Say Mangyadiꞌ liꞌ Baꞌyo a Irarateꞌ na ni Cristo
2
Maipaꞌkaꞌ sa isusubliꞌ na ni Uunuren tamon Jesu-Cristo tan say panininep na kontamo nin maikalamoꞌ konaa, pangingaꞌdo moyo, manꞌaduen kon bubsat, 2 a andiꞌ kamon tampor nin sumalak o maliꞌmwan sa marnge-marngeꞌ moyon rinmateꞌ yaynay awron isusubliꞌ na ni Uunuren. Andiꞌ kamo nin mamper abirno nin ibaritaꞌ ran saray magꞌirgo a patandaꞌ in nin nangibwat konan Ispirito, o irgo o surat a nangibwat komi. 3 Andiꞌ moyo gapo nin iyaburoy a lingwen kamo nin siꞌnuman. Kai ya nin rumateꞌ a awron isusubliꞌ na ni Uunuren anggan kai nin nangyadiꞌ a saray abaw nin kuntra konan Dios ket paipadar sarayna, tan anggan kai ya et nin nipadar a tawon pakaꞌkitan nin sarbaynan bakas nin kadukaan, si tawon madusa anaod sa impyirno. 4 Kuntrawen naya a Dios tan say sarban dios-dios nin itandudoꞌ ran tutawo tan sarba ran manraywen ra. Ikwa nay kadiryan na nin mas makapangyayadiꞌ dyan say sarba, tan sumrep tan mako ya et nin tumekreꞌ sa Timplo nan Dios nin ibaritaꞌ nan sya a Dios.b5 Kai moyo para nin mapanemtem? Nibaritaꞌ koyna in komoyo sin kalamoꞌ rako et. 6 Kai et nin mampangyadiꞌ in sawanin ta main nin mampamaed, ket tandaꞌ moyo no ani. Maipadar ya liꞌ no rumateꞌ a naitandaꞌ nin panaon. 7 Anaod, say pwirsa nin kadukaan ket sugsugen sarayna sawanin a abaw nin tutawo nin kumuntra konan Dios, baleꞌ sain ket adi et anggan si mampamaed ket maglat ya. 8 Ket maipadar yayna liꞌ in si tawon pakaꞌkitan nin sarbaynan bakas nin kadukaan, baleꞌ paysepen naya tamoꞌ liꞌ ni Uunuren a Jesus. Anaod, laꞌpusan ya liꞌ nin byay nin say salag na nin Uunuren no rumateꞌ ya. 9 Saytaw liꞌ no siin nin dukaꞌ a tawo ket ipadar yayna, byan naya liꞌ nin kapangyadian na ni Satanas tan mangwaꞌ yan sarbaynan klasi nin milagro tan makalingon panandaan tan makapakaꞌngap a mangyadiꞌc, 10 tan mangusar yan sarbayna nin klasin kadukaan nin ipanglingo na konran saray sidaen liꞌ. Maisalba sara kumon no inakoꞌ tan pinabli ray katutuꞌwan. 11 Ket banaꞌ ta kai ra nin inakoꞌ a katutuꞌwan, kanyaꞌ nin manꞌaburuyan na nin Dios a lingwen sara nin pakayadiꞌ nin abas, sa wanin ket tepren ra a bulaꞌ 12 kanyaꞌ nin saray sarba ran kinaririktan ray kadukaan imbis nin inakoꞌ ray katutuꞌwan ket madusa sara.
Piniliꞌ nasaran Isalba nin Dios a Taga Tesalonica
13 Siꞌkami, manepeg miya tanan kisalamatan nin pirmi a Dios banaꞌ komoyo, manꞌaduen kon bubsat a mangkawa-kawaꞌnanen nan Uunuren, ta nangibwat et sin taranaꞌ ket piniliꞌ nakamoyna nin Diosd ta pigaw nin isalba na yupaꞌ sa nipangipurok na komoyo nin si Ispirito na tan say pammemper moyo sa katutuꞌwan. 14 Sain a nangayaban nan Dios komoyo yupaꞌ konan Mabistan Patandaꞌ nin niparateꞌ mi komoyo, kinayaban nakamo ta pigaw nin kiramaꞌ kamo sa kataꞌgayan na ni Uunuren tamon Jesu-Cristo. 15 Kanyaꞌ anaod, manꞌaduen kon bubsat, nin dumaer kamon mamper sa kukatutuꞌwan a niyakay mi komoyo sa irgo man o sa surat.
16 Sapa kumon ta si Uunuren tamon Jesu-Cristo tan si Dios a Ama tamo, a syay mampangawaꞌnan kontamo tan mangibwat sa maruros a nakem na maipaꞌkaꞌ kontamo ket binyan natamon say liwaliwa nin kasan anggawan tan say ilalo sa mabistan nipangakoꞌ na, 17 byan rakamo kumon nin tepel tan gesen nin nakem nin mamaritaꞌ tan mangwaꞌ nin sarban maabig.