Ipaꞌwit miyaytin surat komoyon iti sa dupong ran mammemper a mampididinep isen sa Tesalonica^a nin iti konan Dios a Ama tamo tan kona ni Uunuren a Jesu-Cristo.

2 Sapa kumon ta lawas a bindisyunan rakamo tan byan rakamon mabistan kapapaꞌsar.

3 Manꞌaduen nin bubsat, manepeg miya tanan kisalamatan nin pirmi a Dios banaꞌ komoyo, tan kusto tamoꞌ nin gawꞌen mi in banaꞌ ta kasan tegen nin man-gumsen a pagmamatalek moyo kona tan kasan tegen nin manꞌumalaki a pangangadoꞌ nin barang saya sa saya tan saya komoyo. 4 Ket siꞌkami, pirayu-rayo mi tanan pirmi sa sarban dupong ran mammemper konan Dios nin kinaꞌ mi a pangngagwanta moyo, tan say magsen lawas a pagmamatalek moyo abirno wanin anay pakapadyaꞌdyaꞌ tan pakapaidap moyo.

5 Sain, ipaꞌkit a mapteg nin paninintinsya nan Dios, tan say gagara nin sain ket say pagꞌin moyon kumanaꞌ sa Pagꞌadian nan Dios. Siin a rason nin pangingirangep moyo sawanin. 6 Gawꞌen nan Dios no ani a matunong: Padyaꞌdyaen nasara in saray mampamadyaꞌdyaꞌ komoyo. 7 Baleꞌ siꞌkamon mampangirangep, painawnan nakamo liꞌ, pati siꞌkami anamaet, no sumubliꞌ ya si Uunuren a Jesus nin mangibwat sa langit a kalamoꞌ nasaray makapangyayadiꞌ a uanghil na, nin nalibed 8 nin burung-burong a apoy. Dusawen nasara liꞌ a kai nin mangalilbiꞌ konan Dios tan saray kai nin nangimbabaet konan Mabistan Patandaꞌ maipaꞌkaꞌ kona ni Uunuren tamon Jesus. 9 Say kasan anggawan a pakasidaꞌ tan pakaisyay konan Catawan tan sa sangkaandaan nin nagwaꞌ nin pakayadiꞌ na a dusa ra liꞌ. 10 Mangyadiꞌ in liꞌ sa awron isusubliꞌ na ta pigaw nin risibyen nay pammagalang ran saray nipurok nan tutawo na tan say pammataꞌgay ran sarba ran nagmatalek kona. Maiyayi kamo konra ta timper moyoy nibaritaꞌ mi komoyo maipaꞌkaꞌ kona.

11 Ket sitatandaꞌ sa sayti, pidasal-dasal min pirmi konan Dios a gawꞌen nakamo kumon nin kumanaꞌ sa nipangayab na komoyo, ket gawꞌen na, yupaꞌ sa pakayadiꞌ na, nin matukid kumon a maabig a uapes moyo tan mailaꞌpos moyo kumon a gugawaꞌ moyon bunga nin pagmamatalek moyo. 12 Banaꞌ sa wanin, mapagalangan moya si Uunuren tamon Jesus, tan mabyan kamo anamaet nin kagalangan banaꞌ sa kamaungan nan Dios tan ni Uunuren a Jesu-Cristo komoyo.