Siti si Tesalonica ket impurtanti yan syudad sa amyanan nin parti nan nasyon nin mantawagen sawanin nin Grecia. Iti sa Tesalonica, nipaꞌdeng naya ni apostol Pablo a dupong ran mammemper (Ginwa-ginwaꞌ 17:1-9). Abaw sara konran tumutumbok na ni Cristo a nangrayo nin dios-dios sin saytaw sin baꞌyo sara nin namper (1:9). Baleꞌ nagꞌin saran matpel tan siaanos nin dinmaer sa pammemper ra konan Catawan, ket banaꞌ konra si Mabistan Patandaꞌ maipaꞌkaꞌ kona ni Cristo, naitayak ya sa intiron lulugar (1:8). Magwaꞌ nin siti a sangkauꞌnawan nin surat na ni Pablo, tan sa angan-angan magwaꞌ a siti et a sangkauꞌnawan nin surat sa Baꞌyon Tistaminto.

Iti konan sitin surat, nipapanemtem na ni Pablo konran mammemper itaw sa Tesalonica a maipaꞌkaꞌ sa nipatandaan na tan saray kalalamoꞌ na tan say pigagawaꞌ ra sin itaw sara (2:1-16).

Saray raruma konran tutawo sa Tesalonica nitaranaꞌ ray kumuntra kona ni Pablo (Ginwa-ginwaꞌ 17:1-15), kanyaꞌ nin matkap a lumayas yan mako sa Atenas. Baleꞌ nibakiꞌ naya a amigo nan anak-anaken et a si Timoteo ta pigaw nin keen na kikiten a kapapaꞌsar ran saray mammemper itaw (3:1-5). Sin nakasubliꞌ yaynadtaw kona ni Pablo si Timoteo, niparateꞌ na a mabistan ginwa-ginwaꞌ ra maipaꞌkaꞌ sa pammemper tan adoꞌ ra (3:6-10).

Wanin man, saray raruma konran myimbro tinumgen saraynan nagtrabaho (4:11,12), banaꞌ ta manꞌipaꞌkaꞌ ra a sumubliꞌ yaynan tampor si Cristo. Saray raruma anamaet, mapaga sara banaꞌ ta main saray kukanayon tan uamigo ra nin nati ana baꞌyo ya nin sumubliꞌ si Cristo. Kanyaꞌ nin nibaritaꞌ tan nipapalaway na nin maong konra ni Pablo no ani a mangyadiꞌ liꞌ no sumubliꞌ yayna si Cristo (4:13-18), miꞌsa nibaritaꞌ na konra no paꞌno sara nin magkabyay leleg nin saytin panaon nin pananaꞌgan (5:1-11).

Say susuyot a bibilin na ni Pablo a impurtanti nin panemtemen: