Si Timoteo, syay anak-anaken nin lalaki a nadumog na ni Pablo sin nipatandaꞌ naya a Mabistan Patandaꞌ nan Dios itaw sa babalin Listra (Ginwa-ginwaꞌ 16:1-3). Si ina na ni Timoteo ket Judio yan mammemper kona ni Cristo, baleꞌ si ama na ket amboꞌ.

Banaꞌ ta say pammemper na ni Timoteo ket peteg a masibulot, nikwinta naya ni Pablo nin bilang peteg nin anak na. Ket, sinagyat naya ni Pablo nin kala-kalamoꞌ na sa pangingipatandaꞌ tan pangangakay (Roma 16:21; 1 Corinto 16:10). Si sayay babali nin nangyakayan ra ket sa Efeso, tan nibatiꞌ nayadtaw ni Pablo si Timoteo ta pigaw nin kalapen na a lugar na nin mangangakay sa dupong ran mammemper itaw. Ket sin naꞌteng yaynan niikap itaw sa Efeso si Timoteo, sinmurat ya si Pablo kona. Magtulumpuloꞌ a taon na ni Timoteo sin nisurat nayti ni Pablo kona.

Say impurtanti nin tupiko nan sitin surat ket say maipaꞌkaꞌ sa pagmamantini na ni Timoteo sa akay nin tutuo. Main saraytaw saray mangangakay nin abas a no saray tutawo ket rabay ray maisalba, matkap a asikaswen ra a kukaugalian ra maipaꞌkaꞌ sa kanen tan andiꞌ sara nin sumrep sa byay a main nin asawa. Kanyaꞌ nin nigan-gan na ni Pablo kona ni Timoteo a paeden nasara in saray mampangyakay nin sain (1:3).

Main anamaet nin nibibilin na ni Pablo maipaꞌkaꞌ konran saray mididinep no dumasal sara tan mangrayo sara konan Dios, say kakikimey ran bubbayi nin mammemper, say pigagawaꞌ a matkap sa kabibyay ran tutawon napiliꞌ nin mangipangulo sa dupong (3:1-7), tan wanin anamaet sa pigagawaꞌ a matkap sa kabibyay ran napiliꞌ a tumulong konran pupangulo (3:8-13), tan no paꞌno anamaet a pakikalamoꞌ konran balo, pupangulo, tan wanin anamaet konran uaripen. Main anamaet et nin raruman bubagay a nigan-gan na ni Pablo kona ni Timoteo, alimbawaꞌ say maipaꞌkaꞌ sa no ani a mabistan gawꞌen na sa kuston pagsisirbi kona ni Cristo.