Matkap rasaran Idasalan nin Taga Tesalonica si Pablo
3
Ket sawanin, manꞌaduen kon bubsat, dawaten ko komoyo nin idasalan rakami ta pigaw nin say minsahin mangibwat konan Uunuren tamo ket maitayak kumon sa abaw nin lugar sa anted tamoꞌ nin panaon tan maakoꞌ kumon nin main nin pangrarayo nin bilang isen komoyo. 2 Idasal moyo et a maipalꞌis kami kumon konran maraet tan dukaꞌ a tutawo, ta amboꞌ nin sarban tawo ket mamper sa minsahi nan Dios. 3 Baleꞌ mapagmatalkan moya lawas a Uunuren a byan nakamon gesen tan ipalꞌis nakamo konan si sya a Kadukaana. 4 Mambyan nakamin ilalo nin Uunuren maipaꞌkaꞌ komoyo, a mampagkabyay kamo tan ituloy moyoy magkabyay sa dalan nin pagkabyay a nigan-gan min tumbuken moyo. 5 Sapa kumon ta si Uunuren ket antabayan natamo nin magꞌin nin madaer kamo nin bilang kona ni Cristo tan umararem kumon et a pakataros moyo maipaꞌkaꞌ sa pangangadoꞌ nan Dios.Andiꞌ sara nin Kunsintyen a Matamlad
6 Manꞌaduen kon bubsat, igan-gan mi ta mangingilalaman kami kona ni Uunuren tamon Jesu-Cristo a kadayꞌan moyo saray kapada moyon mammemper nin matamlad tan kai marabay nin magkabyay nin maitukoy sa niyakay mi komoyo. 7 Anaod, siꞌkamo, tandaꞌ moyon peteg a matkap moyo nin arigen a ginwaꞌ mi, naꞌkit moyon amboꞌ kamin matamlad sin isen kami komoyo. 8 Kai kami nin nangawang nin animan nangibwat sa siꞌnuman nin kai mi nin binayadan, ana edet, naningkap kamin awro tan yabi ta pigaw nin kai kami nin makabyat sa siꞌnuman komoyo. 9 Ginwaꞌ mi in amboꞌ nin banaꞌ ta kasan kanepegan min maningkap komoyo nin matkap mi, no kai edet, ta pigaw nin byan kamon ihimplo nin arigen moyo 10 ta sin isen kami et ket nibi miya anayti nin bibilin: “Si kai marabay nin magtrabaho kai ya nin mangan.”
11 Isurat mi ti komoyo ta natandaan min main isen komoyo a kai marabay nin magtrabaho tan kasan man-gawꞌen ra no kai kibiang sa byay ran main nin byay. 12 Mangibwat sa pakauray na nin Uunuren a si Jesu-Cristo, mairot min igan-gan konran sarain nin tutawo a magkabyay sara nin matinek nin mampagtrabaho sara para sa ikabyay ra.
13 Baleꞌ, siꞌkamo manꞌaduen kon bubsat, andiꞌ kamo nin sumawaꞌ nin gumwaꞌ nin maabig. 14 No main nin kai nin sumunor sa nibaritaꞌ kodti konan sitin surat, tandaan moya tan andiꞌ kamo nin kilimug-limog kona ta pigaw nin dumingꞌey ya, 15 baleꞌ andiꞌ moya anamaet nin ibilang nin kaguraꞌ no kai bibilinen moya nin baraꞌmon busat.
16 Sapa kumon ta si Uunuren a syay puon nin katinekan, ituluy-tuloy nakamon byan nin pitutuno.
Pinirmawan nayayti ni Pablo
Isen ya kumon komoyo ngaꞌmin a Uunuren.
17 Siꞌkon mismo nin si Pablo a nanurat konan siti:
Kumusta kamoynadsen ngaꞌmin? Wanin a man-gawꞌen ko sa sarban surat ko, wanin akon sumurat.
18 Rumateꞌ kumon komoyo ngaꞌmin a bindisyon na ni Uunuren tamon Jesu-Cristo.