kadukaan anggan irateꞌ nakodtaw sa Pagꞌadian na sa langit nin kai gapo nin mangno.
Itandudoꞌ yay ngaran na anggan-angga!
Peteg a wanin.
Say Patanid na ni Pablo
19 Pakumustawen mosara pa para kongko a mitraasawan Priscila tan Aquilac, tan sarba ran sa pamilya na ni Onesiforo. 20 Si Erasto pinaibatiꞌ ya sa syudad nin Corinto. Si Trofimo anamaet ket nibatiꞌ koyadtaw sa Mileto ta main nin masakit na. 21 Gawꞌen moy anggawan nin mababaꞌ mon makapikaꞌ anadti baꞌyo a panaon nin marayꞌep.
Mampakumustawen raka ni Eubulo, Pudente, Lino, Claudia tan saray sarba ran raruman mammemper iti kona ni Cristo.
22 Sapa kumon ta paksawen na ni Uunuren a nakem mo.
Bindisyunan nakamo kumon nin Dios!